ប្លេកហូល (Black Hole) ដែលភាសាខ្មែរប្រែថា ប្រហោងខ្មៅមិនមែនជារឿងជំនឿតាមបែបសាសនា ឬអបិយជំនឿនោះទេ ប៉ុន្តែវា គឺជាទ្រឹស្តីវិទ្យាសាស្ត្រដែលបង្កើតឡើងដំបូងដោយអ្នករូបវិទូ ហើយក្រោយមកក៏បានបំបែកសម្មតិកម្មកាន់តែច្បាស់ដោយក្រុមតារាវិទូ និងអ្នកវិទ្យាសាស្ត្រឯទៀត។…
ប្លេកហូល (Black Hole) ដែលភាសាខ្មែរប្រែថា ប្រហោងខ្មៅមិនមែនជារឿងជំនឿតាមបែបសាសនា ឬអបិយជំនឿនោះទេ ប៉ុន្តែវា គឺជាទ្រឹស្តីវិទ្យាសាស្ត្រដែលបង្កើតឡើងដំបូងដោយអ្នករូបវិទូ ហើយក្រោយមកក៏បានបំបែកសម្មតិកម្មកាន់តែច្បាស់ដោយក្រុមតារាវិទូ និងអ្នកវិទ្យាសាស្ត្រឯទៀត។
តាមទ្រឹស្តីវិទ្យាសាស្ត្ររបស់ក្រុមអ្នករូបវិទូប្រហោងខ្មៅ គឺជាតំបន់នៃលំហរអវកាសដែលមាន ទំនាញផែនដីខ្លាំង ហើយគ្មានភាគល្អិត ឬសូម្បីតែវិទ្យុសកម្មអេឡិចត្រូម៉ាញ៉េទិច ដែលមាន ដូចជា ពន្លឺជាដើមអាចគេចបាននោះឡើយ ។ ដែននៃប្រហោងខ្មៅនៅក្នុងលំហរមានរូបរាង ពណ៌ខ្មៅងងឹត ហើយមិនឆ្លុះពន្លឺព្រះអាទិត្យថែមទៀត ។ ដូច្នេះអ្នកវិទ្យាសាស្ត្របានទាញសម្មតិកម្មថា ដែននោះមានសីតុណ្ហភាពដែលសមាមាត្របញ្ច្រាសទៅនឹងម៉ាស់របស់វា។
សីតុណ្ហភាពនៅទីនោះ ត្រូវរូបវិទូអះអាងថា មានរាប់កោដិ កម្លាំងខេលវីន (Kelvin) ជាមួយនឹងកម្លាំងទំនាញដែលមានកម្លាំងមិនអាចកាត់ស្មានបាន។ រីឯម៉ាស់របស់វាវិញមានកម្លាំងរហូតដល់ទៅ៤,៣លានដងខ្លាំងជាងម៉ាស់របស់ផែនដីដែលអ្វីៗដែលចូលទៅដល់នឹងត្រូវខ្ទេចគ្មានសល់ សូម្បីតែផ្កាយដែលរសាត់ទៅក្បែរវាក៏ត្រូវស្រូបចោល ហើយត្រូវបំបែកជាភាគល្អិត។
មកដល់ពេលបច្ចុប្បន្ននេះគ្មានមនុស្សណាម្នាក់អាចបានមើលឃើញ និងទទួលឥទ្ធិពលពីដែន ប្រហោងខ្មៅនេះឡើយ ហើយមនុស្សស្គាល់ប្រហោងខ្មៅនេះតែតាមការបកស្រាយរបស់ពួក រូបវិទូ តារាវិទូ ហើយអាចមានទស្សនៈវិទូប៉ុណ្ណោះ ។ ទ្រឹស្តីវិទ្យាសាស្ត្រដែលត្រូវបានគេអះអាងអំពីប្រហោងខ្មៅនេះ គឺបានកើតមានឡើងនៅក្នុងមជ្ឈដ្ឋានពួករូបវិទូ និងទស្សនៈវិទូ ហើយក្រោយមកក្នុងសតវត្សទី១៨ ក៏មានតារាវិទូ និងអ្នកវិទ្យាសាស្ត្រជាបន្តបន្ទាប់ធ្វើការបកស្រាយជាបន្តបន្ទាប់ ។
