រាជធានីភ្នំពេញ ៖ លោកចេង មុនីរ៉ា អភិបាលខណ្ឌច្បារអំពៅ បានមានប្រសាសន៍ណែនាំដល់មន្ត្រីគ្រប់លំដាប់ថ្នាក់ ដែលឋិតក្រោមឱវាទ អោយបន្តយកចិត្តទុកដាក់ និងពង្រឹងប្រសិទ្ធិភាពអោយបានខ្ពស់ លើកិច្ចការងារសន្តិសុខ ពិសេសការបង្ក្រាបល្បែងស៊ីសង នៅក្នុងមូលដ្ឋាន ស្របតាមបទបញ្ជារបស់សម្តេចតេជោនាយករដ្ឋមន្ត្រីនៃព្រះរាជាណាចក្រកម្ពុជា ។
![](https://kohsantepheapdaily.com.kh/wp-content/uploads/2022/09/c2ac275cfa349ab86bded26f3531f22d.jpg)
ការលើកឡើងរបស់លោកអភិបាលខណ្ឌ ថ្លែងឡើង នៅក្នុងកិច្ចប្រជុំគណះបញ្ជាការឯកភាព ខណ្ឌច្បារអំពៅ នាព្រឹកថ្ងៃទី២១ ខែកញ្ញា ឆ្នាំ២០២២ ដោយមានការអញ្ចើញចូលរួមពី អស់លោកលោកស្រីអភិបាលរងខណ្ឌ លោកលោកអធិការនគរបាលខណ្ឌ លោកមេបញ្ជាការកងរាជអាវុធហត្ថខណ្ឌ , លោក- លោកស្រី ជាចៅសង្កាត់ លោកនាយប៉ុស្តិ៍ទាំង៨ និងមន្ត្រីចំណុះជំនាញក្រោមឱវាទ ជាច្រើនរូបទៀត ផងដែរ ។
![](https://kohsantepheapdaily.com.kh/wp-content/uploads/2022/09/e73717e0e7a665dd7900e368f3da4a2e-1.jpg)
នៅក្នុងកិច្ចប្រជុំខាងលើ លោកអភិបាលខណ្ឌ បានដាក់ចេញនូវផែនការណ៍មួយចំនួន លើកិច្ចការងារសន្តិសុខ ដើម្បីជាយុទ្ធសាស្ត្រដល់កងកម្លាំងមន្ត្រីក្រោមឱវាទ យកទៅអនុវត្ត ក្នុងគោលដៅ លុបបំបាត់ល្បែងស៊ីសងគ្រប់ប្រភេទ ក្មេងទំនើង លុបបំបាត់គ្រឿងញៀន ក៏ដូចជាអំពើលួចឆក់ប្លន់ជាដើម ដើម្បីធានាបាននូវសន្តិសុខសុវត្ថិភាពជូនបងប្អូនប្រជាពលរដ្ឋ ក្នុងមូលដ្ឋាន ស្របទៅនឹងគោលនយោបាយភូមិឃុំមានសុវត្ថិភាព ។
![](https://kohsantepheapdaily.com.kh/wp-content/uploads/2022/09/cc5166308788cfe20b7ee80ceede2987-1.jpg)
ក្នុងឱកាសដដែលនោះ លោកអភិបាល បានណែនាំដល់មន្ត្រីអនុវត្តទាំងអស់ ត្រូវបន្តសកម្មភាពចុះ ត្រួតពិនិត្យ តាមគោលដៅ ហាងលក់កាហ្វេគុយទាវ ឬទីកន្លែងប្រកបអាជីវភាពផ្សេងៗមួយចំនួនទៀត ប្រសិនបើរកឃើញថា មានការលួចលាក់បង្កប់ នូវប្រភេទល្បែងអនឡាញខុសច្បាប់ គឺចាំបាច់ត្រូវបង្ក្រាប ដោយមិនបណ្តែតបណ្តោយអោយម្ចាស់ទីតាំង យកអាជីវកម្មស្របច្បាប់មកជាខែលដែលបាំងអំពើខុសរបស់ខ្លួនបានតទៅមុខទៀតនោះឡើយ ។
![](https://kohsantepheapdaily.com.kh/wp-content/uploads/2022/09/57e36ba98f45dc3e9df9cc76b7feb1a0-1.jpg)
ដោយឡែក ចំពោះទីតាំងកុងស៊ីទទួលបញ្ចាំទាំងអស់ លោកអភិបាល ក៏បានណែនាំ អោយបន្តចុះពិនិត្យមើលអោយបានជាប់លាប់ ថាតើទីតាំងទាំងនោះ បានប្រកបអាជីវកម្មខ្លួនស្របទៅនឹងច្បាប់ដែរឬទេ ជៀសវៀងការដែលទទួលបញ្ចាំយានយន្ត យានជំនះ ឬទ្រព្យផ្សេងដោយមិនមានឯកសារ ដែលជាអំពើខុសនឹងច្បាប់ ឬ ជាការទទួលផលចោរកម្ម ជាដើម ។
![](https://kohsantepheapdaily.com.kh/wp-content/uploads/2022/09/2d93927b4334fb0a9056377c790892f6-1.jpg)
ស្របទៅនឹង ពិធី បុណ្យកាន់បិណ្ឌ និងភ្ជុំបិណ្ឌ លោកអភិបាល ក៏បានដាក់ចេញនូវផែនការ ឲ្យកម្លាំង គណៈបញ្ជាការឯកភាពទាំងអស់ ត្រូវពង្រឹងបន្ថែមលើការពារសន្តិសុខ សណ្ដាប់ធ្នាប់ ជូនបងប្អូនប្រជាពលរដ្ឋ នៅតាមវត្តអារាមដោយធ្វើយ៉ាងណា ត្រូវរក្សាអោយបាននូវសុខសុវត្ថិភាព ជូនពួកគាត់ ។
![](https://kohsantepheapdaily.com.kh/wp-content/uploads/2022/09/e73717e0e7a665dd7900e368f3da4a2e-2.jpg)
ក្រៅពីកិច្ច ការងារសន្តិសុខសណ្តាប់ធ្នាប់ហើយនោះ លោកអភិបាលក៏បានណែនាំមន្ត្រី អោយបន្តការយកចិត្តលើកិច្ចការងារផ្សេងៗជាច្រើនទៀតផងដែរ ដូចជា ៖ ការផ្តល់សេវាសាធារណៈជូនប្រជាពលរដ្ឋឲ្យមានតម្លាភាព រហ័ស និងប្រកបដោយប្រសិទ្ធភា , ត្រូវផ្សព្វផ្សាយឲ្យបានទូលំទូលាយអំពីការវ៉ាក់សាំងដូសមូលដ្ឋាន និងដូសជំរុញជូនប្រជាពលរដ្ឋ , ពន្លឿនសិក្សាគម្រោងអភិវឌ្ឍន៍សង្កាត់និងខណ្ឌ និងការកែសម្រួលសមាសភាពគណៈកម្មាធិការនានាឲ្យស្របនឹងស្ថានភាពជាក់ស្តែង ៕
![](https://kohsantepheapdaily.com.kh/wp-content/uploads/2022/09/5bd8d4669bfec3a9450ffeeb19cf3f04-1.jpg)
![](https://kohsantepheapdaily.com.kh/wp-content/uploads/2022/09/5fbac2a172f176b325d0357be144ddea-1.jpg)
ចែករំលែកព័តមាននេះ