រាជធានីភ្នំពេញ ៖ ស្ត្រីម្នាក់បាននិយាយបណ្ដើរ យំបណ្ដើរប្រាប់អាជ្ញាធរសង្កាត់ចោមចៅថា នាងបានទទួលរងគ្រោះដោយអំពើហិង្សាអស់រយៈពេល១ឆ្នាំកន្លងមកហើយ ដោយថ្ងៃណាក៏វាយ ថ្ងៃណាក៏ជេរពី
រាជធានីភ្នំពេញ ៖ ស្ត្រីម្នាក់បានរៀបរាប់ប្រាប់អាជ្ញាធរសង្កាត់ចោមចៅថា នាងបានទទួលរងគ្រោះដោយអំពើហិង្សានៅក្នុងគ្រួសារពីសំណាក់ប្ដីជាទីស្រលាញ់របស់នាងអស់រយៈពេល១ឆ្នាំកន្លងមកហើយ ដែលថ្ងៃណាក៏ត្រូវលោកប្ដីវាយធ្វើបាប និងជេរបញ្ចោរគ្មានលស់ពេលណាឡើយ ដោយសារតែការអត់ទ្រាំមានកំណត់នោះ ទើបពេលនេះនាងទ្រាំតទៅទៀតលែងបាន ក៏សម្រេចចិត្តថា ត្រូវតែលែងលះប្ដីកំហូចនោះចោល ព្រោះបើនៅតែបែបនេះទៀត នាងគ្មានសេចក្ដីសុខ និងសុភមង្គលឡើយ ហើយបន្ទាប់គិត និងសម្រេចចិត្តរួចហើយ នាងបានធ្វើដំណើរទៅកាន់សាលាសង្កាត់ចោមចៅ ខណ្ឌពោធិ៍សែនជ័យ កាលពីវេលាម៉ោង២និង២៥នាទីរសៀល ថ្ងៃទី១ ខែមីនា ឆ្នាំ២០១៧ ដើម្បីសុំការអន្តរាគមន៍ពីសំណាក់អាជ្ញាធរសង្កាត់តែម្ដង។
ស្ត្រីរងគ្រោះខាងលើនោះ បាននិយាយបណ្ដើរ យំបណ្ដើរប្រាប់ឲ្យអាជ្ញាធរឱ្យដឹងថា នាងមានឈ្មោះ មៀច មុំ អាយុ៣១ឆ្នាំ មុខរបរកម្មការិនីរោងចក្រ ស្នាក់នៅក្នុងភូមិអង្គកែវ សង្កាត់ចោមចៅ និងមានស្រុកកំណើតនៅក្នុងភូមិត្រពាំងជំរៅ ឃុំទួលអំពិល ស្រុកបរសេដ្ឋ ខេត្តកំពង់ស្ពឺ។ចំណែកលោកប្ដីរបស់នាងឈ្មោះ ង៉ែត សាវុធ អាយុ៣២ឆ្នាំ មុខរបររត់ម៉ូតូឌុប ស្នាក់នៅផ្ទះជួលនៅក្នុងភូមិអង្គកែវ សង្កាត់ចោមចៅ ជាមួយគ្នា និងស្រុកកំណើតនៅក្នុងភូមិព្រៃញាតិ ឃុំព្រៃញាតិ ស្រុកគងពិសី ខេត្តកំពង់ស្ពឺ។
ស្ត្រីនោះបានបន្តថា នាងនិងប្ដីបានរៀបការជាមួយគ្នាច្រើនឆ្នាំមកហើយ ប៉ុន្តែមិនបានចុះសំបុត្រអាពាហ៍ពិពាហ៍ជាមួយគ្នានោះឡើយ ហើយការចាប់ដៃគ្នាជាប្ដីប្រពន្ធ គឺមុនដំបូងឡើយមានសេចក្ដីសុខ និងសុភមង្គលណាស់ មិនដែលមានបញ្ហាអ្វីកើតឡើងនោះឡើយ មិនតែប៉ុណ្ណោះចំណងដៃនៃអាពាហ៍ពិពាហ៍របស់ពួកនាង គឺបានកូនស្រីម្នាក់ជាទីស្រលាញ់ម្នាក់នៅក្នុងបន្ទុកគ្រួសារផងដែរ។ ប្ដីមានមុខរបរជាអ្នករត់ម៉ូតូឌុប ចំណែកឯនាងមានមុខរបរជាកម្ម ការិនីរោងចក្រកាត់ដេរ ហើយនៅពេលទំនេរបានអ៊ុតសក់ឲ្យគេផងដែរ មិនដែលនៅទំនេរនោះឡើយ គឺខំរួមគ្នារកប្រាក់សម្រាប់ផ្គត់ផ្គង់ជីវភាពនៅក្នុងគ្រួសារ ហើយនាងស្មោះត្រង់ជាមួយប្ដីខ្លាំងណាស់ មិនដែលថា មានគំនិតគិតក្បត់ប្ដីនោះឡើយ។
