ឡានពេទ្យ នៅស្វាយរៀង ដឹកក្មេងអ្នកជំងឺ មកភ្នំពេញ យក ១៨០ដុល្លារ ពេលដឹកសពទៅវិញ យក ១២០ដុល្លារទៀត
- ស្វាយរៀង
ខេត្តស្វាយរៀង៖ ក្មេងស្រី អាយុ ៧ឆ្នាំ នៅខេត្តស្វាយរៀង ត្រូវបានឱម៉ាល់ទិច ១០០មេ ស្លា.ប់ ពេលយកទៅដល់មន្ទីរពេទ្យគន្ធបុប្ផា នៅភ្នំពេញ។…
ខេត្តស្វាយរៀង៖ ក្មេងស្រី អាយុ ៧ឆ្នាំ នៅខេត្តស្វាយរៀង ត្រូវបានឱម៉ាល់ទិច ១០០មេ ស្លា.ប់ ពេលយកទៅដល់មន្ទីរពេទ្យគន្ធបុប្ផា នៅភ្នំពេញ។…
ខេត្តស្វាយរៀង៖ ក្មេងស្រី អាយុ ៧ឆ្នាំ នៅខេត្តស្វាយរៀង ត្រូវបានឱម៉ាល់ទិច ១០០មេ ស្លា.ប់ ពេលយកទៅដល់មន្ទីរពេទ្យគន្ធបុប្ផា នៅភ្នំពេញ។ ក្រុមគ្រួសារក្មេងស្រីរងគ្រោះ ចោទថា គ្រូពេទ្យក្រុងស្វាយរៀង មិនព្រមបញ្ជូន ទើបកូនគាត់ស្លា.ប់ ហើយឡានពេទ្យ ដឹកក្មេងស្រីរងគ្រោះ ពីស្វាយរៀង មកភ្នំពេញ យក ១៨០ដុល្លារ ហើយពេលកូនស្លា.ប់ ដឹកសពទៅផ្ទះវិញ យកថ្លៃ ១២០ដុល្លារទៀត។
ក្មេងស្រីរងគ្រោះ អាយុ ០៧ឆ្នាំ បានជិះកង់ ទៅតាមតាឃ្វាលគោ ក៏ត្រូវខ្យល់ផ្តាច់សំបុកឱម៉ាល់ ធ្លាក់ពីលើដើមត្នោត ចំពីមុខកង់ ឱម៉ាល់ហើរចេញពីសំបុកព្រួតទិចនាង ប្រមាណ ១០០មេ ធ្វើឱ្យក្មេងស្រីភ័យ ផ្តួលកង់ចោល រួចរត់ស្រែកហៅតាឱ្យជួយ ជាអកុសល នាងបានស្លា.ប់ពេលបញ្ជូនដល់មន្ទីរពេទ្យគន្ធបុប្ផារាជធានីភ្នំពេញ ហើយក្រុមគ្រួសារកុមារីរងគ្រោះ ចោទថា ក្រុមគ្រូពេទ្យខេត្តស្វាយរៀង គ្មានលទ្ធភាព មិនព្រមបញ្ជូនកូនរបស់គាត់ទៅភ្នំពេញ ទុកពន្យារពេលជាច្រើនម៉ោង រហូតកូនរបស់គាត់ ហួសពេល ស្លា.ប់នៅលើឡានពេទ្យ។
ករណីឱម៉ាល់ទិចក្មេងស្រីនោះ បានកើតឡើង នៅវេលាម៉ោង ៤ និង ៣០នាទី រសៀលថ្ងៃទី២២ ខែសីហា ឆ្នាំ២០២២ នៅចំណុចភ្លឺបឹងតាបែន ស្ថិតនៅភូមិមេលោង សង្កាត់ចេក ក្រុងស្វាយរៀង ចម្ងាយពីផ្ទះ ២០០ម៉ែត្រ។
ស្ត្រីឈ្មោះ ហ៊ូ ស៊ីណា អាយុ ៣៦ឆ្នាំ ត្រូវជាម្តាយក្មេងស្រីរងគ្រោះ និងឳពុកឈ្មោះ ខៀវ ថេន អាយុ ៣៥ឆ្នាំនៅភូមិកើតហេតុខាងលើ បានឱ្យដឹងថា មុនពេលកើតហេតុ កូនស្រីឈ្មោះ ភឿន ចន្ថា អាយុ ៧ឆ្នាំ រៀនថ្នាក់ទី១ នៅសាលាបឋមសិក្សា ២ធ្នូ បានជិះកង់ទៅលេងនៅវាលស្រែ ទៅតាមជីតា ទៅឃ្វាលគោ នៅមាត់បឹងតាបែន ខណៈដែលកំពុងជិះកង់ទៅដល់ភ្លឺបឹង ស្រាប់តែមានខ្យល់យ៉ាងខ្លាំងបោកបក់ បណ្តាលឲ្យដាច់ធ្លាក់សំបុកឱម៉ាល់ពីលើចុងត្នោត ធ្លាក់មកដីទាំងសំបុក ប៉ុនល្អីគ្រាង ចំពីមុខកង់ជនរងគ្រោះ ខណៈនោះស្រាប់តែសត្វឱម៉ាល់ ហើរចេញពីសំបុក មកព្រួតអុចទិចលើខ្លួនប្រាណ សុះខ្លួន ប្រមាណ ១០០មេ។ នាងក៏ផ្តួលកង់ រួចរត់ចេញ ហើយស្រែកហៅតាឱ្យជួយ។ លោកតា ក៏រត់ទៅជួយ ចម្ងាយពីសំបុកឱម៉ាល់ប្រមាណជា ៥០ម៉ែត្រ។ សត្វឱម៉ាល់ ក៏លែងដេញ បានហើរទៅសំបុកវិញ។
