ខឹម វាសនា ៖ ជីវិតបត់បែនពីតួកុន ជាអ្នកនយោបាយ ហើយមកជាអបិយជំនឿ
- ភ្នំពេញ
រាជធានីភ្នំពេញ ៖ លោក ខឹម វាសនា ដែលជាអ្នកសិល្បៈ កាលពីទសវត្ស ឆ្នាំ១៩៩០ បានចូលប្រឡូកនយោបាយ ហើយចុងក្រោយនេះ…
រាជធានីភ្នំពេញ ៖ លោក ខឹម វាសនា ដែលជាអ្នកសិល្បៈ កាលពីទសវត្ស ឆ្នាំ១៩៩០ បានចូលប្រឡូកនយោបាយ ហើយចុងក្រោយនេះ បានប្រែក្លាយពីនយោបាយ មកជាអបិយជំនឿ ដែលគេប្រដូចនឹងរបៀប «មួយចានទឹក មួយចានគោក» ដែលអាចធ្វើឱ្យខូចជីវិតនយោបាយរបស់គាត់ ដែលខំកសាងជាង ២០ឆ្នាំមកនេះ។
កើតនៅថ្ងៃទី១១ ខែធ្នូ ឆ្នាំ១៩៦៥ លោក ខឹម វាសនា ជាកូនប្រុសច្បង ក្នុងគ្រួសារកសិករ ដែលមានបងប្អូន ២នាក់ (ប្រុសម្នាក់ ស្រីម្នាក់) នៅក្នុងខេត្តព្រៃវែង។ បន្ទាប់ពីជាប់បាក់ឌុប នៅឆ្នាំ១៩៨៦ លោក ខឹម វាសនា បានប្រឡងចូលរៀននៅសាកលវិទ្យាល័យវិចិត្រសិល្បៈ ផ្នែកភាពយន្ត។ នៅពេលរៀនចប់ លោកបានប្រឡូកក្នុងវិស័យសិល្បៈភាពយន្ត ដោយដើរតួសម្តែងផង និងបង្កើតផលិតកម្មភាពយន្តផ្ទាល់ខ្លួនផង។
ជាតួកុនជំនាន់លោក ទេព រិន្ទដារ៉ូ កាលណោះ លោក ខឹម វាសនា ធ្វើជាថៅកែកុនផង ជាអ្នកនិពន្ធផង ជាអ្នកដឹកនាំរឿងផង និងជាតួសម្តែងផង។ ប៉ុន្តែដោយសារតែទស្សនៈរបស់លោក ខុសគេ ហើយបានប្រៀបធៀបខ្លួនឯង ទៅនឹងព្រះពុទ្ធផង លោក ខឹម វាសនា ក៏បានចូលប្រឡូកក្នុងឆាកនយោបាយ នៅឆ្នាំ១៩៩៧ នៅក្នុងគណបក្សប្រឆាំង សម រង្ស៊ី ហើយនៅឆ្នាំ១៩៩៨ លោកបានឈរឈ្មោះជាបេក្ខជនតំណាងរាស្ត្រ នៅមណ្ឌលខេត្តព្រៃវែង ដែលជាស្រុកកំណើតរបស់លោក។ តែមិនជាប់ឆ្នោត ហើយរហូតដល់ឆ្នាំ២០០៣ ទើបលោក ខឹម វាសនា ជាប់ឆ្នោតជាតំណាងរាស្ត្រ នៅខេត្តព្រៃវែង។
ប៉ុន្តែដោយសារតែជម្លោះផ្ទៃក្នុង លោក ខឹម វាសនា បានចាកចេញពីគណបក្សប្រឆាំងសមរង្ស៊ី ហើយបង្កើតគណបក្សថ្មី ឈ្មោះ សម្ព័ន្ធដើម្បីប្រជាធិបតេយ្យ LDP នៅឆ្នាំ២០០៦ ដែលលោកធ្វើជាប្រធាន មកដល់សព្វថ្ងៃ។ ជាមេដឹកនាំនយោបាយក្នុងគណបក្ស LDP លោក ខឹម វាសនា មានគោលនយោបាយឃោសនា ដែលផ្តោតលើប្រជាធិបតេយ្យ ដោយផ្តល់អំណាចដល់ប្រជាពលរដ្ឋ ហើយប្រជាពលរដ្ឋ ជាម្ចាស់ប្រទេស។
