រាជធានីភ្នំពេញ ៖ បង្ក្រាបករណីចែកចាយ និងប្រើប្រាស់គ្រឿងរយៈពេលពីរសប្តាហ៍ក្នុងខែកុម្ភៈ ឆ្នាំ២០១៧ បាន៤៥៦ករណីឃាត់ខ្លួនជនសង្ស័យ១.០៤៣នាក់ និងចាប់ …
រាជធានីភ្នំពេញ ៖ បង្ក្រាបករណីចែកចាយ និងប្រើប្រាស់គ្រឿងរយៈពេលពីរសប្តាហ៍ក្នុងខែកុម្ភៈ ឆ្នាំ២០១៧ បាន៤៥៦ករណីឃាត់ខ្លួនជនសង្ស័យ១.០៤៣នាក់ និងចាប់សារធាតុញៀនសរុប៥.២២៩,៦៣ក្រាម ។ នេះបើយោងតាមរបាយការណ៍នៅក្នុងកិច្ចប្រជុំបូកសរុបលទ្ធផលអឌ្ឍមាស ខែកុម្ភៈ នៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ នាព្រឹកថ្ងៃទី១៦ ខែកុម្ភៈ ឆ្នាំ២០១៧ នៅអគ្គស្នងការដ្ឋាននគរបាលជាតិ ។
លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងជាប្រធានលេខាធិការដ្ឋាន នៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់ បានឲ្យមានប្រសាសន៍ថា ករណីនៃការប្រើប្រាស់ និងជួញដូរគ្រឿងញៀនខុសច្បាប់ ក្នុងដើមខែកុម្ភៈ មានការថយចុះ ៤៥៦/៥៨៨ករណី ថយ១៣២ករណី ទោះបីជាមានការថយចុះក៏ពិតមែន កម្លាំងសមត្ថកិច្ចត្រូវតែបន្តតាមដានរាល់គោលដៅ ដើម្បីចាត់វិធានការក្នុងការបោសសំអាតជាដាច់ខាត ។
នៅក្នុងឱកាសនោះ លោកនាយឧត្តមសេនីយ៍ នេត សាវឿន ក៏បានឲ្យលេខាធិការដ្ឋានរៀបចំស្ប៉តវិដេអូជាសាច់រឿងដែលពាក់ព័ន្ធនឹងផលវិបាកនៃការប្រើប្រាស់គ្រឿងញៀន សម្រាប់ដាក់ផ្សព្វផ្សាយ អប់រំដល់ប្រជាពលរដ្ឋទូទាំងប្រទេស ។ ហើយត្រូវពង្រឹងទំនាក់ទំនងរវាងលេខាធិការដ្ឋានជាមួយគណៈកម្មការ និងអនុគណៈកម្មការចម្រុះប្រយុទ្ធប្រឆាំងគ្រឿងញៀនខុសច្បាប់ និងគណៈកម្មាធិការត្រួតពិនិត្យគ្រឿងញៀនរាជធានី-ខេត្ត ដើម្បីក្ដាប់ និងធ្វើរបាយការណ៍ឲ្យបានគ្រប់ជ្រុងជ្រោយផងដែរ ។
គួរបញ្ជាក់ថា លទ្ធផលក្នុងការបង្ក្រាបគ្រឿងញៀនរយៈពេល២សប្ដាហ៍ បង្ក្រាបបាន៤៥៦/៥៨៨ករណី ថយ១៣២ករណី ស្មើនឹង២២,៤៤% (ធៀបនឹងរយៈពេលដូចគ្នាខែមករា) ឃាត់ខ្លួន១.០៤៣/១.៤១៦នាក់ (ស្រី៩៧/៩១នាក់) ចាប់សារធាតុញៀនសរុប៥.២២៩,៦៣ក្រាម បំផ្លាញកញ្ឆា៥០.២២៣ដើម ដកហូតម៉ូតូ១៩គ្រឿង រថយន្ត២គ្រឿង អាវុធខ្លី១ដើម និងទូរស័ព្ទដៃ ៧៣គ្រឿង ក្នុងនោះករណីជួញដូរ២៧៥/៣២៦ករណី ឃាត់ខ្លួន៥០១/៧១៥នាក់ (ស្រី ៦៧/៥៥នាក់) និងប្រើប្រាស់១៨០/២៣១ករណី ឃាត់ខ្លួន៥៤២/៦៩៨នាក់ និងបង្ក្រាបករណីដាំដុះ១ករណី ។ ដោយឡែកបង្ក្រាបតាមដីកាចំនួន៤ដីកា ឃាត់ខ្លួន៤នាក់ (ករណីជួញដូរ) ។
កាលពីថ្ងៃទី១៣ ខែធ្នូ ឆ្នាំ២០១៦ កន្លងទៅ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានដាក់ចេញផែនការស្តីពី យុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ រយៈពេល៦ខែ (ចាប់ពីថ្ងៃទី០១ ខែមករា ដល់ថ្ងៃទី៣០ ខែមិថុនា ឆ្នាំ២០១៧) ដើម្បីប្រយុទ្ធប្រឆាំងគ្រឿងញៀននៅកម្ពុជា ឲ្យកាន់តែខ្លាំងក្លា និងទទួលបានលទ្ធផលល្អឡើងថែមទៀត ។ ហើយយុទ្ធនាការប្រយុទ្ធប្រឆាំងគ្រឿងញៀននេះ ដឹកនាំដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជាប្រធាន និងឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជាអនុប្រធាន ៕
ចែករំលែកព័តមាននេះ