ប្រទេសថៃ ៖ គោលនយោបាយពាណិជ្ជកម្មរបស់ប្រធានាធិបតីអាមេរិក លោកDonald Trump អាចមានលទ្ធផលវិជ្ជមាន និងហានិភ័យសម្រាប់ក្រុមហ៊ុននាំចេញរបស់ថៃ ដែលពួកគេគួរតែការពារអត្រាប្តូរប្រាក់ដើម្បីការពារខ្លួនពីភាពមិនច្បាស់លាស់នេះ ។ នេះបើយោងតាមការសិក្សាមួយ ដោយការិយាល័យយុទ្ធសាស្ត្រ និងគោលនយោបាយរបស់ក្រសួងពាណិជ្ជកម្ម ។
លោក Pimchanok Vonkorpon អគ្គនាយកនៃការិយាល័យនេះបាននិយាយថា ការបង្ហាញវិជ្ជមានមួយគឺការប្រកាសយ៉ាងច្បាស់របស់លោក Trump ដែលថាសហរដ្ឋអាមេរិកនឹងចាកចេញពីកិច្ចព្រមព្រៀងដៃគូពាណិជ្ជកម្ម អន្តរប៉ាស៊ីហ្វិក(TPP ) ដែលប្រទេសថៃមិនមែនជាហត្ថលេខីមួយក្នុងចំណោមនោះ ខណៈពេលដែលការប្រកួតប្រជែងការនាំចេញរបស់ថៃអាចមានភាពប្រសើរឡើង ប្រសិនបើប្រាក់យន់ចិនមានភាពរឹងមាំខ្លាំងឡើង ។
លោក Pimchanok បានឱ្យដឹងថា៖«គោលនយោបាយពាណិជ្ជកម្មថ្មីរបស់អាមេរិកគឺមិនទាន់មានភាពច្បាស់លាស់នៅឡើយទេ។ ទោះជាយ៉ាងណា បើយោងតាមការវិភាគបឋម គោលនយោបាយថ្មីទាំងពីររបស់លោក Trump នឹងអាចមានអត្ថប្រយោជន៍ និងបញ្ហាប្រឈមសម្រាប់ពាណិជ្ជកម្មថៃ ។ ដើម្បីរៀបចំខ្លួនសម្រាប់លទ្ធផលដែលមិនអាចរំពឹងទុកបាន ក្រុមហ៊ុននាំចេញរបស់ថៃគួរតែការពារខ្លួនពីការខាតដើម្បីធានាសុវត្ថិភាពប្រាក់ចំណូលរបស់ពួកគេ » ។
ប្រសិនបើសហរដ្ឋអាមេរិកដាក់វិធានការពាណិជ្ជកម្មតឹងរ៉ឹងប្រឆាំងនឹងចិន វានឹងដាក់សម្ពាធប្រាក់យន់ឲ្យឡើងថ្លៃ ហើយវាអាចបង្កើនភាពប្រកួតប្រជែងពាណិជ្ជកម្មរបស់ថៃ ។
លើសពីនេះទៀត ការវិនិយោគបន្ថែមទៀតពីប្រទេសចិនអាចនឹងហូរចូលទៅក្នុងតំបន់អាស៊ានយ៉ាងច្រើន ក្នុងនោះរួមមានប្រទេសថៃផងដែរ ដោយសារប្រទេសចិននឹងធ្វើពិពិធកម្មទីផ្សាររបស់ខ្លួន បន្ទាប់ពីការប្រឈមមុខនឹងឧបសគ្គពាណិជ្ជកម្មនៅសហរដ្ឋអាមេរិក ។
លើសពីនេះ ប្រសិនបើលោក Trump ពិតជាធ្វើតាមការសន្យាក្នុងការជំរុញការចំណាយក្នុងស្រុកមែន វាគួរតែហុចលទ្ធផលនៅក្នុងតម្រូវការនាំចូលបន្ថែមទៀត ហើយវាអាចជាប្រយោជន៍ដល់ការនាំចេញរបស់ថៃទៅកាន់ទីផ្សារអាមេរិក ។
ទោះជាយ៉ាងណា ខណៈពេលដែលអាមេរិកមិនទាន់ប្រកាសពីវិធានការ និងគោលនយោបាយថ្មីរបស់ខ្លួនឲ្យបានច្បាស់នោះ វាបានបង្កើតភាពមិនច្បាស់លាស់សម្រាប់ការធ្វើពាណិជ្ជកម្មជាសកល។ លើសពីនេះទៀត ប្រសិនបើសហរដ្ឋអាមេរិកដាក់ពន្ធខ្ពស់ជាងមុនដើម្បីប្រឆាំងនឹងការនាំចូលពីប្រទេសចិន ដែលអាចប៉ះពាល់ដល់ប្រទេសផ្សេងទៀតផងដែរ ដោយសារអាមេរិកនឹងបង្កើនពន្ធនាំចូលគ្រប់ប្រទេសទាំងអស់ជាជាងការជ្រើសរើសយកតែប្រទេសចិន ។ បើមិនដូច្នោះទេ អាមេរិកអាចនឹងត្រូវដាក់ទណ្ឌកម្មសម្រាប់ការអនុវត្តពាណិជ្ជកម្មមិនយុត្តិធម៌ ។
ចំពោះសេណារីយ៉ូមួយនេះ ផលិតផលរបស់ថៃអាចប្រឈមមុខនឹងការយកពន្ធនាំចូលខ្ពស់ផងដែរ ដោយសារផលិតផលនាំចេញរបស់ប្រទេសនេះទៅកាន់អាមេរិកគឺស្រដៀងទៅនឹងទំនិញរបស់ចិនដែរ ។ ទំនិញទាំងនោះរួមមានគ្រឿងម៉ាស៊ីន និងឧបករណ៍អគ្គិសនីជាដើម ។
លោក Pimchanok បាននិយាយថា ខណៈពេលដែលក្រុមហ៊ុនអាមេរិកជាច្រើនបានបណ្តាក់ទុននៅក្នុងវិស័យពិតប្រាកដ ឬនៅក្នុងការផលិត ពួកគេមិនគួរដកខ្លួនភ្លាមៗពីប្រទេសថៃ និងប្រទេសដទៃនោះទេ ។ ទោះជាយ៉ាងណា វាអាស្រ័យទៅនឹងប្រភេទនៃការដាក់ទោសដែលពួកគេនឹងប្រឈមមុខចំពោះការបដិសេធមិននាំការវិនិយោគរបស់ពួកគេត្រឡប់ទៅសហរដ្ឋអាមេរិកវិញ ៕
ចែករំលែកព័តមាននេះ