ប្រភពដដែលបានបន្តថា សេចក្ដីសុខមានតែមួយរយៈពេលប៉ុណ្ណោះ ប៉ុន្តែអ្វីដែលនឹកស្មានមិនដល់នោះ គឺនៅរយៈពេលប្រហែលជាង១ឆ្នាំចុងក្រោយនេះ មានភាពរកាំរកូសកើតឡើង នៅក្នុងរង្វង់គ្រួសារ ដោយនាងធ្វើអ្វីក៏មិនត្រូវចិត្តលោកប្ដីដែរ លោកប្ដីតែងតែបានរករឿងគ្មានហេតុផល រហូតឈានដល់ការវាយតប់ធ្វើបាបនាងជាបន្តបន្ទាប់។ ទោះជាបែបណា នាងនៅតែស្រលាញ់ប្ដី ហើយក៏ចេះតែស៊ូទ្រាំជានិច្ច ព្រោះយល់ថា ជីវិតគឺជាការតស៊ូ និងគិតថា សូម្បីតែចានក្នុងរាវ ក៏តែងតែប៉ះទង្គិចគ្នាមិនខាន ប៉ុន្តែទីបំផុតការអត់ធ្មត់ធ្វើជាមនុស្សគ មនុស្សថ្លង់ គឺមានកំណត់ដែលការមិនតបតយូរៗទៅបានធ្វើឲ្យប្ដីបានចិត្តកាន់តែខ្លាំង រករឿងវាយធ្វើបាប នាងគ្មានល្ហែ។
នាងខាងលើបានបន្តទៀតថា នៅចុងក្រោយនេះ បានប្ដីបានចាប់វាយច្របាច់កនាងស្ទើរស្លាប់ស្ទើររស់ ហើយក៏បានធ្វើឲ្យនាងចាប់ផ្ដើមអស់ចិត្ត អស់និស្ស័យស្នេហ៍ជាមួយនឹងប្ដីនោះតទៅទៀតដែរ នាងសម្រេចចិត្តថា ត្រូវតែលែងគាត់ចោល ទើបបានសុខ បើមិនដូច្នេះទេ មានតែថ្ងៃស្លាប់ប៉ុណ្ណោះ ព្រោះពេលនេះលោកប្ដីហាក់ គ្មានមេត្តានៅក្នុងខ្លួនបន្តិចសោះឡើយ។ មានតែការវាយធ្វើបាប ជេរបញ្ចោរឥតសំចៃមាត់មកលើរូបនាងតែប៉ុណ្ណោះ គ្មានសុភមង្គលដូចពេលមុនទៀតឡើយ ហើយបន្ទាប់ពីគិត និងសម្រេចចិត្តដើរតាមផ្លូវខាងលើ ទើបនាងធ្វើដំណើរទៅកាន់សាលាសង្កាត់ចោមចៅ ដើម្បីសុំការអន្តរាគមន៍ពីអាជ្ញាធរសង្កាត់ក្នុងការលែងលះប្ដីនោះ។ ប៉ុន្តែលោកប្ដីនាងវិញប្រាប់ថា មិនលែងនាងដាច់ខាត និងបានធ្វើដំណើរទៅកាន់ស្រុកកំណើតបាត់ហើយ រង់ចាំនាងទៅតាមក្រោយសម្របសម្រួលគ្នា។
ទាក់ទិនទៅនឹងស្ត្រីខាងលើ អាជ្ញាធរសង្កាត់ចោមចៅបាននិយាយថា ក៏មានការអាណិតអាសូរនាងណាស់ ប៉ុន្តែអាជ្ញាធរមិនអាចទទួលដោះស្រាយបានឡើយ ព្រោះអ្នកទាំងពីរគ្រាន់តែជាអ្នកបញ្ញើរក្អែក ស្នាក់នៅបណ្ដោះអាសន្ននៅក្នុងសង្កាត់ចោមចៅតែប៉ុណ្ណោះ មិនមែនជាអ្នកស្នាក់នៅអចិន្ត្រៃយ៍ ហើយកាលពីពួកគេ រៀបការគឺនៅឯស្រុកកំណើត ដូច្នេះអាជ្ញាធរបានត្រឹមទប់ស្កាត់កុំឲ្យមានអំពើហិង្សាតទៅទៀត។ ចំណែកការសម្របសម្រួល ឬបែបណានោះ គឺទាល់តែពួកគេនាំគ្នាទៅរកអាជ្ញាធរឃុំ ដែលពួកគេរស់នៅ និងសុំច្បាប់ការនោះវិញ ម្យ៉ាងការលែងលះគ្នារវាងប្ដី និងប្រពន្ធ គឺមានតែតុលាការទ ទើប អាចសម្រេចបាន៕
ចែករំលែកព័តមាននេះ