ជនសង្ស័យម្នាក់បានយកកាំបិតផ្គាក់ដើរចូលទៅលួចសម្ភារៈនៅក្នុងការ៉ាស់ឡាន រួចគំរា.មសម្លា.ប់ម្ចាស់ផ្ទះទៀត ចុងក្រោយជាប់ខ្នោះរបស់សមត្ថកិច្ចដដែល
ខេត្តកណ្តាល ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់បានយកកាំបិតផ្គាក់ដើរចូលទៅលួចសម្ភារៈនៅក្នុងការ៉ាស់ឡាន រួចគំរា.មសម្លា.ប់ម្ចាស់ផ្ទះទៀត ចុងក្រោយជាប់ខ្នោះរបស់សមត្ថកិច្ចដដែល។ ហេតុការណ៍នេះ បានកើតឡើងកាលពីយប់ថ្ងៃទី២១ ខែកញ្ញា ឆ្នាំ២០២២ វេលាម៉ោង០២និង៤០នាទីយប់ (ម៉ោងមើលកាមេរ៉ាសុវត្ថិភាព) នៅចំណុចភូមិទួលងោក ឃុំកំពង់លួង ស្រុកពញាឮ ខេត្តកណ្តាល។
នគរបាលស្រុកពញ្ញាឮ បានប្រាប់អោយដឹងថា ជនរងគ្រោះខាងលើឈ្មោះ ម៉ៅ សំណាង ភេទប្រុស អាយុ៦៣ឆ្នាំ ជនជាតិខ្មែរ មុខរបរលក់ប្រេងសាំង និងម៉ាស៊ូត មានទីលំនៅភូមិទួលងោក ឃុំកំពង់លួង ស្រុកពញាឮ ខេត្តកណ្តាល។ ចំណែកជនសង្ស័យឈ្មោះ ហ្ស៊ី ផាដា ហៅខ្លា ភេទប្រុស អាយុ២៣ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិទួលអង្គុញ ឃុំផ្សារដែក ស្រុកពញាឮ ខេត្តកណ្តាល (ធ្វើសកម្មភាពលួច និងឆក់)។ ក្រោយពេលចាប់ខ្លួនជនសង្ស័យពិនិត្យឃើញមានសារធាតុញៀ.ននៅក្នុងទឹកនោម។
នគរបាលបានបញ្ជាក់ថា នៅថ្ងៃទី២១ ខែកញ្ញា ឆ្នាំ២០២២ វេលាម៉ោង៩និង៤២នាទីព្រឹក ជនរងគ្រោះឈ្មោះ ម៉ៅ សំណាង ភេទប្រុស បានដាក់ពាក្យបណ្តឹងចូលមកប៉ុស្តិ៍នគរបាលរដ្ឋបាលកំពង់លួង ដោយប្តឹងជនមិនស្គាល់អត្តសញ្ញាណ ដែលបានចូលមកធ្វើសកម្មភាពលួចទ្រព្យសម្បត្តិ រួមមានប្រាក់រៀលចំនួន២០ម៉ឺនរៀល (ម្ភៃម៉ឺនរៀល), ទឹកអប់ចំនួន១០ដប និងកាបូបស្ពាយពីក្រោយចំនួន០១ ដោយប្រើប្រាស់កាំបិតផ្គាក់របស់ខ្លួនធ្វើសកម្មភាពចូលលួចទ្រព្យសម្បត្តិនៅក្នុងបន្ទប់ ។ ហើយនៅពេលជនសង្ស័យចេញមកវិញ ជនសង្ស័យបានកាន់កាំបិតចង្អុលគំរា.មមកលើកម្មករលក់ប្រេងរបស់ជនរងគ្រោះមិនអោយប្រាប់អ្នកនៅជិតខាងឡើយ រួចហើយជនសង្ស័យក៏បានរត់គេចខ្លួនបាត់ស្រមោលតែម្តង។
