រាជធានីភ្នំពេញ ៖ សភាពាណិជ្ជកម្ម និងសហគ្រានធុនតូចនិងមធ្យនៃប្រទេសថៃ បាននាំពាណិជ្ជករមកកម្ពុជា ដើម្បីចង់ឱ្យពាណិជ្ជករប្រទេសទាំងពីររួមដៃគ្នាផលិតនូវផលិតផលសម្រាប់ដាក់នៅលើទីផ្សារ
រាជធានីភ្នំពេញ ៖ សភាពាណិជ្ជកម្ម និងសហគ្រានធុនតូចនិងមធ្យនៃប្រទេសថៃ បាននាំពាណិជ្ជករមកកម្ពុជា ដើម្បីចង់ឱ្យពាណិជ្ជករប្រទេសទាំងពីររួមដៃគ្នាផលិតនូវផលិតផលសម្រាប់ដាក់នៅលើទីផ្សារប្រទេសទាំងពីរ និងស្វែងរកទំនិញកម្ពុជាមួយចំនួនយកទៅលក់នៅប្រទេសថៃ និងប្រទេសផ្សេងទៀត ។ នេះបើតាមប្រធានអនុគណៈកម្មការសភាពាណិជ្ជកម្មថៃសម្រាប់ប្រទេស CLMV ។
ក្នុងជំនួបជាមួយថ្នាក់ដឹកនាំក្រសួងពាណិជ្ជកម្ម កាលពីថ្ងៃទី១៥ កុម្ភៈ ម្សិលមិញនេះ អ្នកស្រី ដួងចៃ ច័ន្ទថន ប្រធានអនុគណៈកម្មការសភាពាណិជ្ជកម្មថៃសម្រាប់ប្រទេសCLMV បានឱ្យដឹងថា សភាពាណិជ្ជកម្មថៃ បាននាំពណិជ្ជករថៃជាង៣០ក្រុមហ៊ុនចូលរួមនៅក្រសួងពាណិជ្ជកម្មកម្ពុជាពេលនេះបានផ្តល់អត្ថប្រយោជន៍ច្រើនសម្រាប់សហគ្រាសធុនតូចនិងមធ្យមថៃបានដឹងពីព័ត៌មានវិនិយោគផ្សេងៗនៅកម្ពុជា ។
អ្នកស្រីបន្តថា ក្នុងជំនួបនេះ ខាងសហគ្រាសធុនតូចនិងមធ្យមថៃ ចាប់អារម្មណ៍ចង់ធ្វើការវិនិយោគនៅផ្នែក គ្រឿងឧបភោគបរិភោគនិងគ្រឿងប្រើប្រាស់ប្រចាំថ្ងៃ ដោយសារមើលឃើញសព្វថ្ងៃនេះ ប្រទេសកម្ពុជាបាននាំចូលមុខទំនិញមកពីបណ្តាប្រទេសផ្សេងៗមានចំនួនច្រើន។ អ្នកស្រីថា ៖ «យើងមិនមែនគិតថាគ្រាន់តែនាំគ្រឿងឧបភោគបរិភោគ និងផលិផលប្រើប្រាស់ប្រចាំថ្ងៃចូលមកកម្ពុជាទេ គឺយើងត្រូវការចង់ឱ្យសហគ្រាសធុនតូច និងមធ្យមកម្ពុជា-ថៃ ធ្វើការវិនិយោគរួមគ្នានៅថ្ងៃខាងមុខ » ។លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម មានប្រសាសន៍ថា នេះជាឱកាសមួយសម្រាប់សហគ្រាសធុនតូចនិងមធ្យមថៃ ដែលចង់ធ្វើការវិនិយោគ ពង្រីកទីផ្សាររបស់គេ ហើយអាចបង្កើននូវទំហំពាណិជ្ជកម្មទ្វេភាគី កម្ពុជា-ថៃឱ្យកើនឡើងដល់បីដង ដូចដែលរាជរដ្ឋាភិបាលនៃប្រទេសទាំងពីរបានឯកភាពគ្នាកាលពីឆ្នាំមុន ហើយនេះជាជំហានមួយក្នុងការធ្វើវិនិយោគទៅវិញទៅមក ។ លោកថ្លែងថា៖ « យើងឃើញថា បើគេចូលមកវិនិយោគនៅកម្ពុជា គឺអាចផ្តល់ការងារ និងប្រាក់ចំណូលបានសមរម្យសម្រាប់ពលរដ្ឋកម្ពុជាដែរ»៕
ចែករំលែកព័តមាននេះ