រាជធានីភ្នំពេញ ៖ សៀវភៅអប់រំផ្នែកហិរញ្ញវត្ថុ «តោះ! និយាយពីលុយ» ជាឯកសារអំណានបន្ថែមសម្រាប់កុមារដែលមានអាយុពី៨ដល់១២ឆ្នាំបានយល់ដឹងពីលុយកាក់ និងមានគោលបំណងចង់ឱ្យមានការផ្លាស់ប្តូរទម្លាប់
រាជធានីភ្នំពេញ ៖ សៀវភៅអប់រំផ្នែកហិរញ្ញវត្ថុ «តោះ! និយាយពីលុយ» ជាឯកសារអំណានបន្ថែមសម្រាប់កុមារដែលមានអាយុពី៨ដល់១២ឆ្នាំបានយល់ដឹងពីលុយកាក់ និងមានគោលបំណងចង់ឱ្យមានការផ្លាស់ប្តូរទម្លាប់អ្នកប្រើប្រាស់សេវាធនាគារ ពិសេសប្រជាពលរដ្ឋដែលមានចំណូលទាប និងងាយរងគ្រោះចេះគ្រប់គ្រងលុយកាក់ ។ នេះបើតាមអគ្គនាយកបច្ចេកទេសធនាគារជាតិនៃកម្ពុជា បានលើកឡើង ។
ថ្លែងក្នុងពិធីដាក់ឱ្យប្រើប្រាស់ជាផ្លូវការសៀវភៅនេះកាលពីព្រឹកថ្ងៃទី២៨ កុម្ភៈ នៅ សាលាបឋមសិក្សាភ្នំដូនពេញ លោកជំទាវ ជា សិរី អគ្គនាយកបច្ចេកទេសធនាគារជាតិនៃកម្ពុជា មានប្រសាសន៍ថា ៖ « សៀវភៅអប់រំផ្នែកហិរញ្ញវត្ថុនេះ រៀបចំឡើងផ្អែកលើសារអប់រំរបស់យុទ្ធនាការ «តោះ! និយាយពីលុយ»។ សៀវភៅនេះ គឺសម្រាប់យើងទាំងអស់គ្នា ព្រោះគោលបំណងរបស់យើង គឺចង់ផ្លាស់ប្តូរទម្លាប់របស់អ្នកប្រើប្រាស់សេវាធនាគារ ពិសេស ប្រជាជនមានចំណូលទាប និងងាយរងគ្រោះឲ្យចេះគ្រប់គ្រងលុយកាក់ និងមានសេចក្តីក្លាហានក្នុងការលើកយកបញ្ហាលុយមកពិភាក្សា ។ ហេតុដូច្នេះទើបយើងយល់ថា អ្នកដែលអាចធ្វើឲ្យប្រជាជនទាំងនោះជឿជាក់ គឺកូនៗរបស់គាត់ គឺក្មួយៗកុមាររបស់យើង » ។
លោកជំទាវបន្ដថា ក្រសួងអប់រំ យុវជន និងកីឡា បានអនុញ្ញាតឲ្យធនាគារជាតិនៃកម្ពុជាចែកសៀវភៅនេះឲ្យបានទូលំទូលាយនៅតាមសាលាចំណេះទូទៅ ពិសេសសាលាបឋមសិក្សាទូទាំងប្រទេស ។ តាមតួលេខប៉ាន់ស្មានដែលផ្តល់ដោយក្រសួងអប់រំ គឺត្រូវការសៀវភៅនេះប្រមាណ១០ម៉ឺនក្បាល។ លោកជំទាវថា ៖ « បច្ចុប្បន្ន តាមរយៈការឧបត្ថម្ភដែលយើងទទួលបានអាចបោះពុម្ពសៀវភៅជាង២ម៉ឺនក្បាល មានន័យថា យើងនៅត្រូវការសៀវភៅនេះជាង៧ម៉ឺនក្បាលទៀត ឬអាចច្រើនជាងនេះ » ។
លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា មានប្រសាសន៍ថា ការអប់រំផ្នែកហិរញ្ញវត្ថុមានសារសំខាន់ក្នុងការអភិវឌ្ឍសង្គមជាតិ ព្រោះការយល់ច្បាស់ពីផលិតផលហិរញ្ញវត្ថុ ការជ្រើសរើស និងប្រើប្រាស់ផលិតផលទាំងនោះបានត្រឹមត្រូវ អាចការពារអតិថិជនឱ្យរួចផុតពីការកេងបន្លំ និងបំណុលវ័ណ្ឌក ។ ហេតុនេះ ធនាគារជាតិនៃកម្ពុជាបាននិងកំពុងអនុវត្តគម្រោងអប់រំផ្នែកហិរញ្ញវត្ថុជាច្រើន ។
កន្លងមក ធនាគារជាតិនៃកម្ពុជា សហការជាមួយអង្គការ Good Return ធ្លាប់ប្រកាសបើកយុទ្ធនាការមួយឈ្មោះថា «តោះ! និយាយពីលុយ» មានរយៈពេល១២សប្តាហ៍ ចាប់ផ្តើមពីថ្ងៃទី១៤ ខែមីនា ឆ្នាំ២០១៦ និងបញ្ចប់កាលពីថ្ងៃទី៤ ខែមិថុនា ឆ្នាំ២០១៦ កន្លងមក ។
ទាក់ទងនឹងយុទ្ធនាការនេះ មានគោលបំណងផ្លាស់ប្តូរឥរិយាបថហិរញ្ញវត្ថុ និងពង្រឹងការប្រើប្រាស់សិទ្ធិរបស់គ្រួសារ ព្រមទាំងសហគមន៍ដែលមានចំណូលទាបនិងងាយរងគ្រោះ ក្នុងនោះ ក្រុមគោលដៅ គឺជាយុវជនមានអាយុចាប់ពី១៥ឆ្នាំឡើងទៅ ដែលរស់នៅតាមទីក្រុងនិងជនបទ តាមរយៈប្រធានបទសំខាន់ៗ៤ គឺ ៖ ១-ជ្រើសរើស, ២-ប្រើប្រាស់, ៣-តថ្លៃ និង៤-ទំនាក់ទំនង ។ យុទ្ធនាការនេះជំរុញយុវជនឲ្យចាប់ផ្តើមពិភាក្សាអំពីលុយជាមួយក្រុមគ្រួសារ និងមិត្តភក្តិ ដើម្បីឲ្យពួកគេអាចសម្រេចចិត្តបានប្រសើរជាងមុនក្នុងការប្រើប្រាស់ ឬចាត់ចែងលុយកាក់ទៅអនាគត ។ លើសពីនេះ មានសារអប់រំថតជាវីដេអូខ្លីចំនួន៦រឿង រួមមាន ៖ ១-សន្សំ, ២-ដើរត, ៣-អត់បញ្ហា, ៤-ត្រីមួយកំណាត់, ៥-អ្នកដើរផ្សារ និង៦-ខ្សឹបខ្សៀវ ដើម្បីឲ្យយុវជនឈ្វេងយល់ពីការជ្រើសរើស និងប្រើប្រាស់ផលិតផលហិរញ្ញវត្ថុ រៀនតថ្លៃដើម្បីទទួលបានសេវាហិរញ្ញវត្ថុទៅតាមតម្រូវការ និងបង្កើតទំនាក់ទំនងល្អជាមួយអ្នកផ្តល់សេវាហិរញ្ញវត្ថុ ៕
ចែករំលែកព័តមាននេះ