ផ្លូវលំនៅឃុំទ្រានរងការខូចខាតដោយសារមានរថយន្តធុនយក្សបើកឆ្លងកាត់
ខេត្តកំពង់ចាម ៖ ផ្លូវលំដែលអង្គការទ្រីបបានធ្វើឆ្លងកាត់តាមភូមិជាច្រើនក្នុងឃុំទ្រាន ស្រុកកំពង់សៀម នាពេលកន្លងមកកំពុងទទួលរងការខូចខាតយ៉ាងដំណំ ដោយមាន …
ខេត្តកំពង់ចាម ៖ ផ្លូវលំដែលអង្គការទ្រីបបានធ្វើឆ្លងកាត់តាមភូមិជាច្រើនក្នុងឃុំទ្រាន ស្រុកកំពង់សៀម នាពេលកន្លងមកកំពុងទទួលរងការខូចខាតយ៉ាងដំណំ ដោយមានរណ្តៅតូចធំ ព្រោះតែមានរថយន្តធុនយក្សបើកឆ្លងកាត់ទៅទៅមក ហើយតាមមន្ត្រីជំនាញបានពន្យល់ថា ផ្លូវលំនេះគឺមិនអាចឲ្យមានរថយន្តបើកឆ្លងកាត់នោះទេ ត្រូវតែទប់ស្កាត់ ។
ស្ត្រីឈ្មោះ សាន្ត ហេន អាយុ៥៩ឆ្នាំ នៅភូមិគ្រាលលើ ឃុំទ្រាន បានប្រាប់ឲ្យថា ផ្លូវលំដែលបានធ្វើកាត់តាមមុខផ្ទះរបស់គាត់កាលពីដំបូងៗគឺរលោង និងស្រួលជិះកង់ ម៉ូតូ ហើយថែមទាំងមានបង្គោលដាក់សងខាងផ្លូវ ដើម្បីការពារមិនឲ្យរថយន្តធុនធំបើកឆ្លងកាត់ទៀត ហើយផ្លូវបាននៅល្អជាច្រើនឆ្នាំ អ្នកភូមិសប្បាយចិត្ត ។ ប៉ុន្តែមកដល់រដូវវស្សាឆ្នាំ២០១៦កន្លងទៅ មេឃបានបង្អុរភ្លៀងធ្លាក់ចុះមកបន្តបន្ទាប់ជាច្រើនមេ បានធ្វើឲ្យផ្លូវត្រង់មុខផ្ទះបានមានទឹកហូរកាត់ថ្នល់ លុះពេលដែលមានរថយន្តធំៗបើកមកស្រាប់តែជាប់ផុងទៅមុខមិនរួច ទម្រាំតែរើខ្លួនរួច ជួនប្រើពេល២ទៅ៣ថ្ងៃក៏មាន ហើយឧស្សាហ៍ជាប់ផុងណាស់ រហូតមានរណ្តៅជ្រៅៗ ។
ស្ត្រីឈ្មោះ សាន្ត ហេន ប្រាប់បន្តថា ក្រោយពីបែកភក់ និងមានរណ្តៅធំៗ ដែលបង្កផលវិបាកដល់ប្រជាពលរដ្ឋធ្វើដំណើរនោះ ចាស់ទុំក្នុងភូមិបានចលនាបច្ច័យតាមផ្លូវពីអ្នកភូមិក្នុង១គ្រួសារ២០០០រៀល និងខ្លះទៀត៣០០០រៀល រួមទាំងអ្នកធ្វើដំណើរតាមមធ្យោបាយម៉ូតូ និងរថយន្ត លុះពេលដែលបានមកសមល្មមក៏ទៅទិញដី និងថ្ម យកមកចាក់កន្លែងមានរណ្តៅនោះ ។ សព្វថ្ងៃនេះកន្លែងដែលចាក់ដី និងថ្មកំពុងតែទទួលរងការខូចខាតទៅវិញស្ទើរតែទាំងអស់ហើយ ព្រោះថាមានរថយន្តធំៗតែងតែបើកឆ្លងកាត់ឡើងញ័ររញ្ជួយផ្លូវតែម្តង ។
ស្ត្រីឈ្មោះ ឈីម ស្រូយ អាយុ៥២ឆ្នាំ នៅភូមិឃុំជាមួយស្ត្រីខាងលើ ប្រាប់ឲ្យដឹងថា មានពេលមួយនោះមិនដឹងជារថយន្តរបស់អ្នកណាទេ បានបើកកាត់តាមផ្លូវមុខផ្ទះ មកកិនទុយោទឹករបស់គាត់ឡើងបែកខ្ទេច ធ្លាយហូរទឹក ដោយមិនខ្ចីចុះមកមើលផង គឺបើកទៅបាត់តែម្តង ។ រាល់ថ្ងៃនេះផ្លូវបានរងការខូចខាតជាច្រើនកន្លែង មានរណ្តៅតូចធំ ក្រហេងក្រហូង ។ ជាមួយគ្នានោះដែរ គាត់សូមស្នើដល់អាជ្ញាធរពាក់ព័ន្ធមេត្តាជួយជួសជុលផ្លូវក្នុងភូមិរបស់គាត់ឲ្យបានឆាប់ ដើម្បីងាយស្រួលក្នុងការធ្វើដំណើរ ។
លោក អ៊ឹង វិសុទ្ធ ប្រធានមន្ទីរអភិវឌ្ឈន៍ជនបទខេត្ត បានឲ្យដឹងថា កាលពីប៉ុន្មានថ្ងៃមុននេះមានអាជ្ញាធរមូលដ្ឋានបានយកសំណើមកដាក់ជូនរូបលោកដែរ តែសំណើនោះបានសរសេរខុស និងសូមឲ្យយកទៅធ្វើម្តងទៀត រហូតមកដល់មកដល់រសៀលថ្ងៃទី៣០ ខែមករា ឆ្នាំ២០១៧ នៅមិនទាន់ឃើញយកសំណើមកម្តងទៀតនៅឡើយទេ ។ ប្រសិនបើទទួលបានការស្នើសុំនោះ ហើយរូបលោកនឹងបញ្ជូនទៅក្រសួងអភិវឌ្ឈន៍ជនបទ ដើម្បីឲ្យមន្ត្រីចុះមកសិក្សា និងវាយតម្លៃ បន្ទាប់មកនឹងជួសជុលឡើងវិញដើម្បីឲ្យពលរដ្ឋងាយស្រួលធ្វើដំណើរ តាមទម្លាប់ផ្លូវលំគឺមិនអនុញ្ញាតឲ្យរថយន្តធុនធំបើកឆ្លងកាត់នោះទេ ពោលគឺអាជ្ញាធរមូលដ្ឋានត្រូវទទួលរងកិច្ចការទាំងនោះ ៕
ចែករំលែកព័តមាននេះ