អង្គការសិទ្ធិមនុស្សស៊ីរី OSDH មានប្រភពព័ត៌មានច្រើនក្នុងប្រទេសរាយការណ៍ថា ការប្រយុទ្ធគ្នានានាផ្ទុះឡើងកាលពីថ្ងៃទី១៣ កុម្ភៈ នៅភាគពាយ័ព្យស៊ីរី រវាងពួកឧទ្ទាមស្និទ្ធនឹងក្រុមរដ្ឋអ៊ិស្លាម និងក្រុមអ៊ិស្លាមនិយមមួយទៀត ។
ការប៉ះទង្គិចគ្នារវាងក្រុម DJOUND AL AQSA និងក្រុម TAHRIR AL CHAM ដែលកើតមាននៅភាគខាងជើងខេត្តហាម៉ា និងនៅភាគខាងត្បូងខេត្តអីុដលីបជិតខាងត្រូវបានអះអាងប្រាប់រ៉យទ័រ ដោយអ្នកទទួលខុសត្រូវម្នាក់របស់ក្រុមកងទ័ពស៊ីរីសេរី ASL ជាក្រុមឧទ្ទាមនិយមកណ្តាលមួយ ។ អ្នកទទួលខុសត្រូវរូបនេះបន្តថា ក្រុម ASL ពុំបានចូលរួមក្នុងការប៉ះទង្គិចគ្នាទាំងនេះទេ ។
ចាប់តាំងពីកងទ័ពរដ្ឋាភិបាលស៊ីរី ទទួលបានជ័យជម្នះក្នុងការវាយរំដោះក្រុងអាឡែបទាំងមូលកាលពីខែធ្នូមក ពួកឧទ្ទាមជាច្រើនក្រុមបែកបាក់គ្នាហើយប្រឆាំងគ្នានៅភាគពាយ័ព្យប្រទេស ដើម្បីដណ្តើមត្រួតត្រាដែនដី និងប្រភពធនធាននានា ។
ម្យ៉ាងវិញទៀត ការប៉ះទង្គិចគ្នាយ៉ាងខ្លាំងក្លាកើតមានរវាងកងទ័ពស៊ីរី និងពួកបះបោរនៅទីក្រុងដីរ៉ាអា ជាទីក្រុងមួយនាភាគខាងត្បូងប្រទេសក្បែរព្រំដែនហ្ស៊កដានី ។
ពួកឧទ្ទាមក្រុម ASL និងបណ្តាចលនាជីហាដចាប់តាំងពីថ្ងៃទី១២ កុម្ភៈ មក ខិតខំវាយប្រហារដណ្តើមយកសង្កាត់យុទ្ធសាស្ត្រ MANCHIYA ដើម្បីរារាំងកងទ័ពរដ្ឋាភិបាលមិនឱ្យបើកផ្លូវពាណិជ្ជកម្មមួយរវាងព្រំដែនហ្ស៊កដានី និងក្រុងដាម៉ាស់ ៕
ចែករំលែកព័តមាននេះ