ខេត្តព្រះសីហនុ ៖ បន្ទាប់ពីកាសែតកោះសន្តិភាពបានចេញផ្សាយនៅលើវ៉េបសាយរបស់ខ្លួន កាលពីថ្ងៃទី២០ ខែ កញ្ញា ឆ្នាំ២០២២ កន្លងមកថ្មីៗនេះ មានអ្នកតាមដានអំពីព្រឹត្តការណ៍ព័ត៏មានសង្គមជាពិសេសអ្នកទេសចរណ៍ជាតិ,អន្តរជាតិជាច្រើនបានរិះគន់ទៅអាជ្ញាធរមូលដ្ឋានមានសមត្ថកិច្ចជំនាញ ពាក់ព័ន្ធនៅស្រុកស្ទឹងហាវ…
ខេត្តព្រះសីហនុ ៖ បន្ទាប់ពីកាសែតកោះសន្តិភាពបានចេញផ្សាយនៅលើវ៉េបសាយរបស់ខ្លួន កាលពីថ្ងៃទី២០ ខែ កញ្ញា ឆ្នាំ២០២២ កន្លងមកថ្មីៗនេះ មានអ្នកតាមដានអំពីព្រឹត្តការណ៍ព័ត៏មានសង្គមជាពិសេសអ្នកទេសចរណ៍ជាតិ,អន្តរជាតិជាច្រើនបានរិះគន់ទៅអាជ្ញាធរមូលដ្ឋានមានសមត្ថកិច្ចជំនាញ ពាក់ព័ន្ធនៅស្រុកស្ទឹងហាវ ខេត្តព្រះសីហនុថា អសមត្ថភាពក្នុងការដឹកនាំគ្រប់គ្រងក្នុងការការពារគ្រប់គ្រងបង្ការទប់ស្កាត់ និងបង្ក្រាបបទល្មើសផ្សេងៗនៅក្នុងមូលដ្ឋានទើបជនខិលខូចឆ្លៀតឱកាសក្នុងការប្រព្រឹត្តបទល្មើសដឹកដីនិងថ្មមកចាក់លុបចូលទៅក្នុងសមុទ្របាត់បង់ឆ្នេរពីធម្មជាតិបានយ៉ាងរលូនបែបនេះ។
លោកវរសេនីយ៍ត្រី ង៉ែត ឡន នាយនគរបាលប៉ុស្តិ៍រដ្ឋបាល ឃុំអូត្រេះ ស្រុកស្ទឹងហាវ ខេត្តព្រះសីហនុ បានឲ្យដឹងតាមទូរសព្ទ័កាលពីរសៀលថ្ងៃទី២១ ខែ កញ្ញា ឆ្នាំ ២០២២ ក្នុងនយ័មិនមានភាពទទួលខុសត្រូវនៅក្នុងការងារជានាយនគរបាលប៉ុស្តិ៍រដ្ឋបាលដែលជាសេនាធិការឲ្យមូលដ្ឋានឃុំ,ស្រុក លោកបានបញ្ជាក់ថាជុំវិញបញ្ហាខាងលើនេះ លោកមិនបានទៅចូលរួមទេតែមានកូនចៅក្រោមឱវាទទៅចូលរួមដែរ ។ ដោយឡែក កំណត់ហេតុនៅកន្លែងប្រព្រឹត្តបទល្មើសខាងលើនោះ ក៏លោកមិនបានដឹងពីខ្លឹមសារដែរ កម្លាំងនគរបាលដែលចុះទៅគឺគ្រាន់តែជាអ្នកការពារមិនឲ្យមានករណីហិង្សាកើតឡើងប៉ុណ្ណោះ ។
ដោយឡែក លោក សុន ពិសី អភិបាលរងស្រុកស្ទឹងហាវ ក៏បានឲ្យដឹងតាមទូរសព្ទ័កាលពីព្រឹកថ្ងៃ
ទី២១ ខែ កញ្ញា ឆ្នាំ២០២២នេះថា រហូតមកទល់ពេលនេះអត្តសញ្ញាណអ្នកដែលលួចចាក់ដីនិងថ្មលុបចូលទៅក្នុងសមុទ្រនៅតែមិនទាន់រកឃើញនៅឡើយក្នុងករណីរកឃើញរដ្ឋបាលស្រុកនិងចាត់វិធានការឲ្យសាម៉ីខ្លួនជាម្ចាស់ចាក់ដីនិងថ្មនៅទីតាំងខាងលើកាយយកដីនិងថ្មចេញវិញ។ប៉ុន្តែបើរកមិនឃើញបន្ទាប់ពីចប់កម្មវិធីបុណ្យភ្ជុំបិណ្ឌរដ្ឋបាលស្រុកនិងប្រើប្រាស់គ្រឿងចក្រកាយយកដីនិងថ្មចេញវិញដែរ ។
ប្រជាពលរដ្ឋក៏ដូចជាមន្ត្រីរាជការនៅខេត្តព្រះសីហនុបានឲ្យដឹងថា អត្តសញ្ញាណអ្នកចាក់ដីនិងថ្មលុបចូលទៅក្នុងសមុទ្រនៅទីតាំងខាងលើ ជាអ្នកសំបូរលុយនិងជាមន្ត្រីធំដុំនៅរាជធានីភ្នំពេញ។ ហើយបើអាជ្ញាធរមានសមត្ថកិច្ចជំនាញពាក់ព័ន្ធគេចង់រកអត្តសញ្ញាណម្ចាស់ទីតាំងងាយជាងបកចេកទៅទៀត?
ពួកគាត់បានបន្តឲ្យដឹងទៀតថា បើមេការម្ចាស់គ្រឿងចក្រមិនស្គាល់អត្តសញ្ញាណម្ចាស់ទីតាំង ពេលចាក់ដីរួចទៅបើកលុយពីនរណា? ពួកគាត់បានបញ្ជាក់ឲ្យដឹងទៀតថា នេះជាសកម្មភាពលួចចាក់ដី និងថ្មលុបចូលទៅក្នុងសមុទ្រលើកទី០២ហើយនៅចំណុចក្បែរៗគ្នាទីតាំងខាងលើនេះដែលអាជ្ញាធរស្រុកស្ទឹងហាវ ខេត្តព្រះសីហនុ មិនអាចស្វែងរកអត្តសញ្ញាណជនខិលខូចដែលមានបំណងលួចយកអចលនវត្ថុរបស់រដ្ឋមកធ្វើជាកម្មសិទ្ធិផ្ទាល់ខ្លួន។
ចែករំលែកព័តមាននេះ