រដ្ឋបាលសាលាស្រុកទឹកផុស បានជូនដំណឹងដល់សាធារណជន ជាពិសេសភ្ញៀវទេសចរឲ្យបានជ្រាបថា ស្ពានទំនប់ចាក់ទឹម ស្ថិតនៅក្នុងភូមិកោះខ្ទម្ភ ឃុំជៀប ស្រុកទឹកផុស ត្រូវបានកាត់ផ្ដាច់ទាំងស្រុងហើយ ដូច្នេះមិនអាច
ខេត្តកំពង់ឆ្នាំង ៖ រដ្ឋបាលសាលាស្រុកទឹកផុស បានជូនដំណឹងដល់សាធារណជន ជាពិសេសភ្ញៀវទេសចរឲ្យបានជ្រាបថា ស្ពានទំនប់ចាក់ទឹម ស្ថិតនៅក្នុងភូមិកោះខ្ទម្ភ ឃុំជៀប ស្រុកទឹកផុស ត្រូវបានកាត់ផ្ដាច់ទាំងស្រុងហើយ ដូច្នេះមិនអាចធ្វើដំណើរទៅលេងកម្សាន្តទឹកធ្លាក់ថ្មក្រាល បានឡើយ។
ហេតុដូចនេះ ដែលបានជម្រាបជូនខាងលើ ដើម្បីរក្សាសុវត្ថិភាពក្នុងការធ្វើដំណើរ រដ្ឋបាលស្រុកទឹកផុស សូមជូនដំណឹងដល់បងប្អូន និងភ្ញៀវទេសចរទាំងអស់ឲ្យបានជ្រាបថា ផ្លូវទៅកាន់រមណីយដ្ឋាន «ទឹកធ្លាក់ថ្មក្រាល» មិនអាចធ្វើដំណើរបានទៀតឡើយ។ ហេតុនេះ សូមបងប្អូនផ្អាកការទៅលេងកម្សាន្តទឹកធ្លាក់ថ្មក្រាលជាបណ្ដោះអាសន្ន រង់ចាំមានការជួសជុល ឬកសាងស្ពានជាថ្មីឡើងវិញ សាលាស្រុកទឹកផុស និងជូនដំណឹង នៅពេលក្រោយ។
គួរបញ្ជាក់ដែរថា មុនពេលស្ពានត្រូវបានកាត់ផ្ដាច់ទាំងស្រុង កាលពីរសៀលថ្ងៃទី២៤ ខែកញ្ញា ឆ្នាំ២០២២ ភ្ញៀវទេសចរដែលបានទៅលេងកម្សាន្តនៅទឹកធ្លាក់ថ្មក្រាលបា នជាប់គាំងមិនអាចត្រឡប់មកវិញបាន។ ក្នុងឱកាសនោះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានដឹកនាំក្រុមការងារទៅធ្វើការជួសជុលជាបន្ទាន់ ដែលអាចធ្វើឲ្យប្រជាពលរដ្ឋ និងភ្ញៀវទេសចរវិលត្រឡប់ពីទឹកធ្លាក់ថ្មក្រាលមកវិញបាន។ ប៉ុន្តែជាអកុសលទៅព្រឹកថ្ងៃទី២៦ ខែកញ្ញានេះ ស្ពាននោះ ក៏ត្រូវបានរងការខូចខាតទាំងស្រុងតែម្ដង ដោយសារទឹកហូរខ្លាំងពេក៕
ចែករំលែកព័តមាននេះ