រាជធានីភ្នំពេញ៖ ប្រតិភូសហភាពអឺរ៉ុប ប្រចាំនៅកម្ពុជា រួមជាមួយស្ថានទូតនៃសាធារណរដ្ឋឆេក បារាំង អាល្លឺម៉ង់ ហុងគ្រី និងប៉ូឡូញ “ក្រុមអឺរ៉ុប” បានរៀបចំពិព័រណ៍អាហារូបករណ៍អឺរ៉ុបលើកដំបូង – ឱកាសសិក្សាថ្នាក់ឧត្តមសិក្សានៅអឺរ៉ុប” សម្រាប់យុវជនកម្ពុជា ដែលមានបំណងក្នុងការបន្តការសិក្សាថ្នាក់ឧត្តមសិក្សានៅអឺរ៉ុប និងដែលមានបំណងស្វែងរកអាហារូបករណ៍។
ព្រឹត្តិការណ៍កាលពីថ្ងៃទី២២ ខែកញ្ញានេះ ក៏រៀបចំឡើង ដើម្បីអបអរសាទរដល់បុគ្គលិកសិក្សា និងនិស្សិតកម្ពុជា ដែលបានទទួលអាហារូបករណ៍ក្រោម “កម្មវិធី Erasmus+” របស់សហភាពអឺរ៉ុបផងដែរ។
ក្នុងរយៈពេលបីឆ្នាំចុងក្រោយនេះ សហភាពអឺរ៉ុប បានផ្តល់អាហាររូបបករណ៍ដល់និស្សិត និងបុគ្គលិកឧត្តមសិក្សាជាដៃគូ នៅកម្ពុជា ជិត ២០០នាក់ ដើម្បីបន្តការសិក្សាថ្នាក់បរិញ្ញាបត្រ ថ្នាក់អនុបណ្ឌិតចំរុះ ឬក៏ផ្តល់ការបង្រៀន និងការបណ្តុះបណ្តាលនៅក្នុងសាកលវិទ្យាល័យនានា នៅអឺរ៉ុប។ ព្រឹត្តិការណ៍នៅប្រតិភូសហភាពអឺរ៉ុប ទទួលបាននូវការចូលរួមយ៉ាងល្អ។ យុវជនកម្ពុជាជាងមួយរយនាក់ មកពីសាកលវិទ្យាល័យរដ្ឋ និងឯកជនចំនួនជាង ២០ បានមកចូលរួមក្នុងពិព័រណ៍អាហារូបករណ៍អឺរ៉ុប ដែលប្រារព្ធ នៅការិយាល័យប្រតិភូសហភាពអឺរ៉ុប។
អាហារូបករណ៍ថ្នាក់សាកលវិទ្យាល័យ ទាំងរបស់សហភាពអឺរ៉ុប និងរដ្ឋជាសមាជិករបស់ខ្លួន (ឆេក បារាំង អាល្លឺម៉ង់ ហុងគ្រី និងប៉ូឡូញ) ត្រូវបានបង្ហាញនិងចែករំលែក។ តំណាងរដ្ឋមន្ត្រី ក្រសួងអប់រំ យុវជន និងកីឡា បានគាំទ្រយ៉ាងខ្លាំង ចំពោះព្រឹត្តិការណ៍នេះ ដោយបានលើក ឡើងពីសារៈសំខាន់នៃគុណភាពអប់រំ។
លោកជំទាវ Carmen Moreno ឯកអគ្គរដ្ឋទូតសហភាពអឺរ៉ុប ប្រចាំកម្ពុជា បានមានប្រសាសន៍ថា “ការអប់រំ មិនត្រឹមតែជាមូលដ្ឋានគ្រឹះនៃសិទ្ធិមនុស្សប៉ុណ្ណោះទេ ប៉ុន្តែវាក៏មានសារៈសំខាន់ផងដែរ សម្រាប់ការសម្រេចដោយជោគជ័យនូវគ្រប់គោលដៅអភិវឌ្ឍន៍ប្រកបដោយចីរភាព (SDGs) ដែលមានចែងក្នុងរបៀបវារៈឆ្នាំ២០៣០។ ការវិនិយោគលើវិស័យអប់រំ គឺជាការវិនិយោគដ៏មានឥទ្ធិពលបំផុត ដែលប្រទេសមួយៗ អាចធ្វើបាន ដើម្បីលើកកម្ពស់កំណើនសេដ្ឋកិច្ច និងការងារ។ កាលានុវត្តភាព ដែលសតវត្សរ៍ទី២១ និងការផ្លាស់ប្តូរឌីជីថល ផ្តល់ឱ្យយើងនូវតម្រូវការធ្វើបរិវត្តកម្មការអប់រំ ដែលផ្តោតលើគុណភាព និងសមធម៌ និងការទទួលយកនូវឧបករណ៍ឌីជីថល។ យើងត្រូវបង្កើនការប្តេជ្ញាចិត្តរបស់យើងចំពោះការវិនិយោគ និងគាំទ្រផ្នែកហិរញ្ញវត្ថុសម្រាប់ការអប់រំ។“
លោកបណ្ឌិត សោម រតនា អនុរដ្ឋលេខាធិការនៃក្រសួងអប់រំ យុវជន និងកីឡា បានមានប្រសាសន៍ថា “អាហារូបករណ៍ទៅសិក្សានៅអឺរ៉ុប ដែលផ្តល់ថវិកាដោយកម្មវិធី Erasmus+ របស់សហភាពអឺរ៉ុប ឬដោយកម្មវិធីទ្វេភាគីដ៏សប្បុរសរបស់រដ្ឋជាសមាជិកសហភាពអឺរ៉ុប គឺជាការគាំទ្រដ៏ល្អក្នុងការបង្កើនចំណេះដឹងដល់និស្សិតបញ្ចប់ការសិក្សាកម្ពុជា ដើម្បីឱ្យប្រទេសនេះ ទទួលបានអត្ថប្រយោជន៍នៃសមាហរណកម្មអាស៊ាន និងបដិវត្តន៍ឧស្សាហកម្មជំនាន់ទី៤” ។
Erasmus+ គឺជាកម្មវិធីដ៏ចម្បងរបស់សហភាពអឺរ៉ុប ដើម្បីគាំទ្រដល់ការអប់រំ ការបណ្តុះបណ្តាល យុវជន និងកីឡា ដែលមានថវិកា ចំនួន ២៦.២ ពាន់លានអឺរ៉ូ សម្រាប់រយៈពេលចន្លោះពីឆ្នាំ ២០២១ – ២០២៧។
តាមរយៈ Erasmus+ និងកម្មវិធីមួយចំនួនទៀត សហភាពអឺរ៉ុបបានលើកកម្ពស់គុណភាពនៃឧត្តមសិក្សា នៅកម្ពុជា និងផ្តល់ឱកាស សម្រាប់ការផ្លាស់ប្តូរគ្រូ និងសិស្សរវាងកម្ពុជា និងអឺរ៉ុប។ ត្រឹមតែរយៈពេល ៣ឆ្នាំចុងក្រោយ (២០២០, ២០២១, ២០២២) និស្សិតកម្ពុជាចំនួន ១២៩ នាក់ គ្រូបង្រៀន ៥៩ នាក់ ទទួល បានឱកាសទៅសិក្សានៅសាកលវិទ្យាល័យនានា នៅអឺរ៉ុប៕ សុខ សារ៉ាយ
ចែករំលែកព័តមាននេះ