រោងចក្រផលិតស្ករនៅខេត្តព្រះវិហារនឹងដំណើរការឡើងវិញចុងខែកុម្ភៈនេះ
ខេត្តព្រះវិហារ ៖ បន្ទាប់ពីផ្អាកដំណើរការអស់រយៈពេលប្រមាណជិត៧ខែ ដោយសារតែដំណាំអំពៅមិនអាចឆ្លើយតបនឹងតម្រូវការផលិតគ្រប់គ្រាន់មក រោងចក្រផលិតស្ករស …
ខេត្តព្រះវិហារ ៖ បន្ទាប់ពីផ្អាកដំណើរការអស់រយៈពេលប្រមាណជិត៧ខែ ដោយសារតែដំណាំអំពៅមិនអាចឆ្លើយតបនឹងតម្រូវការផលិតគ្រប់គ្រាន់មក រោងចក្រផលិតស្ករស …
ខេត្តព្រះវិហារ ៖ បន្ទាប់ពីផ្អាកដំណើរការអស់រយៈពេលប្រមាណជិត៧ខែ ដោយសារតែដំណាំអំពៅមិនអាចឆ្លើយតបនឹងតម្រូវការផលិតគ្រប់គ្រាន់មក រោងចក្រផលិតស្ករសលំដាប់ថ្នាក់ពិភពលោក និងធំជាងគេនៅអាស៊ីរបស់ក្រុមហ៊ុនអភិវឌ្ឍន៍ដំណាំអំពៅ រ៉ូយ ហ្វេង ដែលមានទីតាំងនៅលើទឹកដីខេត្តព្រះវិហារ នឹងចាប់ផ្តើមដំណើរការឡើងវិញនៅចុងខែកុម្ភៈនេះ ។ នេះបើយោងតាមតំណាងក្រុមហ៊ុនបានឲ្យដឹងកាលពីថ្ងៃទី១៣ កុម្ភៈ ម្សិលមិញ ។
លោក ហ្គួយ យៀង តំណាងក្រុមហ៊ុនអភិវឌ្ឍន៍ដំណាំអំពៅ រ៉ូយ ហ្វេង ឲ្យដឹងថា រោងចក្រផលិតស្កររបស់ក្រុមហ៊ុនរ៉ូយ ហ្វេង នឹងចាប់ផ្តើមដំណើរការកិនអំពៅផលិតស្ករសឡើងវិញនៅចុងខែកុម្ភៈនេះ គ្រាដែលរដូវប្រមូលផលអំពៅបានមកដល់ ។ លោកបន្ដថា ៖ « ជាទូទៅ រោងចក្រផលិតស្ករសអាចដំណើរការផលិតស្ករសបានក្នុងរយៈពេលតែ៥០ថ្ងៃប៉ុណ្ណោះក្នុង១ឆ្នាំ បន្ទាប់ពីរដូវប្រមូលផលអំពៅចាប់ផ្តើម » ។
លោកបញ្ជាក់ថា ៖ « រោងចក្រផលិតស្ករសរបស់ក្រុមហ៊ុនត្រូវការអំពៅក្នុង១ថ្ងៃ ២ម៉ឺនតោន ប៉ុន្តែដំណាំអំពៅនៅខេត្តព្រះវិហារ នៅពុំទាន់ឆ្លើយតបទៅនឹងតម្រូវការផលិតរបស់រោងចក្រនៅឡើយទេ ព្រោះការដាំដុះរបស់ក្រុមហ៊ុនមិនទាន់សម្រេចបាន១០០%នៅឡើយ ។ បច្ចុប្បន្ន ក្រុមហ៊ុនបានដាំដុះដំណាំអំពៅប្រមាណជាង២ម៉ឺនហិកតា លើផ្ទៃដីដាំដុះ៤,៨ម៉ឺនហិកតា ។ នៅថ្ងៃខាងមុខ ក្រុមហ៊ុននឹងពង្រីកដីដាំដុះដំណាំអំពៅបន្ថែមទៀតដើម្បីផ្គត់ផ្គង់អំពៅឲ្យគ្រប់តាមតម្រូវការផលិតរបស់រោងចក្រមួយនេះ » ។