ក្នុងគណបក្ស LDP លោក ខឹម វាសនា អូសទាញបានយុវជនយ៉ាងច្រើន។ ប៉ុន្តែរាល់ការបោះឆ្នោតជាតិ ចាប់តាំងពីឆ្នាំ២០០៨ មក គណបក្សរបស់លោក ខឹម វាសនា មិនដែលជាប់ឆ្នោតទទួលបានអាសនៈតំណាងរាស្ត្រម្នាក់ឡើយ។ រីឯនៅក្នុងការបោះឆ្នោតឃុំសង្កាត់វិញ គឺចាប់តាំងពីឆ្នាំ២០០៧ មកដល់ឆ្នាំ២០១៧ គណបក្ស LDP របស់លោក ខឹម វាសនា ជាប់បានត្រឹមសមាជិកក្រុមប្រឹក្សាឃុំសង្កាត់ ហើយក៏មិនបានច្រើននាក់ដែរ។
ចុងក្រោយនេះ លោក ខឹម វាសនា បានប្រែក្លាយពីនយោបាយ មកអបិយជំនឿ។ ដំបូងគាត់គិតពីនយោបាយ តែឥឡូវមកជាអបិយជំនឿ ដែលហាក់ដូចជា «មួយចានទឹក មួយចានគោក» និងអាចធ្វើឱ្យខូចដល់ជីវិតនយោបាយរបស់ខ្លួនឯងទៅវិញទេ។
កាលពីខែសីហា ឆ្នាំ២០២២ លោក ខឹម វាសនា បានតាំងខ្លួនឯង ជាព្រហ្មសង្គ្រោះលោកផង និងជាអ្នកចេះដឹងធម៌ព្រះពុទ្ធផង។ លោកបានប្រកាសពីគ្រោះមហន្តរាយ បង្កឡើងដោយរណ្តៅខ្មៅ (Black Hole) ដែលលោកថា នឹងនាំឱ្យមានគ្រោះទឹកជំនន់ លិចលង់ផែនដី ហើយមានតែនៅដីចំការ ដែលលោករស់នៅ ក្នុងស្រុកបន្ទាយស្រី ខេត្តសៀមរាប ជើងភ្នំគូលែនប៉ុណ្ណោះ ជាកន្លែងសុខសាន្ត។ លោក ខឹម វាសនា បានប្រកាសឱ្យប្រជាពលរដ្ឋ និងអ្នកគាំទ្រលោក ជួបជុំគ្នា កាលពីចុងខែសីហា ឆ្នាំ២០២២នេះ នៅដីចំការរបស់លោក។
ជាលទ្ធផល មនុស្សទាំងចាស់ទាំងក្មេង ទាំងប្រុសទាំងស្រី រហូតដល់មានពលករខ្មែរ និងអ្នករៀនសូត្រ អ្នកធ្វើការងារនៅថៃ នៅជប៉ុន និងនៅកូរ៉េ បានទៅប្រមូលផ្តុំនៅក្នុងដីចំការរបស់លោក ខឹម វាសនា ជិត ២ម៉ឺននាក់។
ប៉ុន្តែដោយសារតែអាជ្ញាធរសមត្ថកិច្ចចាត់ទុកថា លោក ខឹម វាសនា ឃោសនាបែបប្រជាភិថុតិ ខុសការពិត ហើយនៅថ្ងៃកំណត់របស់លោក នៅចុងខែសីហា ឆ្នាំ២០២២ មិនមានអភូតហេតុ គ្រោះមហន្តរាយ ទឹកជំនន់ លិចលង់ផែនដី ដូចការលើកឡើងរបស់លោក ក៏អាជ្ញាធរសមត្ថកិច្ច ចាត់វិធានការបិទផ្លូវ និងហាមឃាត់ឈប់ឱ្យមានអ្នកចូលទៅប្រមូលផ្តុំនៅដីចំការនោះ ហើយតម្រូវឱ្យរំសាយការជួបជុំ នៅដើមខែកញ្ញានេះ។
