ជាមួយការកើនឡើងនៃការប្រយុទ្ធគ្នា និងការចាក់ឫសរបស់ក្រុមរដ្ឋអ៊ិស្លាមនៅអាហ្វហ្គានីស្ថាន ឆ្នាំ២០១៦ ជាឆ្នាំដែលមានប្រជាជនស៊ីវិលស្លាប់ច្រើនបំផុតក្នុងប្រទេសនេះ ចាប់តាំងពីមានការជំរឿនចំនួនជនរងគ្រោះស៊ីវិល ដោយ អ.ស.ប ពីឆ្នាំ២០០៩ មក ។
យោងតាមរបាយការណ៍ប្រចាំឆ្នាំទី៨ របស់បេសកកម្ម អ.ស.ប នៅអាហ្វហ្គានីស្ថាន MANUA ចេញផ្សាយកាលពីថ្ងៃទី៦ កុម្ភៈ ថា សរុបជនស៊ីវិលដល់ទៅ៤.៤៩៨នាក់ ត្រូវស្លាប់៧.៩២០នាក់ រងរបួសក្នុងឆ្នាំ២០១៦ ដែលមានការកើនឡើង៣% ក្នុងនោះ១ភាគ៣ជាកុមារ (ជាង៣.៥០០នាក់) ។ បើធ្វើការប្រៀបធៀបគ្នាក្នុងឆ្នាំ២០០៩ មានជនរងគ្រោះប្រមាណជា៦.០០០នាក់ ហើយចាប់តាំងពីឆ្នាំនោះមកជនស៊ីវិលអាហ្វហ្គានីស្ថានស្លាប់សរុបដល់ទៅ២៤.៨៤១នាក់ ហើយ៤៥.៣៤៧នាក់រងរបួស ។
តំណាងពិសេសរបស់អគ្គលេខាធិការ អ.ស.ប ប្រចាំអាហ្វហ្គានីស្ថាន លោកតាដាមីជី យ៉ាម៉ាម៉ូតូ គូសបញ្ជាក់ថា របាយការណ៍នោះបង្ហាញពីភាពសាហាវនៃជម្លោះចំពោះបុរស នារី និងកុមារអាហ្វហ្គានីស្ថាន ដែលបន្តរងគ្រោះកាន់តែខ្លាំងពីមួយឆ្នាំទៅមួយឆ្នាំ ។ លោកអំពាវនាវដល់គ្រប់ភាគីឱ្យចាត់វិធានការជាក់ស្តែងជាបន្ទាន់នានា ដើម្បីការពារជនស៊ីវិល ។
ជម្លោះកើតមានក្នុងគ្រប់ខេត្តទាំង៣៤ របស់អាហ្វហ្គានីស្ថាន ។ MANUA កត់សម្គាល់ឃើញពីចំនួនជនរងគ្រោះមានច្រើនមកពីការប្រយុទ្ធគ្នានៅលើដី ព្រមទាំងតុល្យការខ្ពស់នៃជនរងគ្រោះ ដោយសារការវាយប្រហារតាមអាកាសចាប់តាំងពីឆ្នាំ២០០៩ មក ។ យោងតាម MANUA ថា កងម្លាំងអាហ្វហ្គានីស្ថាន ជាអ្នកទទួលខុសត្រូវលើ៤៣% នៃជនរងគ្រោះ។ កងទ័ពអាមេរិកកាលពីខែមុនទទួលស្គាល់ថា បានធ្វើឱ្យជនស៊ីវិលស្លាប់៣៣នាក់ និងរបួស២៧នាក់ ដោយសារការវាយប្រហារតាមអាកាសកាលពីថ្ងៃទី៣ វិច្ឆិកា នៅជិតក្រុងគុនឌុស ៕
ចែករំលែកព័តមាននេះ