ដោយមើលឃើញថា ដំណាំអំពៅកំពុងមានតម្រូវការខ្ពស់ ថែមទាំងការផ្គត់ផ្គង់មិនគ្រប់គ្រាន់បែបនេះ លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានស្នើឲ្យពលរដ្ឋដែលមានដីនៅក្នុងក្រុមហ៊ុនអភិវឌ្ឍន៍ដំណាំអំពៅ ឬនៅក្បែរតំបន់រោងចក្រផលិតស្ករស ធ្វើយ៉ាងណា សហការវិនិយោគជាមួយក្រុមហ៊ុនក្នុងការដាំដុះដំណាំអំពៅ ដោយអនុវត្តកសិកម្មតាមកិច្ចសន្យាដើម្បីរក្សាបាននូវតម្លៃ ដែលជាផ្នែកមួយជួយបង្កើននូវប្រាក់ចំណូលសម្រាប់ផ្គត់ផ្គង់ជីវភាពគ្រួសារ ។
លោកលើកឡើងថា ៖ « ក្នុងឆ្នាំ២០១៦ ប្រជាពលរដ្ឋរស់នៅក្បែរតំបន់អភិវឌ្ឍន៍ដំណាំអំពៅ នៅភូមិពោធិ៍ ភូមិប្រមេរ ស្រុកត្បែងមានជ័យ ប្រមាណជាង១០០គ្រួសារបានអនុវត្តកសិកម្មតាមកិច្ចសន្យា ដោយដាំដុះដំណាំអំពៅលក់ឲ្យក្រុមហ៊ុនចិនឃើញថា ទទួលបានប្រាក់ចំណូលច្រើនអាចដោះស្រាយជីវភាពបានមួយកម្រិតធំ ។ ដោយឡែក ប្រជាពលរដ្ឋមួយចំនួនទៀតកំពុងបន្តអនុវត្តកសិកម្មតាមកិច្ចសន្យាបន្ថែមទៀតក្នុងឆ្នាំ២០១៧នេះ » ។
គួររំឭកថា រោងចក្រផលិតស្ករសលំដាប់ថ្នាក់ពិភពលោក ធំជាងគេនៅអាស៊ីនេះ គឺមានទីតាំងស្ថិតក្នុងភូមិពោធិ៍ទាប ឃុំម្លូរព្រៃ១ ស្រុកឆែប ខេត្តព្រះវិហារ ។ រោងចក្រនេះបានសម្ពោធដាក់ឲ្យដំណើរការកាលពីថ្ងៃទី១៩ មេសា ឆ្នាំ២០១៦ កន្លងទៅ ដោយបានបោះទុនប្រមាណ១ប៊ីលានដុល្លារអាមេរិក ។
ដោយឡែក ចម្ការអំពៅដែលគាំទ្រសម្រាប់សង្វាក់ផលិតកម្មរោងចក្រនេះ មាននៅបីស្រុកក្នុងខេត្ត និងអនុវត្តដោយក្រុមហ៊ុនចំនួន៥រួមគ្នា ។ រោងចក្របានចាប់ផ្ដើមសាងសង់តាំងពីពាក់កណ្ដាលខែមិថុនា ឆ្នាំ២០១៤ មកម្ល៉េះ។ ក្រុមហ៊ុនមួយនេះបានទទួលការអនុញ្ញាតពីរាជរដ្ឋាភិបាលកម្ពុជា ឲ្យអភិវឌ្ឍដំណាំអំពៅនៅឆ្នាំ២០១១ ហើយបានឈូសឆាយដីដើម្បីដាំអំពៅជាបន្តបន្ទាប់ ។ ដំណាំអំពៅអាចប្រមូលបានចំណូលច្រើនជាងការធ្វើស្រែចម្ការ ដោយក្នុង១ហិកតាអាចប្រមូលផលបានដល់ទៅ១០០តោនក្នុង១ឆ្នាំ ហើយការដាំដុះម្តងអាចប្រមូលផលបានពី៤ ទៅ៥ដង ៕
ចែករំលែកព័តមាននេះ