កាសែតញូវយ៉កថែម អះអាងកាលពីថ្ងៃទី១៤ កុម្ភៈ ថា ប្រទេសរុស្ស៊ីបានដាក់ពង្រាយជាសម្ងាត់នូវមីស៊ីលបណ្តែតថ្មីមួយ ដែលរំលោភបំពានដល់សន្ធិសញ្ញាឆ្នាំ១៩៨៧ ស្តីពីកម្លាំងនុយក្លេអ៊ែររយៈមធ្យម INF ។
កាសែតអាមេរិកនេះសរសេរថា ការដាក់ពង្រាយមីស៊ីល SSC-8 ញ៉ាំងឱ្យមានការប្រឈមធ្ងន់ធ្ងរមួយសម្រាប់រដ្ឋាភិបាលថ្មីរបស់លោកដូណាល់ ត្រាំ និងទំនាក់ទំនងរុស្ស៊ី-អាមេរិក ។ ដោយស្រង់សម្តីរបស់បណ្តាអ្នកទទួលខុសត្រូវអាមេរិក កាសែតនេះគូសបញ្ជាក់ថា ក្រុងមូស្គូបានដាក់ពង្រាយកងវរសេនាតូចចល័ត២ បំពាក់ដោយមីស៊ីល SSC-8 ដោយកងវរសេនាតូចមួយ ស្ថិតនៅទីតាំងសាកល្បង KAPOUSTINE YAR ជិតទីក្រុងវ៉ុលហ្គោរ៉ាត ហើយកងវរសេនាតូចមួយទៀតស្ថិតនៅទីតាំងនោះដែរ មុនពេលបញ្ជូននាខែធ្នូកន្លងទៅ ឆ្ពោះទៅកាន់កន្លែងពុំបញ្ជាក់មួយ ។
រដ្ឋការលោកបារ៉ាក់ អូបាម៉ា ធ្លាប់អះអាងរួចហើយកាលពីឆ្នាំ២០១៤ថា រុស្ស៊ីសាកល្បងមីស៊ីលនេះ ដោយរំលោភបំពានលើសន្ធិសញ្ញា INF ។ សន្ធិសញ្ញានេះ ត្រូវបានចុះហត្ថលេខាកាលពីឆ្នាំ១៩៨៧ ដោយប្រធានាធិបតីអាមេរិក លោករ៉ូណាល់រី ហ្គេន និងសមភាគីសូវៀត លោកមីខាអីុល ហ្គ័របាឆូវ ។ សន្ធិសញ្ញានេះ សំដៅលុបបំបាត់ចោលរាល់មីស៊ីលបណ្តែត និងបាលីស្ទិកបាញ់ចេញពីដី ។
រុស្ស៊ីនៅពុំទាន់បញ្ចេញប្រតិកម្មតបភ្លាមៗចំពោះអត្ថបទនេះ របស់កាសែតញូវយ៉កថែមនៅឡើយ ។ ទោះបីមានការចោទប្រកាន់ពីការលួចខាងព័ត៌មានវិទ្យាពីសំណាក់រុស្ស៊ីពេលមានយុទ្ធនាការបោះឆ្នោតអាមេរិក ក៏លោកដូណាល់ ត្រាំ សន្យាកែលម្អទំនាក់ទំនងជាមួយវិមានក្រឹមឡាំង ពិសេសដើម្បីពង្រឹងការតស៊ូប្រឆាំងភេរវកម្ម ។
ការលាតត្រដាងនេះរបស់កាសែតញូវយ៉កថែមធ្វើឡើងបន្ទាប់ពីការលាលែងពីតំណែងរបស់ទីប្រឹក្សាសន្តិសុខជាតិអាមេរិក លោក MICHAEL LLYNN ដែលទទួលការចោទ
ប្រកាន់ថា បានពិភាក្សាពីទណ្ឌកម្មអាមេរិកប្រឆាំងក្រុងមូស្គូជាមួយឯកអគ្គរដ្ឋទូតរុស្ស៊ីប្រចាំសហរដ្ឋអាមេរិកប៉ុន្មានថ្ងៃមុន លោកត្រាំ ចូលកាន់តំណែង ៕
ចែករំលែកព័តមាននេះ