ទូកទេសចរណ៍ដឹកភ្ញៀវកម្សាន្តនៅតាមដងព្រែក ខេត្តកំពតបើកបម្រើសេវាកម្មឡើងវិញហើយ
ខេត្តកំពត ៖ ដំណើរកម្សាន្តដោយការជិះទូកទេសចរណ៍មើលទេសភាពតាមដងព្រែកកំពត មើលថ្ងៃលិច មើលអំពិលអំពែក បានបើកបម្រើសេវាកម្មឡើងវិញហើយក្រោយពេលបានផ្អាក
ខេត្តកំពត ៖ ដំណើរកម្សាន្តដោយការជិះទូកទេសចរណ៍មើលទេសភាពតាមដងព្រែកកំពត មើលថ្ងៃលិច មើលអំពិលអំពែក បានបើកបម្រើសេវាកម្មឡើងវិញហើយក្រោយពេលបានផ្អាកមួយរយៈដោយសារតែមានជួបហេតុការណ៍លិចទូកដឹកភ្ញៀវទេសចរណ៍ បណ្តាលឲ្យភ្ញៀវចំនួន៤នាក់បានស្លាប់នៅក្នុងហេតុការនោះនាពេលកន្លងទៅថ្មីៗនេះ និងដើម្បីធ្វើការត្រួតពិនិត្យប្រព័ន្ធបច្ចេកទេសទូកឲ្យមានលក្ខណៈល្អប្រសើរ មានសុវត្ថិភាពល្អជាងមុនផង។
ដងព្រែកដែលតភ្ជាប់ចរន្តទឹកសាប និងទឹកប្រៃ ដែលភ្ជាប់គ្នាដ៏ស្ងាត់ជ្រងំមួយជាមួយនឹងជ្រោះទឹកឈូនៅក្នុងខេត្តកំពត បានបង្កប់ដោយទេសភាពដ៏ស្រស់ត្រកាល អាចមើលឃើញទេសភាពជួរភ្នំ ព្រៃដុះប្របមាត់ព្រែក ថ្ងៃលិច និងមើលអំពិលអំពែក រួមផ្សំជាមួយខ្យល់បរិសុទ្ធបក់ផាត់រសៀកៗពីលើផ្ទៃទឹកថ្លាឈ្វេង លាយឡំនឹងរលកបណ្តេញបន្តិចៗនោះ គឺជាទីកន្លែងដែលគេធ្លាប់ឃើញមានទូកជាច្រើនបានដឹកភ្ញៀវទេសចររាប់រយនាក់ក្នុងមួយថ្ងៃៗ និងជាកន្លែងដែលធ្លាប់ទទួលបានការនិយមចូលចិត្តទៅកម្សាន្តពីសំណាក់ភ្ញៀវជាតិ និងអន្តរជាតិជាររៀងរាល់ថ្ងៃ ចាប់តាំងពីឆ្នាំ២០១២មក។
ប៉ុន្តែកន្លងមកថ្មីៗនេះ ដោយមានជួបហេតុការណ៍លិចទូកដឹកភ្ញៀវទេសចរណ៍មួយគ្រឿងនៅពេលកំពុងបំរើសេវាកម្មដឹកភ្ញៀវកម្សាន្ត ហើយក៏ត្រូវបានអាជ្ញាធរផ្អាកមួយរយៈសិន ដើម្បីធ្វើការត្រួតពិនិត្យពីលក្ខណៈបច្ចេកទេសទូកនីមួយៗ របស់មន្ទីរជំនាញពាក់ព័ន្ធ ការពារសុវត្ថិភាពភ្ញៀវ ដែលជិះនៅលើទូក និងឲ្យម្ចាស់ទូកទេសចរទាំងនោះធ្វើច្បាប់អាជីវកម្ម និងធានាសន្តិសុខសុវត្ថិភាពជូនភ្ញៀវឲ្យ បានត្រឹមត្រូវ ត្រូវមានឧបករណ៍ការពារសុវត្ថិភាពភ្ញៀវដូចជាអាវពោងជាដើម។
ហើយការដឹកភ្ញៀវទៀតសោតមិនឲ្យលើសចំណុះដែលទូកត្រូវដឹកនោះឡើយ។ ទាក់ទិននឹងការអនុញ្ញាតឲ្យទូកទេសចរណ៍បើកសេវាបំរើភ្ញៀវឡើងវិញជាថ្មីនេះដែរ លោក សយ ស៊ីណុល ប្រធានមន្ទីរទេសចរណ៍ខេត្តកំពត បានប្រាប់អ្នកយកពត៌យើងកាលពីរសៀលថ្ងៃទី២៣ មករា នេះថា មុននឹងទូកទេសចរណ៍អាចដំណើរការបាន ទូកនីមួយៗត្រូវតែបំពេញសំណុំបែបបទតាមលក្ខខណ្ឌរបស់មន្ទីរពាក់ព័ន្ធជាមុនសិន ដូចជា ទី១-ត្រូវមានឆៀក(លក្ខណៈបច្ចេកទេសទូក) ដែលចេញដោយមន្ទីរសាធារណៈការ និងដឹកជញ្ជូនខេត្ត ទី២-ទូកដឹកភ្ញៀវទេសចរធំៗ មិនអាចផ្ទុកភ្ញៀវលើសពី៤៥នាក់បានឡើយ ។ ទី៣-ត្រូវសុំអាជ្ញាប័ណ្ណពីមន្ទីរទេសចរណ៍ខេត្តឲ្យបានត្រឹមត្រូវជាមុនសិន ដើម្បីមន្ទីរធ្វើការត្រួតពិនិត្យមុននឹងបម្រើសេវាកម្មដឹកភ្ញៀវ។
លោកប្រធានមន្ទីរបានបញ្ជាក់ថា ប៉ុន្មានថ្ងៃមុននេះ ក្រោយពីមានការជូនដំណឹងរបស់មន្ទីរទេសចរណ៍ខេត្ត ឃើញមានទូកដឹកភ្ញៀវទេសចរណ៍មួយគ្រឿង បានធ្វើសេវាកម្មដឹកភ្ញៀវទេសចរណ៍កម្សាន្តតាមមាត់ព្រែករាល់ពេលល្ងាចមើលថ្ងៃលិច មើលអំពិលអំពែក នៅតាមដងព្រែកចំនួន១៥ថ្ងៃមកហើយ រីឯទូកដឹកភ្ញៀវជាច្រើនគ្រឿងទៀតអាចពិនិត្យ និងធ្វើអាជ្ញាបណ្ណ័ឲ្យហើយរួចរាល់មុនបុណ្យចូលឆ្នាំចិន វៀតណាមខាងមុខនេះ ដើម្បីបម្រើសេវាកម្មដឹកភ្ញៀវកម្សាន្តនៅថ្ងៃបុណ្យ ចូលឆ្នាំចិន វៀតណាមខាងមុខនេះផងដែរ៕
ចែករំលែកព័តមាននេះ