រាជធានីភ្នំពេញ ៖ នៅព្រឹកថ្ងៃអាទិត្យ ទី១៩ កុម្ភៈ ខានស្អែកនេះ ប្រដាល់អន្តរជាតិពេលព្រឹករបស់ស្ថានីយទូរទស្សន៍អាស៊ីអាគ្នេយ៍ នឹងបើករេញឱ្យកីឡាករជើងខ្លាំង២រូបគឺ ផាន់ គ្រាន់ និងរឿង សារ័ត្ន ឡើងប៉ះ
រាជធានីភ្នំពេញ ៖ នៅព្រឹកថ្ងៃអាទិត្យ ទី១៩ កុម្ភៈ ខានស្អែកនេះ ប្រដាល់អន្តរជាតិពេលព្រឹករបស់ស្ថានីយទូរទស្សន៍អាស៊ីអាគ្នេយ៍ នឹងបើករេញឱ្យកីឡាករជើងខ្លាំង២រូបគឺ ផាន់ គ្រាន់ និងរឿង សារ័ត្ន ឡើងប៉ះថៃសាកកណ្ដាប់ដៃគ្នា ។
អ្វីដែលគេកត់សម្គាល់គឺការប្រកួតរបស់គូទាំង២រំពឹងថា នឹងទាក់ទាញចំណាប់អារម្មណ៍ទស្សនិកជនដែលនិយមទស្សនាការប្រដាល់ដោយសារតែកីឡាករកម្ពុជា និងថៃសុទ្ធតែចង់ឈ្នះគ្នារៀងខ្លួន ។
ការប្រកួតដែលនឹងធ្វើឡើងចាប់ពីម៉ោង៨ព្រឹកក្រោមការរៀបចំរបស់ស្ថានីយទូរទស្សន៍អាស៊ីអាគ្នេយ៍នេះ ត្រូវគេឃើញថា នៅតែមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ បើទោះជាពេលវេលាប្រកួតត្រូវចំព្រឹកថ្ងៃអាទិត្យដែលអ្នកណាៗក៏ចូលចិត្តដើរកម្សាន្តក្ដី ។ អ្នករៀបចំកម្មវិធីបានអះអាងថា ទូរទស្សន៍អាស៊ីអាគ្នេយ៍មិនភ័យរឿងខ្វះអ្នកទស្សនាកកកុញនោះទេ ដោយសារតែទីតាំងសង្វៀនរបស់ខ្លួនស្ថិតក្នុងទីប្រជុំជនហើយមានមនុស្សរស់នៅកុះករ ។ ក្នុងនោះសូម្បីតែការប្រកួតធម្មតារវាងកីឡាករជាតិ និងកីឡាករជាតិ ក៏មានអ្នកទស្សនាច្រើននោះដែរ ជាពិសេសអ្នកចូលចិត្តតាមដានប្រដាល់ ។
លោកថា កីឡាករកម្ពុជា២រូប គឺផាន់ គ្រាន់ និងរឿង សារ័ត្ន នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅព្រឹកថ្ងៃអាទិត្យខានស្អែក ។ អ្នករៀបចំការប្រកួតបានអះអាងថា កីឡាករទាំង៤មានបំណងប៉ះគ្នាយូរហើយ ដោយគ្រាន់តែបានដឹងថា នឹងត្រូវឡើងប្រកួតជាមួយកីឡាករថៃទាំង២រូប ទទួលយកដោយការពេញចិត្តហើយក៏បានត្រៀមខ្លួនក្នុងការប៉ះគ្នាផងដែរ។ លោកថា សម្រាប់កីឡាករកម្ពុជាសុទ្ធតែបានត្រៀមខ្លួនមុនពេលប៉ះគ្នាបន្ទាប់ពីបានចំណាយពេលច្រើនក្នុងការហ្វឹកហាត់ ទើបលោកសម្រេចដាក់ឱ្យកីឡាករកម្ពុជាឡើងប្រកួតជាអន្តរជាតិ ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ផាន់ គ្រាន់ មកពីក្លិបសាលវ័ន្តកីឡាដែលទើបប្រកាសថា