ប្រភពបន្តថា ពេលនោះ ក្មេងស្រីរងគ្រោះ ឈឺចុកចាប់យ៉ាងខ្លាំង ក៏ប៉ុន្តែមានស្មារតីរឹងមាំ ជីតា ក៏នាំត្រឡប់មកផ្ទះ ដើរមកដល់ផ្ទះខ្លួនឯង ហើយបានឱ្យឳពុកម្តាយ ដឹកនាងតាមម៉ូតូ ទៅមន្ទីរពេទ្យខេត្តស្វាយរៀងដើម្បីសង្គ្រោះ។
ប្រភពបន្តទៀតថា ពេលទៅដល់មន្ទីរពេទ្យខេត្ត គឺនៅវេលាម៉ោង ៥ និង០០នាទីល្ងាច ក្រុមគ្រូពេទ្យទៅធ្វើតេស្តកូវីដ១៩ លទ្ធផលអវិជ្ជមាន ទើបពេទ្យឱ្យឳពុកបីកូន ទៅអាគារកុមារ រួចបន្តោងសេរ៉ូមមួយកំផ្លោក និងចាក់ថ្នាំ ២ម្ជុល ក៏ទៅបាត់ រហូតដល់ម៉ោ ៧ និង ៣០នាទីយប់ មានលោកគ្រូពេទ្យម្នាក់ មកមើល ហើយនិយាយថា កូននេះ ធ្ងន់ហើយ បើមានលទ្ធភាពបញ្ជូនទៅមន្ទីរពេទ្យគន្ធបុប្ផា នៅភ្នំពេញទៅ ហើយក៏ទៅបាត់។
ក្រោយមកមានគ្រូពេទ្យក្មេងៗ ២នាក់ មកមើល គាត់និយាយថា «បើគ្មានលទ្ធភាពព្យាបាលកូនខ្ញុំទេ ខ្ញុំសុំបញ្ជូនទៅភ្នំពេញ» ខណៈនោះ គ្រូពេទ្យសុំទុកតាមដានរយៈពេល ១ម៉ោងទៀតសិន មិនអីទេ ចាំឲ្យកូននោមសិន ក្រែងធូ។ ក៏ប៉ុន្តែកូនស្រីគាត់ កាន់តែឈឺចុកចាប់ពេញខ្លួនប្រាណខ្លាំងឡើងៗ រហូតម៉ោង ៨ និង១០នាទីយប់ ទើបបញ្ជូន ហើយបានហៅរថយន្តសាមុយឯកជន ឲ្យមកដឹក។ ម្ចាស់រថយន្តយកតម្លៃ ១៨០ដុល្លារ ដឹកដល់មន្ទីរពេទ្យគន្ធបុប្ផា នៅភ្នំពេញ ដោយរថយន្តសាមុយឯកជននោះ ចាស់ បើកយឺត រហូតដល់ម៉ោង ១០ និង៣០ យប់ ទើបដល់មន្ទីរពេទ្យគន្ធបុប្ផា នៅភ្នំពេញ។ ពេលគ្រូពេទ្យ លើកយកកូនចុះពីរថយន្ត ក៏នាងបានដាច់ខ្យល់ស្លា.ប់តែម្តង។
ម្តាយក្មេងស្រីរងគ្រោះ បាននិយាយទាំងអួលដើមកថា អាណិតកូនស្រីខ្លោចចិត្ត និយាយរហូតឱ្យគ្រូពេទ្យជួយ និយាយរហូតដល់នាងដាច់ខ្យល់ស្លា.ប់។ អ្វីដែលកាន់តែហួសចិត្តនោះ រថយន្តសាមុយ ដែលដឹកកូនគាត់ទៅយក ១៨០ដុល្លារ ហើយពេលស្លា.ប់ដឹកត្រឡប់មកវិញ យកថ្លៃដឹកសព ១២០ដុល្លារទៀត។
ម្តាយ និងឪពុកក្មេងស្រីរងគ្រោះ បានសំណូមពរដល់លោកប្រធានមន្ទីរសុខាភិបាលខេត្ត ឯកឧត្តមរដ្ឋមន្ត្រីក្រសួងសុខាភិបាល ឯកឧត្តមអភិបាលខេត្តស្វាយរៀង មេត្តា ចុះអធិការកិច្ចលើបញ្ហាគ្រូពេទ្យ មិនសូវយកចិត្តទុកដាក់ផ្តល់សេវា ថែទាំព្យាបាលអ្នកជំងឺ ដែលត្រូវសង្គ្រោះបន្ទាន់ ជូនប្រជាពលរដ្ឋ ដែលទៅរកសេវានៅមន្ទីរពេទ្យរដ្ឋ សូមឱ្យក្រុមគ្រូពេទ្យ ទទួលខុសត្រូវចៀសវាងគ្រោះថ្នាក់ដល់ជនរងគ្រោះផ្សេងទៀត ជាពិសេសឡានពេទ្យ យកថ្លៃពេក។
ទាក់ទិនករណីនេះដែរ មិនអាចរកការបំភ្លឺពីលោកប្រធានមន្ទីរពេទ្យ ខេត្តស្វាយរៀង បានទេ រហូតដល់ម៉ោង ៦ និង ៣០នាទីយប់ ថ្ងៃទី២៣ ខែសីហា ឆ្នាំ២០២២នេះ៕ វ៉ាន់ ប៊ុនធឿន
ចែករំលែកព័តមាននេះ