​ខេត្តកំពង់ឆ្នាំង៖ សមត្ថកិច្ចចម្រុះ ដឹកនាំដោយ​លោក សាន់ យូ អភិបាលរង ខេត្តកំពង់ឆ្នាំង នៅថ្ងៃទី១៥ ខែកញ្ញា ឆ្នាំ២០២២ បាន​ចុះបង្ក្រាបបទល្មើសនេសាទ ក្នុងរដូវហាមឃាត់ នៅក្នុង​ភូមិសាស្ត្រស្រុកកំពង់លែង​។ ចំណែកមន្ត្រីខណ្ឌរដ្ឋបាលជលផល នៅថ្ងៃទី១៤ ខែកញ្ញា បានចុះបង្ក្រាបបទល្មើសនេសាទ ក្នុងភូមិសាស្ត្រស្រុកបរិបូរណ៍ និងស្រុកកំពង់ត្រឡាច។

របាយការណ៍របស់​លោក សាន់ យូ អភិបាលរងខេត្តកំពង់ឆ្នាំង បានបញ្ជាក់ថា​ នៅថ្ងៃទី១៥ ខែកញ្ញា លោក​បានដឹកនាំសមត្ថកិច្ចចម្រុះ​ចុះបង្ក្រាបបទល្មើសនេសាទ នៅនៅចំណុច​អន្សមប្រឡាក់ ស្ថិតនៅក្នុងភូមិប្រឡាយមាស ភូមិក្រងផ្ទិល ក្នុងឃុំប្រឡាយមាស និងចំណុចអាងប្អេ ទំនប់ជីខ្លា ឃុំដារ ស្រុកកំពង់លែង​។

ជាមួយគ្នានេះ របាយការណ៍របស់​លោក លី ឡា នាយខណ្ឌរដ្ឋបាលជលផល នៃមន្ទីរកសិកម្មរុក្ខា ប្រមាញ់ និងនេសាទ ខេត្តកំពង់ឆ្នាំង ក៏បានរាយការណ៍ជូនគណៈបញ្ជាការឯកភាពខេត្តដែរថា កាលពីថ្ងៃទី១៤ ខែកញ្ញា សមត្ថកិច្ចខណ្ឌរដ្ឋបាលជលផល សហការជាមួយគណៈបញ្ជាការ​ឯកភាព ស្រុកបរិបូណ៌ គណៈបញ្ជាការឯកភាពស្រុកកំពុងតែឡាច ប្រតិបត្តិការ ចុះបង្ក្រាបទល្មើស​នេសាទនៅចំណុចបឹងលង្វែក បឹងកក់ អ្នកតាហាងស្រុកកំពង់ត្រឡាច និងនៅចំណុចកំពង់ព្រះ ក្នុងស្រុកបរិបូណ៌។ ជាលទ្ធផលនៃកិច្ចបង្ក្រាបរយៈពេល ២ ថ្ងៃនេះ កម្លាំងសមត្ថកិច្ចចម្រុះ​សរុបមានចំនួន ២៧​នាក់ ប្រើប្រាស់មធ្យោបាយមានកាណូតបាឡាស្មាច់ ៨ គ្រឿង ​ ដោយបាន​បង្ក្រាបទល្មើសស្បៃមុងចំនួន ៣២ករណី ស្មើនឹង ១១០០ម៉ែត្រ លបលូស្បៃមុង ៣៦លប ​បង្គោល ៥៨០​ដើម ចាក់លែង​កូនត្រីចំរុះ ១២០​គីឡូក្រាម​។ បង្ក្រាបរបាំសាច់អួន ៧កន្លែង ស្មើនឹង ៦៤០​ម៉ែត្រ លបលូសាច់អួន ៧លប បង្គោល ២០០ដើម និង ចាក់លែងត្រីចំរុះ ចូលទន្លេវិញ ចំនួនជាង ១០​គីឡូក្រាម​​៕ ពៅ សុខងហ៊ាន