ប្រទេសថៃ ៖ រដ្ឋាភិបាលថៃរំពឹងថា នឹងអាចបញ្ចេញអង្ករក្នុងស្តុករបស់ខ្លួនចំនួន៨,០១លានតោននៅឆមាសទី១ឆ្នាំនេះ ដោយចាប់ផ្តើមដាក់ដេញថ្លៃអង្ករសម្រាប់បរិភោគ២,៨៧លានតោន នៅថ្ងៃទី១៦ កុម្ភៈ ខាងមុខ ។
ចំណែកអង្ករនៅសល់៥,២លានតោនទៀត នឹងត្រូវផ្គត់ផ្គង់ទៅឲ្យឧស្សាហកម្មមិនមែនអាហារ និងចំណីសត្វ រួមទាំងវិស័យថាមពលផងដែរ ដោយសារអង្ករទាំងនេះមានគុណភាពមិនល្អ ។
លោកស្រី Duangporn Rodphaya អគ្គនាយកនៃនាយកដ្ឋានពាណិជ្ជកម្មបរទេស ឱ្យដឹងថា ការដេញថ្លៃអង្ករដែលមានគុណភាពល្អសម្រាប់បរិភោគចំនួន២,៨៧លានតោនក្នុងខែនេះ គួរតែអាចកាត់បន្ថយសម្ពាធតម្លៃអង្ករនៅលើទីផ្សារពិភពលោក ។
បន្ទាប់ពីការដេញថ្លៃចំនួន២ដងក្នុងឆមាសនេះ រដ្ឋាភិបាលគួរតែអាចបញ្ចេញអង្ករពីស្តុកទាំងអស់របស់ខ្លួននៅខែឧសភា ។
លោកស្រីថ្លែងថា ៖ « ការបញ្ចេញអង្ករពីស្តុកនេះ នឹងអាចជួយបន្ថយបន្ទុកហិរញ្ញវត្ថុដ៏ធំដល់ប្រទេសថៃ ដោយសាររដ្ឋាភិបាលបានចំណាយប្រាក់ចំនួន៥០៤លានបាតក្នុង១ខែ ដើម្បីរក្សាទុកអង្ករដែលនៅសល់៨លានតោន » ។
ទោះជាយ៉ាងណា ក្រសួងពាណិជ្ជកម្មមិនរំពឹងថា ការដេញថ្លៃលើកនេះនឹងទទួលបានតម្លៃខ្ពស់ទេ ដោយសារតែអង្ករនេះត្រូវបានរក្សាទុកអស់រយៈពេលជាច្រើនឆ្នាំមកហើយ ហើយគុណភាពរបស់វាក៏មានការធ្លាក់ចុះដែរ ។
លើសពីនេះទៀត ធនាគារជាច្រើនបានដាក់កម្រិតឥណទានសម្រាប់ម្ចាស់រោងម៉ាស៊ីនកិនស្រូវ ដែលពួកគេអាចប្រឈមមុខនឹងការលំបាកមួយចំនួន នៅពេលចូលរួមការដេញថ្លៃក្នុងខែនេះ ។
អង្ករប្រហែលពាក់កណ្តាលនៃចំនួន២,៨៧លានតោន គឺសម្រាប់លក់ដេញថ្លៃនៅថ្ងៃទី១៦ កុម្ភៈ រួមមាន អង្ករ Hom Mali និង២០%ទៀតគឺអង្ករធម្មតា ហើយអង្ករនៅសល់គឺ Pathum Thani និងអង្ករដំណើប ។
សមាគមនាំចេញអង្ករថៃ (TREA) បានព្យាករថា ប្រទេសថៃនឹងនាំចេញអង្ករចំនួន៩,៥លានតោន ស្មើ១៥០ប៊ីលានបាតនៅឆ្នាំនេះ ទាបជាងឆ្នាំមុន ដែលស្មើដល់៩,៨៨លានតោន ឬ១៥៤,៤៣ប៊ីលានបាត ដោយសារតែមានការប្រកួតប្រជែងស្វិតស្វាញ តម្លៃទាប និងការឡើងថ្លៃនៃប្រាក់បាត ។
លោក Charoen Laothamatas ប្រធានសមាគម TREA និយាយថា ៖ « ថៃត្រូវប្រឈមមុខនឹងការប្រកួតប្រជែងខ្លាំងក្នុងឆ្នាំនេះ ខណៈប្រទេសជាច្រើនបានផ្គត់ផ្គង់អង្ករក្នុងកម្រិតមួយខ្ពស់ » ។
ថៃនឹងនៅតែជាប្រទេសនាំចេញអង្ករធំជាងគេទី២របស់ពិភពលោក បន្ទាប់ពីប្រទេសឥណ្ឌា។ គេគិតថា ឥណ្ឌានឹងនាំចេញអង្ករតិចជាងឆ្នាំមុន ប៉ុន្តែច្រើនជាងថៃ ១០លានតោន។ រីឯវៀតណាម ជាប្រទេសនាំចេញអង្ករធំជាងគេទី៣របស់ពិភពលោក ត្រូវបានគេព្យាករថា នឹងនាំចេញអង្ករ៥,៨លានតោននៅឆ្នាំនេះ ។
ក្រសួងកសិកម្មអាមេរិករាយការណ៍ថា ស្រូវនៅក្នុងស្តុកចុងឆ្នាំរបស់ពិភពលោក នឹងកើនឡើងពី១១៦,៥១លានតោនក្នុងឆ្នាំ២០១៦ ដល់១១៨,៧១លានតោននៅឆ្នាំនេះ ហើយផលិតកម្មស្រូវសរុបនឹងកើនឡើងពី៤៧២,៣៩ ទៅ៤៨០,០២លានតោន ។
ចំណែកតម្រូវការប្រើប្រាស់ស្រូវអង្ករនឹងកើនឡើងពី៤៧០,៥៤ ទៅ៤៧៧,៨១លានតោន ខណៈទំហំពាណិជ្ជកម្មសរុបនឹងកើនឡើងបន្តិចពី៣៩,៦៩ ទៅ៤០,៧៨លានតោននៅឆ្នាំនេះ ៕
ចែករំលែកព័តមាននេះ