ពលរដ្ឋរុស្ស៊ីសម្រុកភៀសខ្លួនចេញពីប្រទេស គេចពីការកោះហៅចូលបម្រើកងទ័ព
រុស្ស៊ី ៖ ប្រទេសរុស្សីនឹងបើកមជ្ឈមណ្ឌលចុះឈ្មោះកងទ័ពនៅតាមព្រំដែនជាមួយប្រទេសហ្សកហ្ស៊ី
រុស្ស៊ី ៖ ប្រទេសរុស្សីនឹងបើកមជ្ឈមណ្ឌលចុះឈ្មោះកងទ័ពនៅតាមព្រំដែនជាមួយប្រទេសហ្សកហ្ស៊ី
រុស្ស៊ី ៖ ប្រទេសរុស្សីនឹងបើកមជ្ឈមណ្ឌលចុះឈ្មោះកងទ័ពនៅតាមព្រំដែនជាមួយប្រទេសហ្សកហ្ស៊ី (Georgia) ជាកន្លែងតម្រង់ជួរដ៏វែងត្រូវបានបង្កើតឡើង ដើម្បីត្រួតពិនិត្យលើបុរសជនជាតិរុស្ស៊ី ដែលព្យាយាមរត់ភៀសខ្លួនចេញពីប្រទេសកំណើត ដើម្បីចៀសវាងការបញ្ជូនចូលជួរកងទ័ពទៅប្រយុទ្ធនៅប្រទេសអ៊ុយក្រែន។
អាជ្ញាធររុស្ស៊ីបានបញ្ជាក់ថា មន្ត្រីនៅច្រកព្រំដែនឆ្លងកាត់ Verkhniy Lars នឹងមានភារកិច្ចក្នុងការបំពេញការកោះហៅប្រជាពលរដ្ឋនៃការចល័ត ដែលគ្រប់អាយុចូលបម្រើក្នុងជួរកងទ័ព។ ខណៈរូបភាពថតចេញពីផ្កាយរណបនាពេលថ្មីៗនេះ បានបង្ហាញអំពីជួររថយន្តរាប់គីឡូម៉ែត្ររបស់ពលរដ្ឋរុស្ស៊ី ដែលភាគច្រើនជាបុរសបាននាំគ្នាសម្រុកចេញពីប្រទេសកំណើត ដើម្បីឆ្លងចូលប្រទេសហ្សកហ្ស៊ី។
លោក Rayhan Demytrie អ្នកឆ្លើយឆ្លងព័ត៌មានរបស់សារព័ត៌មាន BBC បាននិយាយថា អ្នកធ្វើដំណើរឆ្លងចូលប្រទេសហ្សកហ្ស៊ីទាំងអស់មើលទៅហាក់អស់កំលាំងខ្លាំងណាស់។ ពួកគេមើលទៅឃ្លាន និងគេងមិនលក់ ប៉ុន្តែបានបង្ហាញអារម្មណ៍ធូរស្រាល នៅពេលបានទៅដល់កន្លែងសុវត្ថិភាព។
ពួកគេបានមកជាក្រុមដោយដើរអូសវ៉ាលី ចំណែកអ្នកផ្សេងទៀត បានមកដល់ដោយជិះឡាន ឬកង់។ ហើយតាមការសាកសួរ មនុស្សគ្រប់គ្នានិយាយស្រដៀងគ្នា ពួកគេមិនយល់ស្របនឹងសង្គ្រាម ប៉ុន្តែទំហំនៃការគាបសង្កត់នៅក្នុងប្រទេសរុស្ស៊ី ធ្វើឱ្យពួកគេបាត់បង់សិទ្ធអំណាចរបស់ខ្លួន។
ក្រសួងមហាផ្ទៃនៃសាធារណរដ្ឋ Ossetia ភាគខាងជើងរុស្ស៊ី ជាកន្លែងដែលឆ្លងកាត់ព្រំដែន Verkhniy Lars បានលើកឡើងថា មន្ត្រីរបស់ខ្លួនប្រមាណ៦០នាក់ ត្រូវបានដាក់ពង្រាយនៅទីនោះរួចហើយ ដោយពណ៌នាអំពីស្ថានភាពថា «តានតឹងខ្លាំង» ហើយមជ្ឈមណ្ឌលចុះឈ្មោះកងទ័ពនឹងត្រូវបើកនៅពេលឆាប់ៗដ៏ខ្លីខាងមុខនេះ។
ដោយឡែក ជួរអ្នកដំណើរយ៉ាងវែងផ្សេងទៀត ក៏ត្រូវបានគេរាយការណ៍នៅឯច្រកព្រំដែនរបស់រុស្ស៊ីនឹងប្រទេសម៉ុងហ្គោលី និងកាហ្សាក់ស្ថានផងដែរ។ ប្រធានាធិបតីប្រទេសកាហ្សាក់ស្ថាន លោក Kassym-Jomart Tokayev កាលពីថ្ងៃទី២៧ ខែកញ្ញា បានប្តេជ្ញាដើម្បីការពារសុវត្ថិភាព និងសុខុមាលភាពប្រជាជនរុស្ស៊ី ដែលភៀសខ្លួនចេញពីជាមួយស្ថានភាពអស់សង្ឃឹម។
ក្រសួងការពារជាតិរុស្ស៊ី កាលពីថ្ងៃទី២៧ ខែកញ្ញា បានបញ្ជាក់ថា ខ្លួននឹងមិនស្វែងរកការធ្វើបត្យាប័នជនជាតិរុស្ស៊ី ដែលធ្វើដំណើរទៅក្រៅប្រទេស ដើម្បីជៀសវាងការត្រូវបានព្រាងចូលបម្រើក្នុងជួរកងទ័ពនោះទេ។
គួររំលឹកជូនថា ប្រធានាធិបតីរុស្ស៊ី លោក Vladimir Putin កាលពីថ្ងៃទី២១ ខែកញ្ញា បានប្រកាសអំពីអ្វីដែលលោកពិពណ៌នាថាជាការចល័តកងទ័ពដោយផ្នែកជាមួយនឹងរដ្ឋមន្ត្រីការពារជាតិ លោក Sergei Shoigu ហើយទាហានបម្រុងប្រមាណ ៣០ម៉ឺននាក់នឹងត្រូវបានកោះហៅ។ ប៉ុន្តែទោះយ៉ាងណា ប្រព័ន្ធផ្សព្វផ្សាយរុស្ស៊ីបានរាយការណ៍ថា ចំនួនពិតប្រាកដអាចច្រើនជាងនេះទៅទៀត៕
ចែករំលែកព័តមាននេះ