ខេត្តកំពង់ចាម ៖ ទីតាំងអាជីវកម្មបូមខ្សាច់១កន្លែងស្ថិតនៅភូមិខ្សាច់ស ឃុំពាមជីកង ស្រុកកងមាសបានបង្កសម្លេងថ្លង់ដល់ទៅប្រជាពលរដ្ឋដែលពិបាកនឹងដេកពួនហើយក៏មានក្តីកង្វល់ខ្លាចនឹងបាក់ច្រាំងទន្លេមេគង្គ
ខេត្តកំពង់ចាម ៖ ទីតាំងអាជីវកម្មបូមខ្សាច់១កន្លែងស្ថិតនៅភូមិខ្សាច់ស ឃុំពាមជីកង ស្រុកកងមាសបានបង្កសម្លេងថ្លង់ដល់ទៅប្រជាពលរដ្ឋដែលពិបាកនឹងដេកពួនហើយក៏មានក្តីកង្វល់ខ្លាចនឹងបាក់ច្រាំងទន្លេមេគង្គរួមទាំងផ្ទះសម្បែងផងដែរ ។
លោកតា តុលឡោះ ស្មាន អាយុ៨២ឆ្នាំ មានប្រសាសន៏ឲ្យដឹងនៅព្រឹកថ្ងៃទី១ មីនា ឆ្នាំ២០១៧ ថា ផ្ទះឈើរបស់គាត់ត្រូវបានធ្វើឡើងចាប់តាំងពីសម័យសង្គមរាស្ត្រនិយមមកម្ល៉េះដោយកូនចៅបានរស់នៅទទួលបាននូវសេចក្តីសុខសាន្តមិនដែលមានហេតុការណ៏អ្វីកើតឡើងនោះទេ ។ តែនៅមិនឆ្ងាយប៉ុន្មានពីផ្ទះរបស់គាត់មានអាជីវកម្មបូមខ្សាច់១កន្លែងដោយបានដំណើរការជាច្រើនឆ្នាំមកហើយថែមទាំងឮសូរសម្លេងថ្លង់ថែមទៀត នៅពេលដែលបូមខ្សាច់ចេញពីកាណូត ឡើងមកដាក់លើគោកម្តងៗនោះ ។
លោកតា តុលឡោះ ស្មាន មានប្រសាសន៏បន្តថា ស្រាប់តែមកដល់ឆ្នាំ២០១៦កន្លងទៅ បែរជាដីនៅក្រោមផ្ទះរបស់គាត់ជាប់ទន្លេមេគង្គបានប្រេះហែកជាច្រើនម៉ែត្រគួរឲ្យព្រួយបារម្ភ ខ្លាចតែរលំផ្ទះនោះទេគាត់មិនដឹងថាតើការប្រេះនោះដោយសារតែមូលហេតុអ្វីដែរ? ហើយក៏បានរាយការណ៏ប្រាប់ទៅលោកមេភូមិឲ្យមកពិនិត្យមើលក៏មិនបានបញ្ជាក់ថាការប្រេះនេះទេ ។
លោកតាថា ការរស់នៅជាច្រើនឆ្នាំមកហើយមិនដែលអីតែគ្រាន់តែដឹងថា ចាប់តាំងពីពេលដែលមានការបូមខ្សាច់នៅទន្លេមេគង្គក្បែរកោះក៏កើតហេតុបែបនេះតែម្តងកន្លែងបូមខ្សាច់នោះថែមទាំងមានសម្លេងថ្លង់ រំខានដល់ការរស់នៅរបស់ប្រជាពលរដ្ឋក្បែរនោះផងដែរ ។ ស្មាមប្រេះដីនោះគាត់បានទៅកាប់ដីនៅមាត់ទន្លេ មកចាក់បំពេញបន្តិចម្តងៗរហូតចាក់ពេញវិញ ។
ស្ត្រីឈ្មោះ ធីម ទីណា អាយុ៦១ឆ្នាំ ប្រាប់ឲ្យដឹងថា ដីនៅក្រោយផ្ទះរបស់គាត់ក៏ត្រូវបានប្រេះដែរតែមិនដឹងថាតើការប្រេះនោះដោយសារអ្វីទេបានបង្កឲ្យមានក្តីកង្វល់ផងដែរ ។ក្រោយមកគាត់បានចាក់សំរាម និងដីបំពេញជិតវិញតែរាល់ថ្ងៃនូវតែព្រួយរឿងម៉ាស៊ីនបូមខ្សាច់ មានសម្លេងថ្លង់ពិបាកនឹងដេកពួនប្រជាពលរដ្ឋធ្លាប់បានប្រាប់ដល់ថៅកែខ្សាច់នោះតែគាត់មិនស្តាប់និងធ្វើតាមសំណូមពរប្រជាជនទេ ។ តាមពិតទៅប្រជាពលរដ្ឋមួយភូមិកំពុងកង្វល់ខ្លាំងណាស់ ៕
ចែករំលែកព័តមាននេះ