រាជធានីភ្នំពេញ ៖ ការប្រកួតប្រដាល់អន្តរជាតិនៅលើសង្វៀនទូរទស្សន៍អាស៊ីអាគ្នេយ៍ដែលរៀបចំឡើងដោយស្រាបៀរកម្ពុជាកាលពីរសៀលថ្ងៃទី២៦ កុម្ភៈ កីឡាករថៃឈ្មោះធីង ភូថុន ដែលប្រកួតជាមួយកីឡាករកម្ពុជាឈ្មោះចាន់ ស៊ីណាត មកពីក្លិបនិរោធមានជ័យនោះ ត្រូវបានអ្នកទស្សនាម្នាក់ដែលងប់នឹងការប្រកួតខ្លាំងពេកគប់មួយដបទឹកបរិសុទ្ធដែលមានទឹកពេញចំកញ្ចឹងកបណ្ដាលឲ្យសន្លប់នៅក្នុងទឹកទី៣ ។
ដោយសារតែកើតមានបញ្ហាបែបនេះ ទើបការប្រកួតគូនេះ ត្រូវបានផ្អាកត្រឹមទឹកទី៣នោះ ដោយមិនប្រកាសលទ្ធផលឡើយ ។ ចំណែកជនដៃដល់ត្រូវបានសមត្ថកិច្ចឃាត់ខ្លួននាំទៅសាកសួរភ្លាមៗនិងបានសារភាពថា គាត់ពិតជាបានគប់មែន ដោយសារតែខឹងនឹងអាជ្ញាកណ្ដាល គឺលោកឡុង ស៊ីលីន លម្អៀងកាន់ជើងកីឡាករថៃពេក ។
លោក រាជ សុផែន ដែលជាប្រធានគណៈវិនិច្ឆ័យប្រចាំសង្វៀនទូរទស្សន៍អាស៊ីអាគ្នេយ៍បានចាត់ទុកថា នេះជាការបង្កហេតុខុសទំនងរបស់ជនដៃដល់រូបនេះ ខណៈជនដៃដល់បានបន្ទោសលោក ឡុង ស៊ីលីន ថាកាន់ជើងកីឡាករថៃ ។
ជាក់ស្ដែងនៅក្នុងទឹកទី២ និងទី៣ គេឃើញចាន់ ស៊ីណាត មានប្រៀបជាងកីឡាករថៃ ធ្វើឱ្យអ្នកគាំទ្រមានទឹកមាត់លេបមិនតិចទេ នៅពេលឃើញលោកវាយម៉ាត់ចូលមុខគូប្រកួតពេញៗស្ទើរតែធ្វើឱ្យកីឡាករថៃរូបនោះទប់ខ្លួនលែងចង់ជាប់ទៅហើយ តែលោកអាជ្ញាកណ្ដាលមិនរាប់ទេ បានត្រឹមតែចាប់ឃាត់រួចអនុញ្ញាតឱ្យប្រកួតបន្តទៀត ទើបកើតមានការខឹងសម្បាពីសំណាក់ជនដៃដល់យកទឹកបរិសុទ្ធ១ដបគប់តែម្ដង ។
ទោះបីយ៉ាងណាបើតាមអ្នកជំនាញខាងប្រដាល់ថា អាជ្ញាកណ្ដាលមិនបានកាន់ជើងកីឡាករថៃដូចការចោទប្រកាន់នោះទេ ។ បើទោះជាចាន់ ស៊ីណាត វាយចូលមុខគូប្រកួតជាច្រើនដៃមែនតែកម្លាំងដៃដែលវាយចេញមិនអាចធ្វើឱ្យកីឡាករថៃបាត់បង់ស្មារតីរហូតដល់ថ្នាក់ឱ្យអាជ្ញាកណ្ដាលរាប់នោះទេ ព្រោះរាល់ពេលវាយចូលមុខគេនៅតែងក់ក្បាលដើរចូលវាយនិងទាត់សងវិញយ៉ាងចាស់ដៃទៅលើកីឡាករកម្ពុជា ។
លោក ញាន សុធី អ្នកគ្រប់គ្រងកម្មវិធីប្រកួតប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បាននិយាយថា តាមការសាកសួរជនល្មើសជំហានដំបូងប្រាប់ថា រូបគេខឹងនឹងអាជ្ញាកណ្ដាលដែលលម្អៀងពេកហើយទប់កំហឹងមិនបានក៏យកទឹកបរិសុទ្ធ១ដបគប់ស្របពេលកីឡាករទាំង២កំពុងប្រយុទ្ធគ្នានៅក្នុងទឹកទី៣ ។
