រាជធានីភ្នំពេញ ៖ ដើម្បីគាំទ្រការអភិវឌ្ឍវិស័យទេសចរណ៍កម្ពុជាឲ្យមាននិរន្តរភាព និងប្រកបដោយបរិយាប័ន្ន ពិសេសដើម្បីធានាឲ្យមានការបែងចែកផ្លែផ្កានៃកំណើនពីវិស័យទេសចរណ៍ប្រកបដោយសមធម៌ ស្របតាមចក្ខុវិស័យ «វិស័យទេសចរណ៍ជាការនាំចេញនៅនឹងកន្លែង» ក្រសួងទេសចរណ៍បានដាក់ចេញនូវយុទ្ធនាការ «រួមគ្នាប្រើប្រាស់ផលិតផលខ្មែរក្នុងឧស្សាហកម្មទេសចរណ៍» ដោយមានការចូលរួមពីអ្នកពាក់ព័ន្ធក្នុងឧស្សាហកម្មទេសចរណ៍ និងរដ្ឋបាលថ្នាក់ក្រោមជាតិទូទាំង២៥រាជធានី-ខេត្ត។ នេះបើយោងតាមខ្លឹមសារនៃសេចក្ដីថ្លែងការណ៍រួម ដែលបានផ្សព្វផ្សាយដោយក្រសួងទេសចរណ៍ ។
សេចក្ដីថ្លែងការណ៍ដដែលបានឲ្យដឹងថា យុទ្ធនាការនេះដើម្បីជួយដល់ផលិតករក្នុងស្រុកដែលជាប្រជាកសិករ ម្ចាស់កសិដ្ឋាន ម្ចាស់សិប្បកម្ម ម្ចាស់សហគ្រាសធុនតូច និងមធ្យម ផលិតនូវវត្ថុអនុស្សាវរីយ៍ និងអ្នកពាក់ព័ន្ធដទៃទៀតដើម្បីទទួលបានឱកាសបន្ថែមក្នុងការផ្សព្វផ្សាយ និងស្វែងរកទីផ្សារសម្រាប់ផលិតផលខ្មែរនៅក្នុងឧស្សាហកម្មទេសចរណ៍ សំដៅបង្កើនប្រាក់ចំណូលបន្ថែម និងលើកកម្ពស់កម្រិតជីវភាពរបស់ប្រជាពលរដ្ឋ ហើយចាំបាច់ត្រូវមានការចូលរួមពីក្រសួង ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ វិស័យឯកជន ប្រតិបត្តិករទេសចរណ៍ ដៃគូអភិវឌ្ឍន៍ អង្គការជាតិ-អន្តរជាតិ ភ្ញៀវទេសចរជាតិ-អន្តរជាតិ និងប្រជាពលរដ្ឋមូលដ្ឋាន ។
ដោយយល់ឃើញពីសារសំខាន់នៃការគាំទ្រ និងជំរុញការប្រើប្រាស់ផលិតផលខ្មែរក្នុងឧស្សាហកម្មទេសចរណ៍ កាលពីថ្ងៃទី២៨ កុម្ភៈ កន្លងទៅ សហភាពសហព័ន្ធយុវជនកម្ពុជា និងផ្នែកឯកជនក្នុងវិស័យទេសចរណ៍ ដែលមានសហព័ន្ធទេសចរណ៍កម្ពុជា, សមាគមទីភ្នាក់ងារទេសចរណ៍កម្ពុជា, សមាគមទេសចរណ៍អាស៊ីប៉ាស៊ីហ្វិកកម្ពុជា, សមាគមសណ្ឋាគារកម្ពុជា, សមាគមភោជនីយដ្ឋានកម្ពុជា និងសភាពាណិជ្ជកម្មអឺរ៉ុប បានចូលរួមសហការជាមួយក្រសួងទេសចរណ៍ និងរដ្ឋបាលថ្នាក់ក្រោមជាតិដាក់ចេញនូវសេចក្ដីថ្លែងការណ៍រួម៦ចំណុចដូចខាងក្រោម ៖
១-បង្កើនការផ្សព្វផ្សាយ ការគាំទ្រ និងការប្រើប្រាស់ផលិតផលខ្មែរក្នុងឧស្សាហកម្មទេសចរណ៍កម្ពុជា ពិសេស ការរៀបចំ «ខ្សែក្រវាត់បៃតង» នៅតាមគោលដៅទេសចរណ៍ និងទីក្រុងក្នុងព្រះរាជាណាចក្រកម្ពុជា ។
២-ជំរុញការផ្ទេរបច្ចេកវិទ្យា (Transfer of technology) អំពីស្តង់ដាតម្រូវការរបស់មូលដ្ឋានអាជីវកម្មទេសចរណ៍ដល់ផលិតករក្នុងស្រុក ដើម្បីបង្កើនផលិតភាព និងលើកកម្ពស់គុណភាពផលិតផលខ្មែរឆ្លើយតបនឹងសេចក្តីត្រូវការរបស់ឧស្សាហកម្មទេសចរណ៍ ។
៣-ជំរុញការប្រើប្រាស់សេវាកម្មជាមួយដៃគូផ្គត់ផ្គង់សេវាកម្មដែលប្រើប្រាស់ផលិតផលខ្មែរ ។
៤-ចូលរួមគាំទ្រការប្រើប្រាស់ផលិតផលខ្មែរធ្វើជាវត្ថុអនុស្សាវរីយ៍ (Welcome gift) សម្រាប់ស្វាគមន៍ភ្ញៀវពេលអញ្ជើញមកដល់ ឬនៅពេលត្រឡប់ទៅវិញ ។
៥-គាំទ្រការផលិតផលិតផលខ្មែរប្រកបដោយគុណភាពទាំងការវេចខ្ចប់ និងអនាម័យល្អ ព្រមទាំងមានបរិមាណផ្គត់ផ្គង់គ្រប់គ្រាន់ឆ្លើយតបតាមតម្រូវការទីផ្សារ ។
៦-គាំទ្រគោលនយោបាយផ្តល់រង្វាន់លើកទឹកចិត្ត ឬប័ណ្ណសរសើរដល់ប្រតិបត្តិករទេសចរណ៍ ដែលគាំទ្រការប្រើប្រាស់ផលិតផលខ្មែរ (រង្វាន់ធុរកិច្ចបៃតងក្នុងវិស័យទេសចរណ៍) ។
បន្ថែមលើនេះ ក្រសួងទេសចរណ៍ និងស្ថាប័នពាក់ព័ន្ធទាំងអស់ បានរួមគ្នាបង្កើតក្រុមការងារមួយក្នុងការជំរុញការអនុវត្តសេចក្ដីថ្លែងការណ៍រួមនេះ និងឯកភាពឲ្យមានការជួបជុំពិភាក្សាគ្នារៀងរាល់៦ខែម្ដង ដើម្បីតាមដានការអនុវត្ត និងលើកទិសដៅបន្ដ ៕
ចែករំលែកព័តមាននេះ