សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញប្រារព្ធពិធីបដិសណ្ឋារកិច្ចផ្លូវការជាមួយឯកឧត្តម Miguel Diaz -Canel ប្រធានាធិបតីនៃសាធារណរដ្ឋគុយបា។ បន្ទាប់ពី
ប្រទេសគុយបា ៖ នៅព្រឹកថ្ងៃទី២៤ ខែកញ្ញា ឆ្នាំ២០២២ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញប្រារព្ធពិធីបដិសណ្ឋារកិច្ចផ្លូវការជាមួយឯកឧត្តម Miguel Diaz -Canel ប្រធានាធិបតីនៃសាធារណរដ្ឋគុយបា។ បន្ទាប់ពីប្រារព្ធពិធីបដិសណ្ឋារកិច្ចផ្លូវការរួចមក ប្រមុខរដ្ឋាភិបាលនៃប្រទេសទាំងពីរ ក៏មានជំនួបកំពូលដែលនៅក្នុងជំនួបនោះ សម្ដេចតេជោនាយករដ្ឋមន្ត្រី ហ៊ុន សែន បានមានប្រសាសន៍ថា យើងមានទំនាក់ទំនងល្អរវាងប្រទេសទាំងពីរ ជាពិសេសក្រោយពេលបដិវត្តន៍នៃប្រទេសគុយបា។
ជាការពិតយើងពិតជាមានភាពរឹងមាំ និងចំណុចខ្លាំងនៃទំនាក់ទំនងរវាងប្រទេសយើងទាំងពីរ។ ទំនាក់ទំនងរបស់យើងបានចាប់ផ្ដើម ជាពិសេសរវាង ឯកឧត្តម ហ្វី ដែលកាស្ត្រូ និងអតីតព្រះមហាក្សត្រសម្ដេច នរោត្តម សីហនុ ព្រះបរមរតនកោដ្ឋ។ ក្នុងន័យនេះ យើងនឹងអបអរសាទរនៅក្នុងខែតុលាខាងមុខ នៅខួប១០០ឆ្នាំ នៃព្រះជន្មាយុព្រះករុណាសម្ដេចឪ។
សម្ដេចតេជោនាយករដ្ឋមន្ត្រី ក៏បានគូសបញ្ជាក់ថា ភាគច្រើននៃថ្នាក់ដឹកនាំរបស់យើងពេលនេះ កើតក្រោយបដិវត្តន៍ប្រទេសគុយបា ហើយបានដឹងក្តីជាពិសេសបានស្ដាប់ និងរៀនសូត្រអំពីដំណើរការនៃការស្វែងរកសេរីភាពដូចបណ្ដាប្រទេសមួយចំនួនដូចជា ប្រទេសឡាវ កម្ពុជានិងវៀតណាមផងដែរ។
ឯកឧត្តម Miguel Diaz-Canel ប្រធានាធិបតីគុយបា មានប្រសាសន៍គូសបញ្ជាក់ថា ប្រទេសកម្ពុជា និងគុយបា បានគាំទ្រការស្វែងរកសន្តិភាព ក៏ដូចជាយុត្តិធម៌នៅលើពិភពលោកនេះ។នេះគឺជាមូលដ្ឋាននៃទំនាក់ទំនងប្រទេសគុយបា និងកម្ពុជា។ ហើយអ្វីដែលធ្វើឲ្យទំនាក់ទំនងកើតឡើងថ្វីត្បិតភូមិសាស្ត្រនៅឆ្ងាយពីគ្នាមែន ប៉ុន្តែមិត្តភាពប្រទេសទាំងពីរមានយូរអង្វែងមកហើយ។ មិត្តភាពនេះ បានរឹងមាំ និងមានសាមគ្គីខ្ពស់ផងដែរ។ នេះជាហេតុផលដែលនាំឲ្យមានទស្សនកិច្ចរបស់សម្ដេចតេជោនាយករដ្ឋមន្ត្រីនៅគុយបា ដើម្បីពង្រឹងឯករាជ្យភាពអធិបតេយ្យភាព និងបូរណភាពទឹកដីរបស់យើង។
ឯកឧត្តមប្រធានាធិបតីក៏បានមានប្រសាសន៍ថា គុយបា ទទួលស្គាល់ភាពក្លាហានរបស់គណបក្សប្រជាជនកម្ពុជា ក៏ដូចជារាជរដ្ឋាភិបាល និងប្រជាជនកម្ពុជាក្នុងការប្រយុទ្ធ ដើម្បីការពារឯករាជ្យភាព និងអធិបតីភាពរបស់កម្ពុជា។ យើងនឹងបន្តពង្រឹងទំនាក់ទំនងទ្វេរភាគី ជាពិសេសការជំរុញពាណិជ្ជកម្មសេដ្ឋកិច្ចរវាងប្រទេសទាំងពីរ។
ទស្សនកិច្ចរបស់សម្ដេចតេជោនាយករដ្ឋមន្ត្រី ឆ្លុះបញ្ចាំងយ៉ាងសំខាន់ជាប្រវត្តិសាស្ត្រនៃទំនាក់ទំនងរវាងប្រទេសទាំងពីរផងដែរ និងគឺជាសាក្សីមួយដ៏សំខាន់នៃការបន្តពង្រឹងទំនាក់ទំនងទ្វេភាគីរបស់ប្រទេសយើងទាំងពីរ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសផ្តល់អង្ករចំនួន ៦ពាន់តោនដល់រដ្ឋាភិបាល និងប្រជាជនគុយបា សម្តេចតេជោបានឱ្យដឹងថា អង្ករ ៦ពាន់តោននេះ មាន ៣ពាន់តោន ជាជំនួយរបស់រាជរដ្ឋាភិបាល និងប្រជាជនកម្ពុជា ហើយ ៣ពាន់តោនទៀតជាជំនួយរបស់វិស័យឯកជន។
សម្តេចតេជោ ហ៊ុន សែន បានគូសបញ្ជាក់ថា អង្ករ៦ពាន់តោននេះ នឹងដឹកចេញពីកម្ពុជានៅខែតុលា ហើយដឹកដល់ប្រទេសគុយបា នៅក្នុងខែធ្នូ។
ឯកឧត្តម ប្រធានាធិបតីគុយបា ក៏បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ប្រជាជន និងវិស័យឯកជនរបស់កម្ពុជា សម្រាប់ការផ្តល់ជំនួយជាអង្ករនេះ។
ហើយនៅក្នុងជំនួបនេះ សម្តេចតេជោ ហ៊ុន សែន និងឯកឧត្តម ប្រធានាធិបតីគុយបា បានជជែកគ្នាពីការរៀបចំឱ្យមានទស្សនកិច្ចរបស់ក្រុមអ្នកបច្ចេកទេសផ្នែកកសិកម្ម ដើម្បីសិក្សាស្រាវជ្រាវផ្នែកកសិកម្មនៅក្នុងប្រទេសកម្ពុជា ជាពិសេសលើដំណាំស្រូវ។
សម្តេចតេជោ បានបញ្ជាក់ថា កម្ពុជាជា រ៉ាប់រងរាល់ការចំណាយលើការសិក្សាស្រាវជ្រាវនេះ។ សម្តេចតេជោនាយករដ្ឋមន្ត្រី បានចាត់ទុកការសិក្សាស្រាវជ្រាវលើវិស័យកសិកម្ម គឺជាចំណែកមួយសម្រាប់ធានាដល់សន្តិសុខស្បៀងរវាងកម្ពុជា និងប្រទេសគុយបា៕
ចែករំលែកព័តមាននេះ