លោកបន្តថា សង្វៀនអាស៊ីអាគ្នេយ៍បច្ចុប្បន្នកំពុងមានប្រជាប្រិយភាព និងមានអ្នកឧបត្ថម្ភកម្មវិធីច្រើនជាងគេ បើធៀបនឹងសង្វៀនផ្សេងទៀត ហើយការប្រកួតប្រជែងបែបនេះ លោកបារម្ភពីក្រុមមនុស្សទុច្ចរិតមួយចំនួនដែលមានបំណងចង់ឆាឆៅកម្មវិធីរបស់យើង ។
លោក ញាន សុធី បានបញ្ជាក់ថា ៖ «ក្រុមសន្តិសុខបានចាប់បញ្ជូនជនបង្កទៅនគរបាលប៉ុស្តិ៍ ហើយប្រសិនបើទង្វើនោះគ្មានការឃុបឃិតណាមួយ ឬគ្រាន់តែជាអំពើហិង្សាដោយទឹកចិត្តគាំទ្រខ្វះការពិចារណាមួយពេល ហើយសុំទោសនោះ យើងអាចអនុគ្រោះឲ្យបាន ពីព្រោះយើងចង់បានការទស្សនាដោយសប្បាយរីករាយ ។ គិតត្រឹមល្ងាចថ្ងៃចន្ទ ខាងប៉ូលិសកំពុងស៊ើបអង្កេតស្រាវជ្រាវ ហើយភាគីកីឡាករថៃរងគ្រោះក៏មិនប្រកាន់ដែរ ។ ទោះបីយ៉ាងណា សម្រាប់គូប្រកួតដែលគេចាប់អារម្មណ៍ជាងគេនោះ គណៈកម្មការមិនប្រកាសលទ្ធផលឡើយ តែបានបើកលុយតម្លៃខ្លួនរៀងខ្លួន» ។
តាមការសង្កេតការប្រកួតរបស់គូនេះ កីឡាករកម្ពុជាចាន់ ស៊ីណាត ពិតជាមានប្រៀបជាងកីឡាករថៃមែនហើយ បើការប្រកួតបន្តរហូតដល់ចប់ទឹកអាចមានភាគរយឈ្នះច្រើនជាងចាញ់ ទើបកីឡាករថៃ ប្រហែលជាដឹងខ្លួនមុនក៏ធ្វើពុតជាសន្លប់ បន្ទាប់ពីមានការគប់ដបទឹកបរិសុទ្ធត្រូវរូបគេ ។ ទាំងអស់នេះគ្រាន់តែជាការវិភាគរបស់អ្នកគាំទ្រកីឡាករកម្ពុជាដែលបានឃើញហេតុការណ៍តាមរយៈវីដេអូឃ្លីបដែលបានបង្ហោះក្នុងប្រព័ន្ធផ្សព្វផ្សាយប៉ុណ្ណោះ ។
តាមព័ត៌មានចុងក្រោយ ជនដៃដល់ត្រូវបានសមត្ថកិច្ចអប់រំ និងឱ្យធ្វើកិច្ចសន្យាបញ្ឈប់ទង្វើមិនគួរគប្បីនាំឱ្យបាត់បង់សេចក្ដីថ្លៃថ្នូរ និងបង្កឱ្យមានភាពអាម៉ាស់បែបនេះទៀតរួចដោះលែងឱ្យត្រឡប់ទៅផ្ទះវិញ ។
គួរបញ្ជាក់ថា មួយរយៈចុងក្រោយនេះនៅសង្វៀនទូរទស្សន៍អាស៊ីអាគ្នេយ៍មានចៅក្រម និងអាជ្ញាកណ្ដាលចំនួន៣រូប ហើយដែលត្រូវបានទស្សនិកជនបន្ទោសថា មិនយុត្តិធម៌ក្នុងការបំពេញការងាររបស់ខ្លួន ក្នុងនោះក៏មានលោក ឡុង ស៊ីលីន ម្នាក់ដែរ ៕
ចែករំលែកព័តមាននេះ