វាយប្រហារអត្តឃាតក្នុងទីតាំងសាសនាមួយនៅប៉ាគីស្ថានស្លាប់ដល់ជាង70នាក់

ថ្ងៃទី ១៧ ខែ កុម្ភៈ ឆ្នាំ ២០១៧
ម៉ោង ០៣:២៤
bopha bopha

ការវាយប្រហារអត្តឃាតមួយប្រកាសទទួលខុសត្រូវដោយក្រុមរដ្ឋអ៊ិស្លាម បណ្តាលឱ្យមនុស្សស្លាប់ជាង៧០នាក់ និងរបួស២០០នាក់ កាលពីយប់ថ្ងៃទី១៦ កុម្ភៈ ក្នុងទីតាំងសាសនាមួយនាភាគខាងត្បូងប៉ាគីស្ថាន ញ៉ាំងឱ្យប្រទេសនេះមានការក្តុកក្តួល ក្រោយការវាយប្រហារភេរវកម្មមួយចំនួនទៀតចាប់តាំងពីដើមសប្តាហ៍នេះមក ។

លោក KHAWAJA ប្រមុខប៉ូលិសខេត្ត SINDH ថ្លែងប្រាប់ AFP ថា មនុស្សយ៉ាងតិច៧២នាក់ស្លាប់ ហើយជាង២០០នាក់ រងរបួសពេលជនអត្តឃាតម្នាក់ធ្វើឱ្យផ្ទុះក្នុងទីតាំងសាសនានេះនៃទីក្រុង SEHWAN ខេត្ត SINDH ភាគខាងត្បូងប្រទេស ។

ក្រុមរដ្ឋអ៊ិស្លាមតាមរយៈទីភ្នាក់ងារព័ត៌មាន AMAQ ជាភាសាអារ៉ាប់របស់ខ្លួននិយាយថា ជនអត្តឃាតម្នាក់បានធ្វើឱ្យគ្រឿងផ្ទុះនៅចង្កេះរបស់គេផ្ទុះចំកណ្តាលការប្រមូលផ្តុំរបស់សាសនិកអ៊ិស្លាមស៊ីអីុតក្នុងព្រះវិហារ LAL SHAHBAZ QALANDER ខេត្ត SINDH ។

នេះជាលើកទី២ ហើយរយៈពេលមិនដល់៣ខែផង ដែលក្រុមរដ្ឋអ៊ិស្លាមប្រកាសទទួលខុសត្រូវលើការវាយប្រហារប្រឆាំងទីតាំងសាសនានៅប៉ាគីស្ថាន ។ កាលពីថ្ងៃទី១២ វិច្ឆិកា ឆ្នាំទៅមិញ មនុស្សយ៉ាងតិច៥២នាក់ស្លាប់រួចហើយ និង១០០នាក់ទៀត រងរបួសពេលជនអត្តឃាតម្នាក់ជាមនុស្សក្រុមរដ្ឋអ៊ិស្លាមធ្វើឱ្យផ្ទុះក្នុងព្រះវិហារមួយនៃខេត្តបាលូជីស្ថាន ភាគនិរតីប្រទេស ។

លោក RASOOL BUX ប្រមុខប៉ូលិសមូលដ្ឋានម្នាក់ថ្លែងថា ការផ្ទុះកើតមាននាវេលាម៉ោង១៩ម៉ោងក្នុងស្រុក ។ ជនអត្តឃាតម្នាក់បានចូលក្នុងព្រះវិហារ LAL SHAHBAZ QALANDAR កាត់មនុស្សម្នាដែលប្រមូលផ្តុំគ្នានៅច្រកទ្វារមាសមុនពេលចុចគ្រាប់បែកឱ្យផ្ទុះកណ្តាលក្រុមមនុស្សកុះករកំពុងធ្វើកិច្ចសាសនាខាងក្នុងព្រះវិហារ ។ មនុស្សរវាងពី៥០០ទៅ៨០០នាក់មកពីកន្លែងនានាក្នុងប្រទេសស្ថិតក្នុងព្រះវិហារពេលផ្ទុះគ្រាប់បែក ។

ឧត្តមសេនីយ៍ ASIF GHAFOOR អគ្គនាយកផ្នែកសារព័ត៌មានរបស់កងទ័ពថ្លែងថា កងទាហានត្រូវបានបញ្ជូនមកដើម្បីចូលរួមក្នុងការជួយសង្គ្រោះ ។ ម្យ៉ាងវិញទៀត កងទ័ពបានផ្តល់ឧទ្ធម្ភាគចក្រនានារបស់កងម៉ារីន ដែលអាចហោះហើរពេលយប់ និងយន្តហោះដឹកជញ្ជូនយោធា C-130 មួយគ្រឿង ដើម្បីដឹកបណ្តាអ្នករបួសធ្ងន់ទៅកាន់ទីក្រុងការ៉ាជីទីប្រជុំជនខេត្ត SINDH ។ កងកម្លាំងប៉ូលិសត្រូវបានបញ្ជូនមកឡោមព័ទ្ធតំបន់នេះក្រោយការផ្ទុះបន្តិច ។

នាយករដ្ឋមន្ត្រីប៉ាគីស្ថាន លោកណាវ៉ាហ្វ សារីហ្វ បានថ្កោលទោសការវាយប្រហារនេះ ហើយស្នើឱ្យគ្រប់ផ្នែកយកចិត្តទុកដាក់ជួយព្យាបាលបណ្តាអ្នករបួស ៕