ចង់ឡើងរេញឱ្យបានញឹកញាប់ដើម្បីកន្ត្រាក់អារម្មណ៍មហាជនបានច្រើនឡើងវិញ ឱ្យឡើងប៉ះប្រកួតជាមួយកីឡាករថៃឈ្មោះ Sang Yout ក្នុងនាមជាគូឯកបើកឆាកសម្រាប់ប្រដាល់អន្តរជាតិនៅព្រឹកថ្ងៃអាទិត្យនោះ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកមានបំណងចង់ឱ្យគេប៉ះគ្នាជាមួយគូបរទេសនៅក្នុងព្រឹត្តិការណ៍នេះតែម្ដង ទើបលោកយល់ថា ការប្រកួតដែលនឹងធ្វើឡើងពិតជាមានអ្នកគាំទ្រភាគច្រើនពេញចិត្ត ។ លោកថា កីឡាករ ផាន់ គ្រាន់ អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិ ទើបលោកយល់ថាវត្តមានរបស់កីឡាកររូបនេះ អាចនឹងធ្វើឱ្យព្រឹតិ្តការណ៍ប្រដាល់ព្រឹកខានស្អែកទទួលការចាប់អារម្មណ៍ខ្ពស់ ។
លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក។ លោកថា កីឡាករកម្ពុជារូបនេះមានការឈានឡើងសមត្ថភាព ហើយបើទោះជាការប្រកួតប៉ុន្មានលើកចុងក្រោយមានការប្រែប្រួលក៏នៅតែខ្លាំងផងដែរ ។ លោកនិយាយថា ផាន់ គ្រាន់ ដ្បិតថាមិនមែនជាម្ចាស់ជើងឯក ប៉ុន្តែការប្រកួតកន្លងមករបស់គេមានការទទួលស្គាល់ តែលោកក៏មិនបារម្ភរឿងគេប្រកួតមិនអស់ដៃនោះដែរ ដោយសារតែពេលកន្លងមក កីឡាកររូបនេះបើទោះជាចាញ់ក៏ល្អមើលដែរ ។ លោកថា កីឡាករថៃធ្លាប់ប្រកួតបាន៧៦លើក ឈ្នះ៦២លើក ចាញ់១៣លើក និងស្មើ១លើក ប៉ុន្តែសមត្ថភាពកីឡាកររូបនេះមិនអាចមើលស្រាលបានឡើយ ។ ដោយឡែកសម្រាប់កីឡាករកម្ពុជាធ្លាប់ប្រកួតច្រើនជាងគេដល់៨៦លើក ឈ្នះ៧២លើក ចាញ់១៣លើក និងស្មើ១លើក ។
សម្រាប់កីឡាករ រឿង សារ័ត្ន ដែលជាកីឡាករវ័យក្មេងមកពីក្លិបកងទ័ពឆត្រយោង៩១១ លោក ញាណ សុធី បញ្ជាក់ថា គេត្រូវប៉ះប្រកួតជាមួយកីឡាករថៃឈ្មោះ Phik Rabkhav ជាជើងខ្លាំងមកពីប្រទេសថៃដូចគ្នានៅក្នុងព្រឹត្តិការណ៍ប្រដាល់អន្តរជាតិនោះដែរ ។ លោកថា ការប្រកួតរបស់គូនេះ នៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលរឿង សារ័ត្ន ដ្បិតថាឈានឡើងតែការប្រកួតរបស់គេពេលខ្លះក៏ល្អ ហើយពេលខ្លះក៏ធ្លាក់ដៃដែលធ្វើឱ្យអ្នកគាំទ្រពិបាកស្ទង់សមត្ថភាពនៅលើសង្វៀន ។ កីឡាករថៃធ្លាប់ប្រកួត៦៦លើក ឈ្នះ៥២លើក និងចាញ់១៤លើក រីឯកីឡាករកម្ពុជាធ្លាប់ប្រកួត៥៥លើក ឈ្នះ៤៥លើក និងចាញ់១០លើកនៅលើសង្វៀន ៕
ចែករំលែកព័តមាននេះ