រាជធានីភ្នំពេញ ៖ ស្របពេលទីផ្សារអចលនទ្រព្យកំពុងប្រឈមនឹងការលក់ធ្លាក់ចុះ អ្នកជំនាញក្នុងវិស័យនេះថ្លែងថា ក្នុងដំណាក់កាលបែបនេះ កម្ពុជាត្រូវខិតខំកសាងទំនុកចិត្តបន្ថែមទៀតដើម្បីទាក់ទាញវិនិយោគិនមកកម្ពុជា ។
រាជធានីភ្នំពេញ ៖ ស្របពេលទីផ្សារអចលនទ្រព្យកំពុងប្រឈមនឹងការលក់ធ្លាក់ចុះ អ្នកជំនាញក្នុងវិស័យនេះថ្លែងថា ក្នុងដំណាក់កាលបែបនេះ កម្ពុជាត្រូវខិតខំកសាងទំនុកចិត្តបន្ថែមទៀតដើម្បីទាក់ទាញវិនិយោគិនមកកម្ពុជា ។
អគ្គនាយកក្រុមហ៊ុន Century21 Cambodia លោក គុយ វ៉ាត ថ្លែងថា នៅក្នុងឆ្នាំ២០១៧នេះ ការផ្គត់ផ្គង់អចលនទ្រព្យ ពិសេសខុនដូចូលទីផ្សារមានចំនួនច្រើន ដែលធ្វើឲ្យការលក់ធ្លាក់ចុះបន្តិចបន្តួច ដែលនេះជារឿងធម្មតានៅពេលមានការផ្គត់ផ្គង់កើនឡើងច្រើន។ លោកបន្តថា លោកមើលឃើញដូចអ្នកនៅក្នុងវិស័យនេះដែរ នៅពេលមានការផ្គត់ផ្គង់ច្រើន តម្រូវការធ្លាក់ចុះ ។ ដូច្នេះ យើងត្រូវការពេលវេលាខ្លះដើម្បីធ្វើឲ្យទីផ្សារនេះល្អប្រសើរឡើងវិញ ។
លោកបន្តថា ៖ « យើងត្រូវកសាងទំនុកចិត្តដើម្បីទាក់ទាញអ្នកវិនិយោគឲ្យចូលមកកាន់តែច្រើន ដើម្បីបំពេញតម្រូវការនៅក្នុងទីផ្សារ ។ ហេតុនេះ យើងកំពុងកសាងនូវធនធានមនុស្សដើម្បីបំពេញតម្រូវការដល់អ្នកវិនិយោគ ។ យើងបណ្តុះបណ្តាលភ្នាក់ងារជំនាញដើម្បីធ្វើការងារនេះឲ្យបានល្អប្រសើរ ព្រោះនៅស្រុកគេ ក្រុមភ្នាក់ងារ និងអ្នកនៅក្នុងផ្នែកគ្រប់គ្រងត្រូវនៅជាមួយគ្នា ទើបអាចកសាងទំនុកចិត្តបាន » ។
លោក គុយ វ៉ាត បន្ថែមថា ទោះបីមានការគ្រប់គ្រងល្អបែបណាក៏ដោយ បើគ្មានទីផ្សារល្អ ក៏យើងមិនទទួលបានជោគជ័យដែរ ប៉ុន្តែបើមានទីផ្សារ តែគ្រប់គ្រងមិនល្អ ពេលវិនិយោគិនមកវិនិយោគគ្មានភាពកក់ក្តៅ ក៏មិនល្អនោះដែរ ។
លោក ប៉ែន សុខគា ប្រធានផ្នែកវាយតម្លៃនៃក្រុមហ៊ុនប៊ុណ្ណារៀលធីគ្រុប ថ្លែងថា ស្ថានភាពអចលនទ្រព្យឆ្នាំ២០១៧នេះ ហាក់មានភាពតានតឹងបន្តិច ដោយសារវិនិយោគិន និងប្រជាពលរដ្ឋនៅរង់ចាំមើលស្ថានភាពប្រទេសក្នុងអំឡុងពេលបោះឆ្នោតនាពេលខាងមុខ ប៉ុន្តែក្នុងដំណាក់កាលនេះ សម្រាប់អ្នកមានប្រាក់ពួកគេអាចវិនិយោគក្នុងពេលនេះដើម្បីទទួលបានផលចំណេញនៅពេលក្រោយ ។ លោកបន្តថា សម្រាប់ការកសាងទំនុកចិត្តយ៉ាងណាដល់វិនិយោគិនពីក្រៅប្រទេស វាជាបញ្ហាទាក់ទងនឹងការបោះឆ្នោត ជាអ្វីដែលពួកគេរង់ចាំមើលស្ថានភាពជាក់ស្តែងដែលកើតឡើងនៅពេលខាងមុខ ។
លោកបន្តថា ៖ « បើនិយាយពីខុនដូ វាជាចំណុចក្តៅមួយសម្រាប់ទីផ្សារ ព្រោះចំនួនខុនដូមានការផ្គត់ផ្គង់លើសតម្រូវការ និងប្រឈមនឹងការមានវិបត្តិ ។ ប្រសិនជាគម្រោងខុនដូច្រើនសាងសង់មិនចប់ចុងចប់ដើម ប៉ុន្តែបើអ្នកវិនិយោគមានប្រាក់គ្រប់គ្រាន់ដើម្បីបញ្ចប់គម្រោងរបស់ខ្លួន មិនមានបញ្ហាអ្វីនោះទេ » ។
លោក Bretton G Sciaroni ប្រធានសមាគមពាណិជ្ជកម្មអន្តរជាតិកម្ពុជា ថ្លែងថា ទីផ្សារអចលនទ្រព្យនៅកម្ពុជា នៅតែមានភាពល្អប្រសើរ ដោយគម្រោងផ្សេងៗកំពុងដំណើរការសាងសង់យ៉ាងសកម្ម ប៉ុន្តែវាអាចមានល្បឿនថមថយបន្តិចសម្រាប់ឆ្នាំ២០១៨ខាងមុខ ដោយសារវិនិយោគិន និងប្រជាពលរដ្ឋមានការព្រួយបារម្ភពីការបោះឆ្នោតនៅអំឡុងពេលនោះ ។
លោកបន្តថា ៖ « សម្រាប់ខ្ញុំមិនមានអ្វីគួរឲ្យបារម្ភទាក់ទងនឹងការបោះឆ្នោតនោះទេ ប៉ុន្តែប្រជាជននៅទីនេះ និងអ្នកវិនិយោគ ពួកគេព្រួយបារម្ភ និងកំពុងរង់ចាំមើលស្ថាន ការណ៍» ៕
ចែករំលែកព័តមាននេះ