ពលរដ្ឋកំពុងបារម្ភ មានជនម្នាក់ជិះម៉ូតូចាប់ក្មេងស្រីសួរនាំក្នុងសកម្មភាពចម្លែក
ខេត្តបាត់ដំបង ៖ រយៈពេលជាងមួយសប្ដាហ៍កន្លងមកហើយ ដែលប្រជាពលរដ្ឋក្នុងសង្កាត់មួយចំនួននៅក្នុងក្រុងបាត់ដំបង មានការភ្ញាក់ផ្អើល
ខេត្តបាត់ដំបង ៖ រយៈពេលជាងមួយសប្ដាហ៍កន្លងមកហើយ ដែលប្រជាពលរដ្ឋក្នុងសង្កាត់មួយចំនួននៅក្នុងក្រុងបាត់ដំបង មានការភ្ញាក់ផ្អើល រហូតមានអាណាព្យាបាលមួយចំនួនស្ទើរមិនហ៊ានឲ្យកូនចៅទៅសាលារៀនទៀតផង បន្ទាប់ពីមានជនមិនស្គាល់អត្តសញ្ញាណម្នាក់បង្ហាញសកម្មភាពដ៏ចម្លែកជិះម៉ូតូចូលតាមភូមិចាប់ក្មេងស្រីតូចៗសួរនាំស្ងាត់ៗជាបន្តបន្ទាប់គួរឲ្យសង្ស័យ និងធ្វើឲ្យពលរដ្ឋមួយចំនួនជិះម៉ូតូដេញតាមឃ្លាំមើលអំពីសកម្មភាពជនចម្លែកនោះទៀតផង។
បើតាមប្រភពព័ត៌មានបានឲ្យដឹងថា មានប្រជាពលរដ្ឋរស់នៅក្នុងភូមិមួយចំនួន ក្នុងសង្កាត់ក្ដុលដូនទាវ និងសង្កាត់ចម្ការសំរោង ក្នុងក្រុងបាត់ដំបង បានជួបហេតុការណ៍នេះដោយផ្ទាល់។ ប្រភពដដែលបន្តថា ជនចម្លែកនោះជាបុរសវ័យជិត៣០ឆ្នាំ ក្នុងឯកសណ្ឋានដូចភ្នាក់ងារឥណទាន ជិះម៉ូតូម៉ាកហុងដាឌ្រីមពណ៌ខ្មៅ តែពេលខ្លះស៊េរីឆ្នាំ២០០៩ និងពេលខ្លះស៊េរី២០១១។ ជាងមួយសប្ដាហ៍ហើយដែលគេប្រទះឃើញជនចម្លែកនោះ ជិះម៉ូតូចូលភូមិតាព្រូច ភូមិចុងព្រែក ភូមិអូរតានប់ ក្នុងសង្កាត់ក្ដុលដូនទាវ និងភូមិចម្ការសំរោង១ សង្កាត់ចម្ការសំរោង ក្រុងបាត់ដំបង រីឯនៅភូមិដទៃទៀតក៏មានរឿងបែបនេះដែរ។
លោក ថៃ តារារ័ត្ន អាយុ៣៣ឆ្នាំ នៅភូមិចុងព្រែក សង្កាត់ក្ដុលដូនទាវ ដែលបានជួបហេតុការណ៍ផ្ទាល់បាននិយាយថា កាលពីថ្ងៃទី២៥ កុម្ភៈ កន្លងទៅ គាត់បានឃើញជនចម្លែកនោះជិះម៉ូតូចូលក្នុងភូមិចំនួន២លើកហើយ ក្នុងឯកសណ្ឋានដូចភ្នាក់ងារឥណទាន។ លោកថា លោកបានឃើញជននោះជិះម៉ូតូឈប់ក្នុងភូមិ ហើយបក់ដៃហៅក្មេងស្រីម្នាក់មកក្បែរខ្លួន។ ឃើញសកម្មភាពបែបនេះ លោកក៏ជិះម៉ូតូទៅឈប់ទល់មុខ ហើយសួរជននោះថា តើមករកអី ជននោះម្ដងប្រាប់ថា ខ្លួនមករកបងប្អូន និងម្ដងថា ខ្លួនជាភ្នាក់ងារអង្គការ តែគ្មានប័ណ្ណសម្គាល់ខ្លួនទេ ព្រោះទើបចូលថ្មី។
