ឌឺណាស់ ! ដឹកមិនខ្ចីគ្របហើយ មកឈប់មុខសាលាឃុំបញ្ឈឺទៀត
ខេត្តត្បូងឃ្មុំ ៖ រថយន្តដឹកក្រួស-ខ្សាច់ ទោះបីជាអាជ្ញាធរ និងសមត្ថកិច្ច បានធ្វើការណែនាំជាច្រើនលើកច្រើនសារថា ឲ្យរាល់ពេលដឹកចេញទៅកាន់គោលដៅម្តងៗត្រូវតែគ្រប …
ខេត្តត្បូងឃ្មុំ ៖ រថយន្តដឹកក្រួស-ខ្សាច់ ទោះបីជាអាជ្ញាធរ និងសមត្ថកិច្ច បានធ្វើការណែនាំជាច្រើនលើកច្រើនសារថា ឲ្យរាល់ពេលដឹកចេញទៅកាន់គោលដៅម្តងៗត្រូវតែគ្រប …
ខេត្តត្បូងឃ្មុំ ៖ រថយន្តដឹកក្រួស-ខ្សាច់ ទោះបីជាអាជ្ញាធរ និងសមត្ថកិច្ច បានធ្វើការណែនាំជាច្រើនលើកច្រើនសារថា ឲ្យរាល់ពេលដឹកចេញទៅកាន់គោលដៅម្តងៗត្រូវតែគ្របឲ្យបានជិតចៀសវាងកុំឲ្យជ្រុះខ្សាច់រាយប៉ាយតាមផ្លូវថ្នល់ក៏ដោយ តែឈ្មួញទាំងនោះមិនខ្ចីយកត្រចៀកស្តាប់នោះទេ ។ ជាក់ស្តែងកាលពីព្រឹក ថ្ងៃទី២៥ ខែកុម្ភៈ ឆ្នាំ២០១៧មានរថយន្តបែនដឹកខ្សាច់១គ្រឿងបានមកចតនៅខាងមុខសាលាឃុំទន្លេបិទ ស្រុកត្បូងឃ្មុំ កំពុងតែផ្គើនចំពោះបទបញ្ជារបស់អាជ្ញាធរ ដោយមិនខ្លាចរអារឡើយ ។
លោក គង់ សីហុង អធិការរងនគរបាលស្រុកត្បូងឃ្មុំ ទទួលផែនសណ្តាប់ធ្នាប់ បានប្រាប់ឲ្យដឹងថា ក្រោមកិច្ចសហការជាមួយអាជ្ញាធរឃុំទន្លេបិទ នាពេលកន្លងមកបានកោះហៅម្ចាស់អាជីវកម្មខ្សាច់នៅភូមិទន្លេបិទ ឃុំទន្លេបិទ ឲ្យមកចូលរួមប្រជុំដើម្បីអនុវត្តច្បាប់ ដោយតម្រូវឲ្យរថយន្តនៅពេលដែលបានដឹកគ្រួស/ខ្សាច់ចេញពីតាំងណាមួយនៅមាត់ទន្លេ ត្រូវតែយកស្បៃមកគ្របពីលើ ដើម្បីកុំឲ្យជ្រុះរាយប៉ាយ ។
លោកអធិការរង បន្តថា ក្នុងជំហានដំបូងត្រូវតែធ្វើការផ្សព្វផ្សាយ ដើម្បីបញ្ជ្រាបដល់ទៅម្ចាស់អាជីវកម្មលក់ក្រួស-ខ្សាច់ ត្រូវតែឲ្យយល់ដឹងជ្រួតជ្រាបជាមុនសិន បន្ទាប់មកនឹងធ្វើការផាកពិន័យទៅតាមច្បាប់ ។ ក្រុមរថយន្តដឹកខ្សាច់ទាំងនោះចាំតែតាមដានមើលសមត្ថកិច្ចដែលកំពុងតែដាក់យាមនៅត្រង់គោលដៅ ក្រោយពីបានដឹងថា ដកចេញត្រឡប់ទៅវិញ ក្រោយពីបានអនុវត្តច្បាប់ចរាចរណ៍នោះ រថយន្តនឹងបានបន្តដឹកដោយមិនបានគ្របខ្សាច់នោះទេ កត្តានេះហើយនឹងធ្វើឲ្យខ្សាច់ជ្រុះរាយតាមផ្លូវជាតិលេខ៧ ។ ប្រសិនបើថ្នាក់លើអនុញ្ញាតឲ្យរូបលោកចល័តដឹកនាំកម្លាំងដើម្បីចាប់រថយន្តដឹកក្រួស-ខ្សាច់ មិនគ្របនោះពិតជាមានប្រសិទ្ធភាពធ្វើឲ្យអ្នកបើកបររថយន្តនីមួយៗមានការរាងចាលមិនខាន ហើយក៏សុំកុំឲ្យមានអន្តរាគមន៍ពីអ្នកនេះអ្នកនោះ ។
លោក ភិន ឈុន មេឃុំទន្លេបិទ មានប្រសាសន៍ឲ្យដឹងដែរថា កន្លងមករូបលោកធ្លាប់បានកោះហៅម្ចាស់អាជីវកម្មលក់ក្រួស-ខ្សាច់នៅតាមមាត់ទន្លេជាច្រើនកន្លែងឲ្យមកចូលរួមប្រជុំស្តាប់ការណែនាំរបស់អាជ្ញាធរឃុំ ធ្វើយ៉ាងណានៅពេលដឹកចេញត្រូវតែយកស្បៃមកគ្រប ដើម្បីចៀសវាងកុំឲ្យជ្រុះរាយប៉ាយតាមផ្លូវជាតិ និងហុយទៅលើប្រជាពលរដ្ឋ ដែលមានផ្ទះនៅសងខាងផ្លូវថ្នល់ ។ ក្នុងករណីដែលអ្នកបើកបររថយន្តមិនព្រមស្តាប់ទេនោះ រូបលោកនឹងរាយការណ៍ទៅលោកអភិបាលស្រុកត្បូងឃ្មុំ ដើម្បីសុំកិច្ចសហការជាមួយមន្ទីររ៉ែ និងឋាមពលខេត្ត ដើម្បីមានចំណាត់ការម្តង ។
សូមបញ្ជាក់ថា កាលពីពេលដែលប្រធានមន្ទីររ៉ែចាស់នៅ ធ្លាប់ប្រាប់ថា ប្រសិនណាបើម្ចាស់អាជីវកម្មលក់ក្រួស/ខ្សាច់មិនអនុវត្តតាមច្បាប់ បង្កឲ្យជ្រុះរាយប៉ាយតាមផ្លូវត្រូវចុះបិទកន្លែងនោះបណ្តោះអាសន្នផងដែរ ៕
ចែករំលែកព័តមាននេះ