រាជធានីភ្នំពេញ ៖ សាលាឧទ្ធរណ៍ នៅព្រឹកថ្ងៃទី២៧ ខែកុម្ភៈ ឆ្នាំ២០១៧នេះ បានសម្រេចប្រកាសសាដីកាតម្កល់ សាលក្រមសាលាដំបូងរាជធានីភ្នំពេញទុកជាបានការដដែលក្នុងសំណុំរឿងលោកស្រី ទេព វន្នី តំណាងសហគមន៍បឹងកក់ និងបក្សពួក៣នាក់ ពាក់ព័ន្ធករណីប្រមាថ អ្នករាជការសាធារណៈ និងប្រឆាំងនឹងអ្នករាជការសាធារណៈ មានស្ថានទម្ងន់ទោស សវនាការកាលប្រកាសនេះដឹកនាំដោយលោក ញូង ធុល អនុប្រធានសាលាឧទ្ធរណ៍និងលោក ស យសថាវរៈ ជាតំណាងមហាអយ្យការ ។
តាមការសង្កេតជាក់ស្តែង មានតែលោកស្រី ទេព វន្នី ម្នាក់ប៉ុណ្ណោះដែលកំពុងជាប់ពន្ធនាគារ ។ រីឯ៣នាក់ផ្សេងទៀតរស់នៅក្រៅឃុំ ។
ជនជាប់ចោទទាំង៤នាក់បានឆ្លើយបដិសេធនាពេលសវនាការថា ពួកគាត់ទាំង៤នាក់មិនបានប្រមាថ និងប្រឆាំងអ្នករាជការសាធារណៈទេកាលពីថ្ងៃនោះ ពួកគាត់គ្រាន់តែយកញត្តិមកដាក់នៅសាលារាជធានីភ្នំពេញតែប៉ុណ្ណោះ ។
គួររំលឹកថា ស្ត្រីបឹងកក់៤នាក់ត្រូវបានសាលាដំបូងរាជធានីភ្នំពេញប្រកាសសាលក្រមកាលពីព្រឹកថ្ងៃទី១៩ ខែកញ្ញា ឆ្នាំ២០១៦ ផ្តន្ទាទោសដាក់ពន្ធនាគារក្នុងម្នាក់ៗ៦ខែ ដោយគ្មានការពិន័យជាប្រាក់នោះទេ ។ លោក លី សុខលេង ចៅក្រមជំនុំជម្រះសាលាដំបូងរាជធានីភ្នំពេញ បានផ្តន្ទាទោសឈ្មោះ ទេព វន្នី ឈ្មោះ បូ ឆវី ឈ្មោះ គង់ ចន្ថា និង ឈ្មោះ ហេង មុំ ។ ពួកគេជាប់ចោទពីបទ «ប្រមាថអ្នករាជការសាធារណៈ និងបទប្រឆាំងនឹងអ្នករាជការសាធារណៈមានស្ថានទម្ងន់ទោស» តាមមាត្រា៥០២ និងមាត្រា៥០៤ នៃក្រមព្រហ្មទណ្ឌ ប្រព្រឹត្តនៅមុខសាលារាជធានីភ្នំំពេញ កាលពីថ្ងៃទី២៨ ខែវិច្ឆិកា ឆ្នាំ២០១១ ដែលករណីនេះ សាលារាជធានីភ្នំពេញ ជាដើមបណ្ដឹង ៕
ចែករំលែកព័តមាននេះ