ក្រុងប៉ោយប៉ែត ៖ ករណីគួរឲ្យមានការភ្ញាក់ផ្អើលមួយបានកើតឡើងនៅវេលាម៉ោង២ជាងរសៀល ថ្ងៃទី១៧ កុម្ភៈ ២០១៧ ខណៈពេលដែលក្មេងប្រុសម្នាក់បានព្យាយាមប្រឌិតរឿងកុហកឪពុកម្តាយរបស់ខ្លួនថា មាន
ក្រុងប៉ោយប៉ែត ៖ ករណីគួរឲ្យមានការភ្ញាក់ផ្អើលមួយបានកើតឡើងនៅវេលាម៉ោង២ជាងរសៀល ថ្ងៃទី១៧ កុម្ភៈ ២០១៧ ខណៈពេលដែលក្មេងប្រុសម្នាក់ឈ្មោះ សេងមុនី សូរ្យសែង អាយុ១០ឆ្នាំម្នាក់ រស់នៅក្នុងភូមិចាន់គិរី ក្រុងប៉ោយប៉ែត បានព្យាយាមលាក់បាំង ភូតភ ការពិត ប្រឌិតរឿងកុហកឪពុកម្តាយរបស់ខ្លួនថា មានជនសង្ស័យចំនួន៥នាក់ ជិះរថយន្តមកឈប់នៅមុខផ្ទះរបស់ខ្លួន ស្លៀកសម្លៀកបំពាក់ពណ៌ខ្មៅ មុខបិតម៉ាស់ មកចាប់ប្អូនប្រុសបង្កើតរបស់ខ្លួនឈ្មោះ សេង មុនីរិទ្ធិស័ក្ក អាយុ៨ឆ្នាំ ដាក់រថយន្ត រួចបើកចេញគេចទៅបាត់ស្រមោល ខណៈពេលគេជាបងឃើញហេតុការណ៍មានការភ័យស្លន់ស្លោ បានរត់ទៅលាក់ខ្លួនពួនអាត្មានៅក្នុងផ្ទះតែម្តង ។
លុះបន្ទាប់ក្រោយលោក តឹង គឹមសេង អាយុ៤៣ឆ្នាំ ត្រូវជាឪពុក និងលោកស្រី អ៊ុច សារ៉េត ហៅមុំ អាយុ៤៤ឆ្នាំ ត្រូវជាម្តាយ មកពីធ្វើការនៅកាស៊ីណូប៉ោយប៉ែតវិញ ត្រូវកូនប្រុសឈ្មោះសេង មុនីសូរ្យសែង បានរៀរាប់ប្រាប់ថា មានគេមកចាប់ប្អូនដាក់រថយន្ត រួចមក ពួកគាត់បាននាំគ្នាបកប្តឹងសមត្ថកិច្ចនគនរបាលក្រុងប៉ោយប៉ែត ឲ្យជួយអន្តរាគមន៍ដល់កូនរបស់គាត់ដែលរងគ្រោះផងដែរ ។
គួរកត់សម្គាល់ថា ខណៈពេលសមត្ថកិច្ចបានទទួលពាក្យបណ្តឹងពីក្រុមគ្រួសារជនរងគ្រោះរួចមក ព័ត៌មាននេះបានធ្វើឲ្យមានការភ្ញាក់ផ្អើលដល់លោកឧត្តមសេនីយ៍ទោ អាត់ ខែម ស្នងការខេត្តបន្ទាយមានជ័យ ដឹកនាំកម្លាំងក្រោមឱវាទចុះប្រតិបត្តិការទាំងយប់មកផ្ទះជនរងគ្រោះជាកន្លែងកើតហេតុសួរនាំស្រាវជ្រាវផងដែរ ។
លុះព្រឹកឡើងនៅទី១៨ ខែកុម្ភៈ នេះ លោក ង៉ោ ម៉េងជ្រួន អភិបាលក្រុងប៉ោយប៉ែត បានដឹកនាំកម្លាំងអធិការនគរបាលក្រុងដឹកនាំដោយលោក ធិន ស៊ិនដេត អធិការក្រុង និងលោក ជា ដា មេបញ្ជាការមូលដ្ឋានកងរាជអាវុធហត្ថក្រុង អាជ្ញាធរសង្កាត់-ភូមិ បន្តធ្វើការស្រាវជ្រាវដោយយកចិត្តទុកដាក់លើករណីមួយនេះ និងបានហៅក្មេងប្រុសឈ្មោះ សេង មុនីសូរ្យសែង អាយុ១០ឆ្នាំ ទៅសួរនាំម្តងទៀត ។ ទើបគេបានឆ្លើយសារភាពចំពោះមុខសមត្ថកិច្ចថា ប្អូនប្រុសខ្លួនមិនមាននរណាមកចាប់ខ្លួនដាក់ឡានអ្វីឡើយ គឺពួកគេបាននាំគ្នាជិះកង់ជាមួយមិត្តភក្តិមានគ្នា៤ ៥នាក់ទៅលេងទឹកស្រះមួយកន្លែងខាងជើងផ្ទះប្រហែលជា២គីឡូម៉ែត្រ ស្ថិតក្នុងភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត រួចហើយប្អូនប្រុសរបស់គេបានលង់ទឹកស្រះបាត់ខ្លួនហើយ ។ បន្ទាប់មកពួកគេនាំគ្នាមកផ្ទះវិញ ខ្លាចឪពុកម្តាយវាយធ្វើបាប ក៏បានប្រឌិតរឿងកុហកឪពុកម្តាយ ថា មានគេជិះរថយន្តមកចាប់ប្អូនញាត់ឡានយកទៅបាត់តែម្តងទៅ ។
សូមបញ្ជាក់ថា ក្រោយពីដឹងការពិតហើយនោះ សមត្ថកិច្ច រួមទាំងក្រុមគ្រួសារជនរងគ្រោះបាននាំគ្នា រាវរកសាកសពក្មេងរងគ្រោះរហូតដល់វេលាម៉ោង៥និង៣០នាទីល្ងាចថ្ងៃដដែលនេះ ទើបរកឃើញសាកសពនោះ ហើយប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីផងដែរ។
គួររំលឹកផងដែរថា រណ្តៅដីជ្រៅៗស្ទើរចេញក្បាលប្រេត៍ ដែលគេជីកកកាយយកអាចម៍ដីលក់ធ្វើជាផលប្រយោជន៍ផ្ទាល់ខ្លួន គេសង្កេតឃើញកើតមានជាច្រើនកន្លែងណាស់ នៅក្នុងសង្កាត់ផ្សារកណ្តាល ក្រុងប៉ោយប៉ែតនេះ ។
ដោយប្រភពបានឲ្យដឹងថា មានដូចជា ក្រុមហ៊ុន ហ៊ុល សេងហាប់ ត្រូវជាកូនលោកគាត ហ៊ុល លោកចៅសង្កាត់ផ្សារកណ្តាល, ក្រុមហ៊ុន លោកតាំង តេងពាវ និងមានក្រុមហ៊ុនមួយចំនួនទៀត ដែលប្រកបអាជីវកម្មដឹកអាចម៍ដីលក់ ដើម្បីផលប្រយោជន៍ផ្ទាល់ខ្លួន ដោយមិនបានគិតគូរពីសុខទុក្ខរបស់ប្រជាពលរដ្ឋនោះឡើយ ។
ប្រជាពលរដ្ឋបានលើកឡើងថា ហានិភ័យដែលធ្វើឲ្យក្មេងប្រុសម្នាក់នេះបាត់បង់ជីវិត ដោយការលង់ទឹកស្លាប់នេះ គឺដោយសារតែ អស់លោកជាអាជ្ញាធរមានសមត្ថកិច្ចទាំងនោះ គិតតែពីផលប្រយោជន៍ផ្ទាល់ខ្លួន ហើយពុំបានគិតគូរយកចិត្តទុកដាក់ឲ្យបានខ្ពស់នូវបញ្ហាសន្តិសុខសង្គមជាចម្បង ឲ្យស្របតាមយុទ្ធសាស្ត្ររបស់សម្តេចតេជោ ហ៊ុន សែន ជាប្រមុខថ្នាក់ដឹកនាំសម្រាប់ទៅថ្ងៃអនាគត នោះឡើយ ៕
ចែករំលែកព័តមាននេះ