ប្រភពដដែលបន្តថា បន្ទាប់ពីទទួលបានពាក្យបណ្តឹងភ្លាម លោកនាយប៉ុស្តិ៍កំពង់លួង បានរាយការណ៍ជូនលោកអធិការ រួចមកលោកអធិការក៏បានបញ្ជាកម្លាំងជំនាញអោយចុះសហការជាមួយកម្លាំងប៉ុស្តិ៍កំពង់លួង ចុះទៅកន្លែងកើតហេតុ ដើម្បីធ្វើការស្រាវជ្រាវ ។ នៅពេលទៅដល់ កម្លាំងជំនាញបានពិនិត្យកន្លែងកើតហេតុ រួចសាកសួរជនរងគ្រោះ និងស្រាវជ្រាវនៅជុំវិញទីកន្លែងកើតហេតុ រួចហើយកម្លាំងជំនាញក៏បានសហការជាមួយជនរងគ្រោះ និងជាមួយម្ចាស់ស្ថានីយប្រេងឥន្ទនៈ ដើម្បីឆែកមើលកាមេរ៉ាសុវត្ថិភាពនៅកន្លែងកើតហេតុ ។
ប្រភពដដែលបន្តទៀតថា បន្ទាប់មក កម្លាំងជំនាញ និងកម្លាំងប៉ុស្តិ៍ដោយមានការចូលរួមពីប្រជាពលរដ្ឋល្អ ក៏ឈានទៅកំណត់អត្តសញ្ញាណជនសង្ស័យបានម្នាក់មានឈ្មោះ ហ្ស៊ី ផាដា ហៅ ខ្លា ភេទប្រុស មានទីលំនៅភូមិទួលអង្គុញ ឃុំផ្សារដែក ស្រុកពញាឮ ខេត្តកណ្តាល។ ក្រោយពេលកំណត់មុខសញ្ញាបានហើយ កម្លាំងជំនញចុះស្រាវជ្រាវជាមួយកម្លាំងប៉ុស្តិ៍ផ្សារដែក និងបណ្ដាប៉ុស្តិ៍ផ្សេងៗ ដើម្បីស្វែងរកនាំខ្លួនជនសង្ស័យមកសាកសួរ ។ លុះដល់វេលាម៉ោង២១និង២៦នាទីយប់ កម្លាំងជំនាញ និងកម្លាំងប៉ុស្តិ៍ផ្សារដែក ក៏បានធ្វើការនាំខ្លួនជនសង្ស័យខាងលើ បញ្ជូនមកអធិការរដ្ឋាននគរបាលស្រុកពញាឮ ដើម្បីធ្វើការសាកសួរនៅចំពោះមុខសមត្ថកិច្ច ។
នៅចំពោះមុខសមត្ថកិច្ច ជនសង្ស័យឈ្មោះ ហ្ស៊ី ផាដា ហៅខ្លា បានឆ្លើយសារភាពថា «ខ្លួនពិតជាបានចូលធ្វើសកម្មភាពលួចទ្រព្យសម្បត្តិដូចជនរងគ្រោះរៀបរាប់ខាងលើពិតប្រាកដមែន។ កន្លងមក រូបខ្លួនធ្លាប់ធ្វើសកម្មភាពលួចម៉ូតូតាមឃុំផ្សារដែក ក្នុងស្រុកពញាឮ សរុបចំនួន០៩គ្រឿង, នៅឃុំវិហារលួង ចំនួន០៨គ្រឿង, ឃុំកំពង់លួង ចំនួន០៤គ្រឿង និងឆក់កាបូបសរុបចំនួន១១លើក បានសម្រេចចំនួន០៨លើក ក្នុងស្រុកពញាឮ ព្រមទាំងធ្វើសកម្មភាពលួចម៉ូតូម្តុំផ្សារត្រាចចំនួន៣លើកបានសម្រេច និងលួចគាស់ផ្ទះរបស់ប្រជាពលរដ្ឋ១លើកពុំបានសម្រេច ធ្វើសកម្មភាពលួចគាស់តូបលក់ទូរស័ព្ទនៅផ្សារឧដុង្គ០១លើកយកបានទូរស័ព្ទដៃចំនួន៥០គ្រឿង ខូច៣០គ្រឿង។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលស្រុកពញាឮ ដើម្បីកសាងសំណុំរឿងចាត់ការតាមនីតិវិធី។
ចែករំលែកព័តមាននេះ