ខេត្តកំពង់ឆ្នាំង៖ បទល្មើសនេសាទ នៅតែបន្តកើតមានឡើង បើទោះបីមន្ត្រីជំនាញ បានខិតខំធ្វើការអប់រំផ្សព្វផ្សាយឱ្យបញ្ឈប់ការនេសាទ ដោយប្រើឧបករណ៍ល្មើសច្បាប់ ក្នុងរដូវហាមឃាត់ ពេលទឹកឡើងនេះ យ៉ាងណាក្តី។

ជាក់ស្ដែង នៅថ្ងៃទី ៨ ខែកញ្ញា ឆ្នាំ២០២២ សមត្ថកិច្ចសម្រុះ បានសហការគ្នាជាមួយ​គណៈបញ្ជាការ​ឯកភាពស្រុកបរិបូណ៌ និងគណៈបញ្ជាការឯកភាពស្រុកកំពង់ត្រឡាច ព្រមទាំង​សហគមន៍នេសាទបានធ្វើការ បង្ក្រាបបទល្មើសនៅទីតាំងភូមិសាស្ត្រ ស្រុកទាំង២ខាងលើនេះ។

លោក លី ឡា នាយខណ្ឌរដ្ឋបាលជលផលនៃមន្ទីរកសិកម្មរុក្ខាប្រមាញ់ និងនេសាទ ខេត្តកំពង់ឆ្នាំង បានឱ្យដឹងថា ការបង្ក្រាបបទល្មើស គឺបានធ្វើឡើងស្ទើររៀងរាល់ថ្ងៃ ក្នុងរដូវហាមឃាត់​នេសាទ ដែលជា​រដូវត្រីពងកូន។ ជាក់ស្ដែង នៅថ្ងៃនេះ (៨ ខែកញ្ញា) សមត្ថកិច្ចចម្រុះ និងមន្ត្រីជំនាញខណ្ឌរដ្ឋបាលជលផល បានសហការគ្នាចុះបង្ក្រាបបទល្មើសក្នុងភូមិសាស្ត្រ ស្រុកបរិបូរណ៌ និងស្រុកកំពង់ត្រឡាច ដែលមាននៅចំណុច​ឃុំអំពិលទឹក, ចំណុចស្ដីបន្លិច, ចំណុចព្រែកគន្លង, ចំណុចព្រែកអាម៉ាល់, និងចំណុចប្រឡាយដៃត្រង់។

ប្រភពដដែលបានបន្តថា​ ក្នុងកិច្ចប្រតិបត្តិការបង្ក្រាប គឺបានប្រើប្រាស់មធ្យោបាយកាណូតបាឡាស្មាច់ ចំនួន ៦ គ្រឿង មានកម្លាំងសមត្ថកិច្ចសរុប ចំនួន ២២នាក់ និងជាលទ្ធផល បានធ្វើការរុះរើរបាំងសាច់អួន ចំនួន ២កន្លែង មានប្រវែង ២៥០ម៉ែត្រ លបលូសាច់អួនចំនួន ៥លប , រុះរើរបាំងស្បៃមុង ២៤ កន្លែង មានលបលូស្បៃមុខ ២៤លប ,បង្គោល ៧៥០ដើម និងចាក់លែងកូនត្រីចម្រុះចូលទន្លេវិញចំនួន ៥០គីឡូក្រាម​។

លោក លី ឡា បានអំពាវនាវដល់បងប្អូនប្រជាពលរដ្ឋ សូមមេត្តាបញ្ឈប់ការនេសាទដោយប្រើ​ឧបករណ៍ល្មើសខុសច្បាប់ ពិសេស​នៅ​ក្នុងរដូវហាមឃាត់ ពេល​នេះ ដើម្បីទុក​ឱ្យត្រីពងកូន​៕ ពៅ សុខហ៊ាន