រាជធានីភ្នំពេញ ៖ តាមច្រកទ្វារព្រំដែនទាំងអស់របស់កម្ពុជាបានបិទចោលទាំងស្រុងនូវការនាំចូលបន្លែ និងផ្លែឈើគ្រប់ប្រភេទ ដែលនាំពីប្រទេសថៃ ។ នេះបើតាមមន្ត្រីជាន់ខ្ពស់អគ្គនាយកដ្ឋានអន្ដោប្រវេសន៍កម្ពុជា ។ ការបិទនេះ បន្ទាប់ពីការប្រកាសរបស់សម្តេចតេជោហ៊ុន…
រាជធានីភ្នំពេញ ៖ តាមច្រកទ្វារព្រំដែនទាំងអស់របស់កម្ពុជាបានបិទចោលទាំងស្រុងនូវការនាំចូលបន្លែ និងផ្លែឈើគ្រប់ប្រភេទ ដែលនាំពីប្រទេសថៃ ។ នេះបើតាមមន្ត្រីជាន់ខ្ពស់អគ្គនាយកដ្ឋានអន្ដោប្រវេសន៍កម្ពុជា ។ ការបិទនេះ បន្ទាប់ពីការប្រកាសរបស់សម្តេចតេជោហ៊ុន សែនប្រធានព្រឹទ្ធសភាកម្ពុជាដែលកំណត់ពេល២៤ម៉ោងឲ្យភាគីថៃ បើកច្រកព្រំដែលដូរដើមដោយមិនចាំចាប់ចរចាដាក់លក្ខខណ្ឌអ្វីទាំងអស់ ។
បើតាមឯកឧត្តមឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋានអន្ដោប្រវេសន៍ត្រូវបានសារព័ត៌មានស្រង់សំដីផ្សាយថា នៅវេលាម៉ោងជាង១១ព្រឹកថ្ងៃទី១៧ ខែមិថុនា ឆ្នាំ២០២៥ នេះថា មកទល់ពេលនេះ នៅតាមច្រកទ្វារព្រំដែនទាំងអស់របស់កម្ពុជា បានបិទចោលទាំងស្រុងនូវការនាំចូលបន្លែ និងផ្លែឈើគ្រប់ប្រភេទ ដែលនាំពីប្រទេសថៃ ចូលមកក្នុងប្រទេសកម្ពុជា ។
ខណៈឱសានវាទ២៤ម៉ោង ដែលជាការដាក់កំហិតរបស់រាជរដ្ឋាភិបាលកម្ពុជា បានដល់ពេលកំណត់ហើយ គឺកាត់ផ្ដាច់ការនាំចូលបន្លែ និងផ្លែឈើទាំងអស់របស់ថៃ ដែលនាំចូលតាមព្រំដែនមកកាន់ប្រទេសកម្ពុជា ដើម្បីជាការឆ្លើយចំពោះភាពគំរាមកំហែង និងប្រមាថរបស់ក្រុមយោធាថៃ ក្រោយស្ថានភាពតាងតឹងដាក់គ្នាលើបញ្ហាព្រំដែនប្រទេសទាំងពីរដែលបង្កដោយភាគីថៃ ។
សូមជម្រាបថា ថ្លែងសារពិសេស កាលពីថ្ងៃទី១៦ មិថុនា ឆ្នាំ២០២៥ សម្តេចតេជោ ហ៊ុន សែន ប្រធានព្រឹទ្ធសភានិងជាប្រធានគណបក្សប្រជាជនកម្ពុជាបានបញ្ជាក់ថា ក្នុងរយៈពេល២៤ម៉ោងនេះ បើភាគីថៃមិនព្រមបើកច្រកព្រំដែនដូចដើមវិញទេ កម្ពុជានឹងបិទច្រកព្រំដែន ជាមួយថៃទាំងអស់ ដោយមិនឲ្យដឹកបន្លែ ផ្លែឈើចូលមកក ម្ពុជានោះទេ។
សម្តេចតេជោ ហ៊ុន សែន បានឲ្យដឹងថា សម្តេច និងសម្តេចវរធិបតី បានធ្វើការជួបចរចាសន្ទនាតាមទូរស័ព្ទជាមួយនាយករដ្ឋមន្ត្រីថៃដើម្បីសុំចរចាបើកច្រើនព្រំដែនវិញ ប៉ុន្តែមិនអាចនោះទេ ព្រោះថាការបិទរបស់ភាគីជាការសម្រេចជាឯកតោភាគី ដូច្នេះ ការបើកជារឿងរបស់ថៃ។
សម្តេចតេជោបានលើកឡើងថា ភាគីថៃបានបិទច្រកព្រំដែនបានរំលោភលើកិច្ចព្រមព្រៀងជាមួយគ្នាទៅហើយ ដូច្នេះ ការបិទជារឿងរបស់ថៃ ។
សម្តេចតេជោបានបញ្ជាក់ថា៖ «កុំអីយើងបិទព្រំដែនថ្ងៃនេះទៅហើយ តែដោយសម្តេច និងសម្តេចបវរធិបតី ហ៊ុន ម៉ាណែត បានជួបពិភាក្សាគ្នាជាមួយនាយករដ្ឋមន្ត្រីថៃ អីញ្ចឹងស្អែកយើងនឹងបិទព្រំដែនទាំងអស់ដោយមិនឲ្យដឹងបន្លែ ផ្លែឈើចូលមកកម្ពុជានោះទេ បើសិនភាគីថៃមិន ព្រមបើកច្រកព្រំដែនដូចដើម។ យើង មិនអាចចរចាជាមួយថៃដោយដាក់លក្ខខ័ណ្ឌឲ្យយើងនោះទេ» ៕
ចែករំលែកព័តមាននេះ