ឃ្លង់ជាជំងឺមួយប្រភេទដែលកើតលើមនុស្សតាំងពី៦០០ឆ្នាំមុនគ្រិស្តសករាជ និងជាជំងឺឆ្លងរ៉ាំរ៉ៃកើតលើមនុស្សគ្រប់វ័យគ្រប់ភេទ ដែលបណ្តាលមកពីមេរោគឈ្មោះ Micobacterium Leprae ។ មេរោគនេះត្រូវបានរកឃើញដំបូងនៅឆ្នាំ១៨៧៣ ដោយអ្នកប្រាជ្ញឈ្មោះ G.H.A Hansen ជនជាតិ Norway ។
ជំងឺនេះមានការប៉ះពាល់លើស្បែក សរសៃប្រសាទ និងប៉ះពាល់ខ្លាំងទៅដល់អារម្មណ៍ផ្លូវចិត្តរបស់អ្នកជំងឺ តែបច្ចុប្បន្នជំងឺនេះត្រូវបានព្យាបាលជាសះស្បើយ១០០% និងមិនបណ្តាលឱ្យពិការភាពទេ បើអ្នកជំងឺមកទទួលការព្យាបាលទាន់ពេលវេលា ។ ជាក់ស្តែងដូចជាអ្នកជំងឺឃ្លង់ពីរនាក់ដែលបានមកព្យាបាលនៅមជ្ឈមណ្ឌល ស្ដារលទ្ធភាពពលកម្មកៀនឃ្លាំងផ្នែកជំងឺហង់សិន ដោយសារតែមិនបានយកចិត្តទុកដាក់ ទីបំផុតត្រូវធ្លាក់ខ្លួនពិការ ហើយមានការស្តាយក្រោយយ៉ាងខ្លាំង ។ លោក អ៊ំម្នាក់អាយុជាង៥០ឆ្នាំ មកពីខេត្តស្វាយរៀង ក្រុងបាវិត ដែលបានកើតជំងឺឃ្លង់អស់រយៈពេលជិត២០ឆ្នាំហើយ ដោយពីដំបូងលោកអ៊ំឃើញមានស្លាកស្នាមចម្លែក គឺស្នាមសៗ កើតមាននៅលើជើង តែគាត់មិនបានចាប់អារម្មណ៍នោះទេចេះតែបន្តទុកពីរមួយថ្ងៃទៅមួយថ្ងៃ មួយខែទៅមួយខែ អាការដៃជើងរបស់គាត់ចេះតែចម្លែក ដោយមានអាការស្ពឹក និងមិនមានការឈឺចាប់នោះទេ ទោះបីជាមានការមុតវត្ថុរឹងស្រួចអ្វីក៏ដោយ ហើយសភាពដៃជើងចេះតែមានការទាញទៅជាខ្វេរ ខ្វង់រហូតដល់មានថ្ងៃមួយក្រុមការងារជំងឺឃ្លង់បានចុះស្រាវជ្រាវ ទើបរូបគាត់បានដឹងថា កើតមានជំងឺឃ្លង់ ។
លោកអ៊ំបានរៀបរាប់ទាំងទឹកភ្នែកថា រូបគាត់មិននឹងស្មានថា គាត់ធ្លាក់ខ្លួនពិការដោយសារតែជំងឺនេះទេ កើតមកមានកាយសម្បទានគ្រប់គ្រាន់ដែរ ព្រោះតែមានការធ្វេសប្រហែស មិនយកចិត្តទុកដាក់ ទីបំផុតធ្លាក់ខ្លួនពិការ ហើយពេលនេះគាត់មានរបួសដៃទៀត ។ ជាសំណាងសម្រាប់ជនក្រីក្រដូចជារូបគាត់ ដោយបានមកព្យាបាលនៅមជ្ឈមណ្ឌល ស្ដារលទ្ធភាពពលកម្មកៀនឃ្លាំងផ្នែកជំងឺហង់សិនដោយមិនមានការគិតប្រាក់អ្វីទាំងអស់ទាំងការស្នាក់នៅ ការព្យាបាល ថ្នាំ និងការហូបចុក តែដើម្បីកុំឲ្យហួសពេលលោកអ៊ំសូមផ្តាំទៅបងប្អូនកម្ពុជាទាំងអស់ បើមានការសង្ស័យ រោគសញ្ញាមួយអ្វីមួយគួរតែប្រញាប់មកព្យាបាល កុំបណ្តោយទុកយូររហូតដល់ហួសពេលកើតក្តីវិបត្តិដូចរូបគាត់។
ដោយឡែកអ៊ំប្រុសម្នាក់ទៀត អាយុជិត៦០ឆ្នាំ មកពីខេត្តមណ្ឌលគិរី បានមកព្យាបាលនៅមជ្ឈមណ្ឌល ស្ដារលទ្ធភាពពលកម្មកៀនឃ្លាំងផ្នែកជំងឺហង់សិន ក៏បានរៀបរាប់ឲ្យដឹងដែរថា គាត់កើតមានជំងឺនេះតាំងពីឆ្នាំ១៩៨៥មកម៉្លេះ ពីមួយថ្ងៃទៅមួយថ្ងៃ ដៃជើងរបស់លោកចាប់ផ្តើស្ពឹកលែងមានអារម្មណ៍ឈឺចាប់ ទោះជាមុតឬប៉ះវត្ថុរឹង ស្រួចអ្វីក៏ដោយ ។ ដោយសារតែជីវភាព គាត់គិតតែពីខំប្រឹងធ្វើស្រែចំការមិនដែលខ្វល់អំពីជំងឺរបស់ខ្លួនឡើយ ទីបំផុតគាត់ក៏បានធ្លាក់ខ្លួនពិការ រហូតដល់សូម្បីតែម្រាមជើង និងម្រាមដៃក៏គ្មានដែរ ។ បច្ចុប្បន្នគាត់បានមកស្នាក់នៅព្យាបាលនៅមជ្ឈមណ្ឌលស្ដារអស់រយៈពេលពីរខែហើយ ។
សូមបញ្ជាក់ថា ជំងឺឃ្លង់អាចឆ្លងពីមនុស្សម្នាក់ទៅមនុស្សម្នាក់ពិសេសអ្នកដែលរស់នៅជិតស្និទ្ធជាមួយអ្នកជំងឺ(សមាជិកគ្រួសារ) តាមរយៈផ្លូវដង្ហើម និងស្បែកដែលដាច់ចេញទឹករងៃ។ ជំងឺនេះមានរោគសញ្ញាដូចជា មានស្លាកស្នាមជាបន្ទះលើស្បែក ឬដុំពក ហើយមានអាការស្ពឹកនៅលើស្នាមទាំងនោះ ៕
ចែករំលែកព័តមាននេះ