ខេត្តត្បូងឃ្មុំ ៖ ផ្កាចំប៉ីត្រូវបានប្រជាពលរដ្ឋក្នុង ភូមិទួលសំបូរ ឃុំជប់ ស្រុកត្បូងឃ្មុំ នាំគ្នាដាំដុះដោយបានកកើតតាំងពីសម័យបារាំងបន្តរហូតមកដល់បច្ចុប្បន្ននេះ
ខេត្តត្បូងឃ្មុំ ៖ ផ្កាចំប៉ីត្រូវបានប្រជាពលរដ្ឋក្នុង ភូមិទួលសំបូរ ឃុំជប់ ស្រុកត្បូងឃ្មុំ នាំគ្នាដាំដុះដោយបានកកើតតាំងពីសម័យបារាំងបន្តរហូតមកដល់បច្ចុប្បន្ននេះ ដោយតែលក់បានថ្លៃនៅលើទីផ្សារដែលត្រូវបានឈ្មួញកណ្តាលមកប្រមូលទិញ នាំចេញទៅកាន់ប្រទេសវៀតណាម ។ ប៉ុន្តែមកដល់សព្វថ្ងៃនេះគឺយំមិនចេញនោះទេ ដោយសារតម្លៃលក់បានថោកបំផុត មិនធ្លាប់មានក្នុងប្រវត្តិសាស្ត្រ អ្នកខ្លះនាំគ្នាកាប់ចោលទៅដាំម្រេច និងចេកវិញ។
អាជីវករឈ្មោះ ជិន ផាន់នី ភេទប្រុស អាយុ៥៤ឆ្នាំ មានប្រសាសន៍ឲ្យដឹងនៅព្រឹកថ្ងៃទី៨ កុម្ភៈ ២០១៧ថា សម្រាប់អ្នកភូមិទួលសំបូរស្ទើរតែទាំងអស់បាននាំគ្នាដាំផ្កាចំប៉ីទៅតាមទំហំដី ក្នុងនោះមានអ្នកខ្លះដាំ១ហិកតា និងខ្លះទៀតលើសនេះទៅទៀត ព្រោះតែផ្កានៅពេលដែលហាលស្ងួតយកទៅលក់នឹងបានតម្លៃថ្លៃចាប់ពី៣៥.០០០រៀល ទៅ៤០.០០០រៀល កាលពីឆ្នាំ២០១៤កន្លងទៅ។ អាជីវករឈ្មោះ ផាន់នី បានបន្តថា គ្រួសារនីមួយៗនៅពេលដែលលក់ផ្កានេះបានហើយនឹងទទួលបានកំរៃក្រាស់ក្រែលសម្រាប់ដោះស្រាយជីវភាពគ្រួសារ មិនដែលទៅដាំដំណាំផ្សេងៗទៀតទេ របរនេះត្រូវបានបន្តវេនពីឪពុកម្តាយមកកូនថែមទៀត។
ដូចជារូបលោកផ្ទាល់ត្រូវបានប្រមូលទិញពីប្រជាពលរដ្ឋក្នុងភូមិលុះពេលដែលបានច្រើន និងមានឈ្មួញធំមកប្រមូលទិញនាំចេញ ទៅប្រទេសវៀតណាម។ តែមកដល់ឆ្នាំ២០១៦ តម្លៃផ្កាចំប៉ីស្ងួត ក្នុង១គីឡូក្រាមតំលៃ៤.០០០រៀល ហើយមកដល់ខែកុម្ភៈ ២០១៧ តម្លៃបានស្រុតចុះយ៉ាងខ្លាំងមកនូវត្រឹមតែ២.០០០រៀល ស្របពេលដែលថោកដូច្នេះ ហើយនោះលក់មិនចេញទៀតពោលគឺ មិនទាន់នឹងមានឈ្មួញមករកទិញនូវឡើយទេ។ កាលពីមុននៅពេលដែលនាំចេញទៅវៀតណាមលក់បានថ្លៃមែន តែចុងក្រោយនេះមានជនជាតិចិនបានចុះមកទិញពីអ្នកភូមិដល់កន្លែងស្រាប់តែចុះថោកហៅមិនឮ។
ស្ត្រីឈ្មោះ លី ចំរើន អាយុ៥២ឆ្នាំ នៅភូមិទួលសំបូរ ឃុំជប់ ប្រាប់ឲ្យដឹងថា គាត់បានដាំផ្កាចំប៉ីនេះនៅលើផ្ទៃដី៣ហិកតា កន្លងមកលក់បានថ្លៃនៅពេលដែលហាលស្ងួត ហើយបានធ្វើឲ្យជីវភាពរបស់គាត់បានធូរស្រាលច្រើនមិនមានការខ្វះខាតនោះទេ ព្រោះក្នុង១ហិកតាបានហុចផលជិត១តោនផងដែរ។ ជាក់ស្តែងក្នុងឆ្នាំ២០១៧នេះ តម្លៃផ្កាចំប៉ីបានចុះថោកខ្លាំងណាស់១គីឡូក្រាម តំលៃបានតែ២.០០០រៀល បើអ្នកផ្សេងវិញនឹងត្រូវកាប់ចោលដាំដំណាំផ្សេងៗទៀតដើម្បីទ្រទ្រង់ជីវភាពគ្រួសារ តែគាត់វិញមិនកាប់ចោលទេ គឺចេះតែថែរក្សាបន្តទៀត ព្រោះគាត់រាងចាស់ហើយ មិនមានកម្លាំងដូចក្មេងទៅដាំដំណាំក្រៅពីនេះសម្រាប់ដោះស្រាយជីវភាព ។
ប្រជាពលរដ្ឋក៏សំណូមពរដល់ប្រមុខរាជរដ្ឋាភិបាលសូមធ្វើយ៉ាងណាដែលមានកន្លែងផលិតនូវវត្ថុធាតុដើមខាងលើក្នុងស្រុកនោះ តម្លៃមិនចុះថោកតាមតែឈ្មួញកណ្តាលប្រមូលទិញនោះទេ បើមានបែបនេះផ្កាចំប៉ីនឹងបានឡើងថ្លៃវិញមិនខាន។ ចំណែកលោក ហេង ពិសិដ្ឋ ប្រធានមន្ទីរកសិកម្មរុក្ខាប្រមាញ់ និងនេសាទខេត្តត្បូងឃ្មុំ ប្រាប់ឲ្យដឹងនៅរសៀលថ្ងៃទី៨ កុម្ភៈ ២០១៧ថា នាពេលកន្លងទៅរូបលោកបានចុះទៅជួបពិភាក្សាជាមួយនឹងប្រជាពលរដ្ឋនៅភូមិទួលសំបូរ ឃុំជប់ ស្រុកត្បូងឃ្មុំ ក្នុងពេលដែលផ្កាចំប៉ីបានធ្លាក់ចុះ ដើម្បីឲ្យពួកគាត់ដាំដំណាំរួមផ្សំផ្សេងៗទៀតក្នុងនោះមានដូចជាស្ពៃក្តោបក្រោមដើមចំប៉ី សម្រាប់ទ្រទ្រង់ជីវភាព។ តែដីទីនោះស្ងួតមិនសូវល្អធ្វើបែបនេះរងចាំដូចដំណាំកៅស៊ូ ហើយក្នុងពេលណាមួយក្រែងនឹងហក់ឡើងថ្លៃវិញ៕
ចែករំលែកព័តមាននេះ