ខេត្តអាទិភាពចំនួន7 ជាគោលដៅជំរុញចលនាភូមិ1 ផលិតផល1
រាជធានីភ្នំពេញ ៖ គោលនយោបាយជាតិ ស្ដីពីការជំរុញចលនាភូមិមួយផលិតផលមួយ ដែលរាជរដ្ឋាភិបាលបានអនុម័តកាលពីឆ្នាំមុន ត្រូវបានគណៈកម្មាធិការជាតិជំរុញចលនាភូមិមួយផលិតផលមួយ លើកមក
រាជធានីភ្នំពេញ ៖ គោលនយោបាយជាតិ ស្ដីពីការជំរុញចលនាភូមិមួយផលិតផលមួយ ដែលរាជរដ្ឋាភិបាលបានអនុម័តកាលពីឆ្នាំមុន ត្រូវបានគណៈកម្មាធិការជាតិជំរុញចលនាភូមិមួយផលិតផលមួយ លើកមកពិភាក្សាក្នុងកិច្ចប្រជុំកាលពីព្រឹកថ្ងៃទី១ មីនា ម្សិលមិញ ដើម្បីអនុវត្តជំហានដំបូង នឹងផ្ដោតទៅលើខេត្តគោលដៅចំនួន៧ ។
ថ្លែងក្នុងកិច្ចប្រជុំនេះ លោកបណ្ឌិត ច័ន្ទ សារុន ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានក្រុមប្រឹក្សាស្តារ និងអភិវឌ្ឍន៍វិស័យកសិកម្មនិងជនបទ បានលើកឡើងថា ក្រុមប្រឹក្សាស្តារ និងអភិវឌ្ឍន៍វិស័យកសិកម្មកម្ពុជា បានរៀបចំគោលនយោបាយជាតិ ស្តីពីការជំរុញចលនាភូមិមួយផលិតផលមួយ ដែលត្រូវបានរាជរដ្ឋាភិបាលអនុម័តកាលពីថ្ងៃទី១១ សីហា ឆ្នាំ២០១៦ កន្លងមក ។ ការអនុវត្តនូវគោលនយោបាយនេះ សំដៅលើកស្ទួយជីវភាពប្រជាពលរដ្ឋកម្ពុជា ជាពិសេស ប្រជាពលរដ្ឋរស់នៅជនបទឱ្យមានភាពធូរធារប្រសើរឡើង ក្នុងបរិបទនៃកំណើនសេដ្ឋកិច្ចរបស់ប្រទេសជាតិ តាមរយៈការជំរុញការផលិត និងការធ្វើពាណិជ្ជកម្មភូមិមួយផលិតផលមួយរបស់ប្រជាពលរដ្ឋមូលដ្ឋានផ្ទាល់ ។
លោកបន្ដថា ក្នុងក្របខ័ណ្ឌនៃគោលនយោបាយជាតិ ស្តីពីការជំរុញចលនាភូមិមួយផលិតផលមួយ គណៈកម្មាធិការជាតិ និងគណៈកម្មាធិការខេត្តជំរុញចលនាភូមិមួយផលិតផលមួយគឺជាតួអង្គចម្បង និងសំខាន់ក្នុងការដឹកនាំកំណត់ទិសដៅផែនការការងារ និងភារកិច្ចក្នុងការសម្រេចនូវគោលបំណងគោលនយោបាយជាតិនេះ ។
លោកទេសរដ្ឋមន្ត្រីបញ្ជាក់ថា ៖ « ក្នុងជំហានដំបូង ក្រុមប្រឹក្សាស្តារនិងអភិវឌ្ឍន៍វិស័យកសិកម្ម និងជនបទ បានសម្រេចជ្រើសរើសយកខេត្តគោលដៅចំនួន៧ ដើម្បីចាប់ផ្ដើមអនុវត្តគោលនយោបាយជាតិក្នុងឆ្នាំ២០១៧នេះ ក្នុងនោះរួមមាន ខេត្តស្វាយរៀង កំពង់ចាម ក្រចេះ តាកែវ កំពត សៀមរាប និងឧត្តរមានជ័យ » ។
ការអនុវត្តគោលនយោបាយនេះ ក្រោមកិច្ចសហការនិងសម្របសម្រួលពីអគ្គលេខាធិការដ្ឋាននៃគណៈកម្មាធិការជាតិជំរុញចលនាភូមិមួយផលិតផលមួយ ដើម្បីរៀបចំសម្រង់ព័ត៌មាន និងទិន្នន័យបឋមភូមិមួយផលិតផលមួយ ដែលមានសក្តានុពលក្នុងភូមិសាស្ត្រខេត្តរបស់ខ្លួន ធ្វើយ៉ាងណា ចងក្រង និងវិភាគក្នុងគោលដៅរៀបចំផែនការយុទ្ធសាស្ត្រសម្រាប់ការងារជំរុញចលនាភូមិមួយផលិតផលមួយរបស់ខេត្ត ក៏ដូចជាពង្រឹងការទទួលខុសត្រូវរបស់គណៈកម្មាធិការខេត្ត ជំរុញចលនាភូមិមួយផលិតផលមួយ ក្រោមកិច្ចសហការជាមួយមន្ទីរពាក់ព័ន្ធជុំវិញខេត្ត អង្គការក្រៅរដ្ឋាភិបាល និងសមាគមអ្នកផលិតនៅតាមភូមិ-ឃុំក្នុងខេត្ត ៕
ចែករំលែកព័តមាននេះ