លោក តារា រ័ត្ន បានបញ្ជាក់ថា ដោយឆ្លើយមិនសមហេតុផល លោកក៏និយាយគំរាមថា បើមកក្នុងបំណងមិនល្អមកលើកក្រោយប្រយ័ត្នពលរដ្ឋឃាត់ខ្លួនប្រគល់ឲ្យសមត្ថកិច្ច ទើបជននោះជិះម៉ូតូចេញបាត់ទៅ។ ដោយឡែកលោក លូន ណាត អាយុ៥០ឆ្នាំ នៅភូមិចម្ការសំរោង១ សង្កាត់ចម្ការសំរោង បាននិយាយថា នៅថ្ងៃទី២៦ កុម្ភ: ជនចម្លែកនោះបានជិះម៉ូតូមកដល់ជិតផ្ទះគាត់។ លុះឃើញកូនស្រីគាត់កំពុងដើរទៅទិញនំដល់កន្លែងស្ងាត់ ស្រាប់តែជននេះឈប់ម៉ូតូ ហើយចាប់ក្របួចកអាវកូនគាត់។
គាត់និយាយថា ភ្លាមនោះកូនស្រីគាត់បានរើបម្រះ តែអ្នកភូមិម្នាក់បានឃើញទាន់ក៏ស្រែកសួរនាំ ធ្វើឲ្យជននេះភ័យក៏ជិះម៉ូតូគេចបាត់ទៅ តែលោកមិនដឹងថា ជនចម្លែកនោះចាប់កូនស្រីគាត់ក្នុងបំណងអ្វីនោះទេ។ ប៉ុន្តែប៉ុន្មានថ្ងៃកន្លងទៅនេះមានការលេចឮតៗគ្នាថា មានមនុស្សចម្លែកជិះម៉ូតូចាប់ក្មេងវះយកក្រលៀន ទើបធ្វើឲ្យអ្នកភូមិមានការភ្ញាក់ផ្អើលយ៉ាងខ្លាំង ឥឡូវប៉ះលើកូនស្រីគាត់តែម្ដង។ ជាមួយនឹងការភ្ញាក់ផ្អើលខាងលើនេះ កុមារីឈ្មោះ ឈឿត សៃហ្វុង អាយុ១២ឆ្នាំ និងកុមារីឈ្មោះ អាន វិជ្ជរ៉ា អាយុ៦ឆ្នាំ នៅភូមិអូរទំនប់ បាននិយាយដែរថា ពួកនាងធ្លាប់ត្រូវជននោះហៅ៣លើកដែរ ហើយធ្លាប់ឲ្យលុយពួកនាង១០០០រៀលទៀតផង។
នាងបន្តថា លើកចុងក្រោយជននោះបានបក់ដៃហៅនាង ហើយចាបអង្អែលដៃនាង លុះអ្នកភូមិឃើញស្រែកសួរនាំ ស្រាប់តែជននោះជិះម៉ូតូគេចខ្លួនភ្លាមៗដែរ។ អ្នកភូមិបានបញ្ជាក់ដែរថា ក្រោយពីជនចម្លែកនោះចេញផុត ស្រាប់តែពួកនាងមានអាការ:ស្ងួតបំពង់ក ងុយដេក និងរឹងថ្គាម រហូតអាណាព្យាបាលបញ្ជូនទៅពេទ្យភ្លាមៗដែរ។ អ្នកភូមិនិយាយថា សកម្មភាពដ៏ចម្លែករបស់ជនខាងលើនេះ បានធ្វើឲ្យពលរដ្ឋភ័យខ្លាចយ៉ាងខ្លាំង ដោយគិតថា សកម្មភាពជនចម្លែកនោះអាចជាសកម្មភាពចាប់ក្មេងវះយកក្រលៀន។ ជុំវិញការភ្ញាក់ផ្អើននេះ អធិការក្រុងបាត់ដំបង លោក ប៉ាង ហៀង បានបដិសេធថា មិនមានរឿងដូចការអះអាងរបស់ប្រជាពលរដ្ឋទេ។
លោកថា កម្លាំងមូលដ្ឋានបានចុះស្រាវជ្រាវអំពីរឿងនេះ តែបើតាមព័ត៌មានដែលលោកទទូលបាន ភិនភាគជនចម្លែកនោះ គឺជាជនមិនគ្រប់ទឹក។ ប៉ុន្តែលោកបញ្ជាក់ថា រឿងនេះមិនពិតទេ តែមន្ត្រីរបស់លោកកំពុងតាមស្វែងរកជនចម្លែកនោះហើយ៕
ចែករំលែកព័តមាននេះ