រាជធានីភ្នំពេញ ៖ ស្នូរសម្លេងផ្ទុះអាវុធលាន់ឮកក្រើកផ្ទួនៗគ្នាចំនួន៣គ្រាប់បានផ្ទុះឡើងទាំងកណ្តាលយប់អធ្រាត្រនៅក្នុងខណ្ឌចំការមន ដែលបានបង្កឱ្យមានការភ្ញាក់ផ្អើល និងភ័យខ្លាចយ៉ាងខ្លាំង
រាជធានីភ្នំពេញ ៖ ស្នូរសម្លេងផ្ទុះអាវុធលាន់ឮកក្រើកផ្ទួនៗគ្នាចំនួន៣គ្រាប់បានផ្ទុះឡើងទាំងកណ្តាលយប់អធ្រាត្រនៅក្នុងខណ្ឌចំការមន ដែលបានបង្កឱ្យមានការភ្ញាក់ផ្អើល និងភ័យខ្លាចយ៉ាងខ្លាំងទៅដល់ប្រជាពលរដ្ឋរស់នៅក្នុងមូលដ្ឋាន ក្រោយពីក្រុមអ្នកផឹកស៊ីមួយក្រុមបានទំនាស់ពាក្យសំដីក្នុងវង់ផឹកស៊ីនោះ ។ ករណីផ្ទុះអាវុធនេះបានកើតឡើងកាលពីវេលាម៉ោង១១និង៤៥នាទីយប់ ថ្ងៃទី២៨ កុម្ភៈ ឆ្នាំ២០១៧ នៅខាងមុខផ្ទះបោកអ៊ុតមួយកន្លែង ផ្លូវលេខ១០៥(ផ្លូវមាត់ប្រឡាយ)ក្នុងសង្កាត់បឹងកេងកងទី៣ ខណ្ឌចំការមន ។
តាមប្រភពព័ត៌មានពីប្រជាពលរដ្ឋម្នាក់បានប្រាប់ឱ្យដឹងថា មុនពេលកើតហតុគេបានឃើញមានមនុស្សប្រុស-ស្រីចំនួនពី៥ទៅ៦នាក់បាននាំគ្នាផឹកស៊ីនៅក្នុងផ្ទះបោកអ៊ុតសំលៀកបំពាក់ខាងលើតាំងពីពេលល្ងាចមកម្ល៉េះ ដោយមានសម្លេងនិយាយស្រែកហោកញ្ជ្រៀវយ៉ាងទ្រហឹងអ៊ឺងកងធ្វើឱ្យមានការរំខាងដល់អ្នកជិតខាងយ៉ាងខ្លាំងផងដែរ ។ រហូតមកដល់កណ្តាលអធ្រាត្រទំនងជាមានទំនាស់ពាក្យសំដីរវាងគ្នា និងគ្នានោះ ក៏ស្រាប់តែបានឮសម្លេងផ្ទះអាវុធនៅក្នុងផ្ទះចំនួន២គ្រាប់ ហើយបន្តិចក្រោយមកក៏បានឃើញបុរសម្នាក់ស្លៀកពាក់ស៊ីវិលដើរចេញមកខាងក្រៅបាញ់មួយគ្រាប់ឡើងលើថែមទៀត រួចឡើងជិះម៉ូតូចេញទៅបាត់ស្រមោលតែម្តង ។
តាមប្រភពដដែលបានប្រាប់បន្តទៀតថា ការផ្ទុះអាវុធផ្ទួនៗគ្នាលាន់ឮកក្រើកស្បៃរាត្រីនេះដែរបានធ្វើឱ្យពួកគាត់មានការភ័យខ្លាច និងតក់ស្លុតយ៉ាងខ្លាំង ជាពិសេសគឺសុវត្ថិភាពការស់នៅរបស់ពួកគាត់ដែលជាប្រជាពលរដ្ឋស្លូតត្រង់នោះតែម្តង ។
ពាក់ព័ន្ធទៅនឹងករណីបាញ់បោះសេរីជាច្រើនគ្រាប់ទាំងកណ្តាលយប់អធ្រាត្របង្កឱ្យមានការភ័យខ្លាចទៅដល់ប្រជាពលរដ្ឋនៅក្នុងមូលដ្ឋានខណ្ឌចំការមននេះដែរ អ្នកយកព័ត៌មានកោះសន្តិភាពបានធ្វើការទំនាក់ទំនងតាមទូរស័ព្ទទៅកាន់លោកមេប៉ុស្តិ៍បឹងកេងកងទី៣ដែរតែលោកតម្រូវឱ្យទៅរង់ចាំជួបមន្ត្រីនគរបាលម្នាក់ទៀតដោយបានប្រាប់ថា «លោកជាប់រវល់ដេកបន្តិច» ៕
ចែករំលែកព័តមាននេះ