ប៉ុន្តែរាជរដ្ឋាភិបាល មិនបានចាត់វិធានការ ដោយប្រើកងកម្លាំងប្រដាប់អាវុធ ចូលទៅបង្ក្រាប និងបំបែកការជួបជុំ ហើយចាប់លោក ខឹម វាសនា ឡើយ។ ពោល គឺរាជរដ្ឋាភិបាល «រុញទូកបណ្តោយទឹក» ដោយទុកអោយអបិយជំនឿរបស់ ខឹម វាសនា សម្លា.ប់ជីវិតនយោបាយរបស់លោកដោយខ្លួនឯង។
មកដល់ពេលនេះ អ្នកជឿការឃោសនារបស់លោក ខឹម វាសនា ថា មានគ្រោះទឹកជំនន់លិចលង់ផែនដីនោះ នៅសល់ប្រមាណជាង ១០០០នាក់ទៀត ដែលមិនព្រមចាកចេញពីដីចំការរបស់លោក ខឹម វាសនា នៅស្រុកបន្ទាយស្រី ខេត្តសៀមរាប។ ចំណែកអ្នកផ្សេងទៀត បានចាកចេញទៅស្រុកកំណើតវិញជាបន្តបន្ទាប់ អស់ហើយ។ ដោយសារតែរឿងអបិយជំនឿនេះ អ្នកខ្លះបានគិតថា លោក ខឹម វាសនា មានបញ្ហាសតិអារម្មណ៍ ដែលត្រូវការព្យាបាលជំងឺផ្លូវចិត្ត ប៉ុន្តែមិនទាន់មានការបញ្ជាក់ណាមួយពីគ្រូពេទ្យនៅឡើយ។
ងាកមកមើលជីវិតនយោបាយរបស់លោក ខឹម វាសនា ក្នុងនាមគណបក្ស LDP គឺនៅក្នុងការបោះឆ្នោតឃុំសង្កាត់ កាលពីខែមិថុនា ឆ្នាំ២០២២ គណបក្សនេះ បានដកខ្លួនមិនចូលរួមការបោះឆ្នោតទៀតទេ ហើយនៅឆ្នាំ២០២៣ គេអាចមើលឃើញថា លោក ខឹម វាសនា ដែលប្រែពីអ្នកនយោបាយ មកជាអ្នកអបិយជំនឿនោះ ក៏ហាក់ដូចជា លែងប្រឡូកនយោបាយទៀតហើយ។ លោកហាក់មិនមានអ្វីទៅឃោសនា ទាក់ទាញអ្នកបោះឆ្នោត ក្រៅពីបក្សពួកគាត់ទៀតហើយ ព្រោះលោក បានប្រើសម្តីជេរប្រមាថពលរដ្ឋ ដែលមិនគាំទ្រលោក និងមិនយល់ពីសម្ព័ន្ធរបស់ក្រុមលោក ថាជាអ្នកល្ងង់ខ្លៅ។
កន្លងមក ក៏មានអ្នកចូលរួមធ្វើនយោបាយជាច្រើននាក់ បានចាកចេញពីលោក ខឹម វាសនា ហើយឈប់ជឿការឃោសនារបស់លោក។ លោក ខឹម វាសនា បានអប់រំយុវជនសម្ព័ន្ធរបស់ខ្លួន លែងឳ្យស្គាល់គុណឪពុកម្តាយ ប្តីលែងស្គាល់ប្រពន្ធ ហើយប្រពន្ធ ក៏លែងស្គាល់ប្តី ដោយសារតែលង់ខ្លួនជឿ និងយល់ពីសម្ព័ន្ធរបស់លោក ខឹម វាសនា។ ក្រុមយុវជន ដែលលង់ជឿការឃោសនារបស់លោក ឃឹម វាសនា អាចក្លាយជាបន្ទុកមួយ សម្រាប់សង្គមជាតិយើង ទៅថ្ងៃក្រោយ បើសិនជាមិនមានវិធានការទប់ស្កាត់ និងមិនភ្ញាក់រលឹក ស្វែងរកការសិក្សារៀនសូត្រ និងខិតខំធ្វើការងារទេនោះ៕
ចែករំលែកព័តមាននេះ