លោក អាល់ប័ត អាំងស្តាំង (Albert Einstein) រូបវិទូអាល្លឺម៉ង់បានលើកឡើងពីអំពីប្រហោងខ្មៅនេះមុនគេនៅសតវត្សន៍ទី១៨ ក្រោយមកនៅក្នុងឆ្នាំ១៩១៦ ទើបលោកកាល់ ស្វាឆាល (Karl Schwarzschild ) អ្នករូបវិទូអាល្លឺម៉ង់ដែរបានកំណត់រូបរាង និងបានដាក់ឈ្មោះវារហូតមកដល់ ពេលនេះ ។ ជាបន្តបន្ទាប់មកអ្នកវិទ្យាសាស្ត្រជាពិសេស គឺតារាវិទូជំនាន់ក្រោយបានអភិវឌ្ឈន៍ការកឃើញនេះជាបន្តបន្ទាប់រហូតដល់បច្ចុប្បន្ន ។ តាមការបកស្រាយរបស់អ្នកវិទ្យាសាស្ត្រ គ្មានអ្វីអាចទប់ទល់នឹងកម្លាំងបំផ្លាញរាប់សិបកោដ៍ ខេលវីន នៅក្នុងដែននៃប្រហោងខ្មៅនេះបានឡើយ ។
ដូច្នេះ លោក ខឹម វាសនាបានលើកវាយកពាក្យ « ប្លេកហូល» នេះមកនិយាយ និងធ្វើឲ្យពលរដ្ឋជិតពីរម៉ឺននាក់ជឿ ហើយនាំគ្នាមកកាន់ចំការរបស់គាត់កាលពីចុងខែសីហាកន្លងទៅនៅបន្ទាយស្រី ខេត្តសៀមរាប ។
ប៉ុន្តែតាមឯកសារដែលយើងខ្ញុំបានស្រាវជ្រាវបានបង្ហាញថា មនុស្សជំនាន់យើងនេះប្រហែលជាមិនបានស្គាល់ «ប្លេកហូល» ឫប្រហោងខ្មៅនេះឡើយពីព្រោះវាស្ថិតនៅចម្ងាយរហូតដល់ទៅប្រហែល៥៥ លានឆ្នាំពន្លឺពីភពផែនដី ហើយអ្នកវិទ្យាសាស្ត្រដែលបានអះអាងអំពីវាក៏មិនបានឃើញវាដែរ ដោយពួកគេបានធ្វើការសន្និដ្ឋានតាមតែសម្មតិកម្មវិទ្យាសាស្ត្រដែលពួកគេអាចសិក្សាបានតែប៉ុណ្ណោះ។
លោក ខឹម វាសនា បានយក ពាក្យ «ប្រហោងខ្មៅ » ឬ ប្លេកហូល មកបូកជាមួយអបិយជំនឿ ដោយអាចធ្វើអោយមនុស្សភ័យខ្លាចពីការរលត់រលាយនៃភពផែនដីរួមទាំងកម្ពុជាផង ហើយនាំគ្នាសម្រុកទៅរកនៅចម្ការរបស់លោក ។
ករណីរបស់លោក ខឹម វាសនា បានប្រាប់យើងថា ប្រជាជនយើងជាច្រើននៅតែមានអបិយ ជំនឿមិនសមហេតុផល ហើយងាយនឹងជឿចំពោះអ្វីដែលគេលើកឡើងដោយមិនបាន ពិចារណារកការពិតតាមបែបវិទ្យាសាស្ត្រ។ ខណៈដែលប្រជាពលរដ្ឋមានសិទ្ធិនឹងមានជំនឿទៅលើអ្វីមួយនោះ គេចាំបាច់ត្រូវតែធានាថា ការជឿនោះនឹងមិននាំដល់ការខូចខាតប្រយោជន៍ផ្ទាល់ខ្លួន និងសង្គមឡើយ ។ យើងត្រូវមានការប្រុងប្រយ័ត្ន បើមិនដូច្នេះទេ យើងអាចនឹងជឿទាំងងងឹតងងុលមិនខាន ។
សូមប្រុងប្រយ័ត្នពីព្រោះមកដល់ពេលនេះជំនឿបានមកពីការជឿតៗគ្នាប៉ុណ្ណោះជំនឿ គឺគ្មានបញ្ជាក់ និងបោះពុម្ភជាក្បួនខ្នាតណាមួយត្រឹមត្រូវឡើយ ។ យើងខ្ញុំមិនហាមការជឿរបស់បងប្អូននោះទេ ប៉ុន្តែការជឿដែលខ្វះការពិចារណាឲ្យបានវែងឆ្ងាយយើងនឹងក្លាយហានិភ័យមួយសម្រាប់យើងនៅក្នុងសង្គមជីវភាព និងតថភាពពិតនៅក្នុងសង្គមជាក់ស្តែង ៕ ( អត្ថបទ ៖ ហេង ចេស្តារ)
ចែករំលែកព័តមាននេះ