ខេត្ដកំពត ៖ កំពតគឺជាខេត្ដមួយជាប់ឆ្នេរសមុទ្រមិនសូវព្រួយបារម្ភទេពីរឿងខ្វះទឹកភ្លៀងធ្វើស្រែចំការ ប៉ុន្ដែនៅឆ្នាំ២០១០ នេះការប្រែប្រួលអាកាសធាតុចម្លែកបន្ទាប់ ពីក្ដៅខ្លាំងគ្មានភ្លៀងធ្លាក់មួយមេសោះធ្វើឱ្យប្រជាកសិករខ្វល់ខ្វាយពីរឿងគ្មានទឹកធ្វើស្រែចំការ។ គ្រោះរាំងស្ងួតដែលអូសបន្លាយមកដល់ខែមិថុនានេះធ្វើឱ្យកសិករនៅតែមិនទាន់បានសាបព្រោះទេ ហើយអាកាសធាតុនៅតែក្ដៅខ្លាំងនោះ ទើបប្រជាពលរដ្ឋនៅឃុំកន្ថោរខាងជើងស្រុកកំពង់ត្រាច និងប្រជាពលរដ្ឋនៅឃុំស្ដេចគង់ខាងលិច ស្រុកបន្ទាយមាសនាំគ្នារៀបចំធ្វើពិធីនិមន្ដព្រះសង្ឃចំរើនព្រះបរិត្ដ និងប្រគំភ្លេងពិណពាទ្យថ្វាយអារក្សអ្នកតាបន់ស្រន់សុំសេចក្ដីសុខ និងសុំម្ចាស់ទឹកម្ចាស់ដីព្រៃព្រឹក្សាឱ្យមានភ្លៀងធ្លាក់ងាយស្រួលដល់អ្នកស្រុកប្រកបរបរកសិកម្ម ។
លោកតាព្រហ្ម យិន អាយុ៦៨ឆ្នាំ ជាអ្នករៀបចំពិធីថ្វាយអារក្សអ្នកតាសុំទឹកភ្លៀងបានមានប្រសាសន៍ថា ប្រជាពលរដ្ឋចំនួន២ភូមិនៅឃុំផ្សេងៗគ្នាបាននាំគ្នាធ្វើពិធីបួង សួងសុំទឹកភ្លៀងដោយនិមន្ដព្រះសង្ឃចំរើនព្រះបរិត្ដ និងប្រគំភ្លេងថ្វាយអារក្សអ្នកតានាមជីកអន្ទង់ ។ អ្នកភូមិតែងតែធ្វើពិធីនេះមិនដែលខានឡើយ ដើម្បីសុំសេចក្ដីសុខ តែដោយឡែកឆ្នាំនេះចូលដល់រដូវវស្សាទៅហើយគ្មានភ្លៀងធ្លាក់សោះធ្វើឱ្យអ្នកភូមិមិនទាន់បានសាបព្រោះក៏ផ្ដួចផ្ដើមនាំគ្នាធ្វើពិធីបួងសួងសុំសេចក្ដីសុខនិងលេងភ្លេងថ្វាយអារក្សអ្នកតាសុំឱ្យមានភ្លៀងធ្លាក់។
លោកតាព្រហ្ម យិន បន្ដថា ការលេងភ្លេងថ្វាយអារក្សនេះក៏មានអ្នកស្នងរូប តាជីកអន្ទង់ចូលសណ្ឋិតដែរ ។ អ្នកភូមិដែលចូលរួមបានសួរអ្នកស្នងរូបថាតើថ្ងៃណា ទើបភ្លៀងធ្លាក់ ? ហើយមូលហេតុអ្វីបានជាមិនមានភ្លៀង ។ អ្នកឆ្លើយចេះតែឆ្លើយអ្នកសួរចេះតែសួរ ដែលនេះជាទំនៀមទំលាប់មួយរបស់អ្នកស្រុក ។
លោកហេង វន្ថា អភិបាលរងខេត្ដកំពត មានប្រសាសន៍ប្រាប់កោះសន្ដិភាពថា ខេត្ដកំពតជួបគ្រោះរាំងស្ងួតដូច្នេះមិនទាន់មានប្រជាពលរដ្ឋណាបានសាបព្រោះទេ ។ ការរាំងស្ងួតនេះធ្វើឱ្យអ្នកផលិតអំបិលមានចំនួនកើនឡើង តែអ្នកធ្វើស្រែចំការកំពុងខ្វល់ខ្វាយពីការបង្កបង្កើនផល ៕
ចែករំលែកព័តមាននេះ