រាជធានីភ្នំពេញ ៖ ករណីបុគ្គលិកកាស៊ីណូមួយកន្លែងនៅជ្រៃធំ ខេត្តកណ្ដាល នាំគ្នារត់ចេញមកក្រៅ ហើយប៉ះជាមួយសមត្ថកិច្ចនោះត្រូវបានសមត្ថកិច្ចបានស្រាវជ្រាវ និងឃាត់ខ្លួនមេការកាស៊ីណូម្នាក់ បន្ទាប់ពីបុគ្គលិកជាជនជាតិវៀតណាមអះអាងថា បានបង្ខាំងទុកពួកគេ និងមិនបានបើកប្រាក់ខែឲ្យ ។ នេះបើតាមសម្តេចក្រឡាហោម ស ខេង។
សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) មានប្រសាសន៍ថា ខណៈអញ្ជើញដឹកនាំកិច្ចប្រជុំថ្នាក់ដឹកនាំក្រុមការងារជំនាញអន្ដរក្រសួង-ស្ថាប័នទាំង៦ និងក្រសួង-ស្ថាប័នជាសមាជិក គ.ជ.ប.ជ ប្រចាំឆមាសទី១ ឆ្នាំ២០២២ នានៅព្រឹកថ្ងៃទី១៩ ខែសីហា ឆ្នាំ២០២២នៅទីស្តីការក្រសួង។
សម្ដេចក្រឡាហោម ស ខេង ឧបនាយករដ្ឋមន្ដ្រី បានមានប្រសាសន៍ថា ករណីបុគ្គលិកកាស៊ីណូមួយនៅជ្រៃធំ ខេត្តកណ្ដាល បានសម្រុករត់ចេញពីកាស៊ីណូនោះ អាជ្ញាធរឃាត់ខ្លួនបានបុគ្គលិក ម្នាក់ ជាជនជាតិវៀតណាម ប៉ុន្ដែមិនមានឯកសារស្នាក់នៅជាក់លាក់នៅប្រទេសកម្ពុជានោះទេ ដូច្នេះសមត្ថកិច្ចសន្និដ្ឋានថា បុគ្គលិកនៅកាស៊ីណូប្រមាណ៤០នាក់ ជាជនជាតិវៀតណាមមកធ្វើការដោយខុសច្បាប់។
សម្ដេចក្រឡាហោមបានបញ្ជាក់ថា ករណីនេះ ត្រូវបានសមត្ថកិច្ចស្រាវជ្រាវ និងឃាត់ខ្លួន មេការ កាស៊ីណូនេះម្នាក់ បន្ទាប់ពីបុគ្គលិកជាជនជាតិវៀតណាមអះអាងថា បានបង្ខាំងទុកពួកគេ និងមិនបានបើកប្រាក់ខែឲ្យពួកគេឡើយ ដូច្នេះសមត្ថកិច្ចសន្និដ្ឋានថា កាស៊ីណូនេះមិនទាន់មានច្បាប់ត្រឹមត្រូវ។
នៅព្រឹកថ្ងៃដដែល ឯកឧត្ដម គង់ សោភ័ណ្ឌ អភិបាលនៃគណៈអភិបាលខេត្តកណ្ដាល បានដឹកនាំកម្លាំងគណៈបញ្ជាការឯកភាពរដ្ឋបាលខេត្ត ចុះត្រួតពិនិត្យបញ្ហាវិវាទរវាងកម្មករជាជនបរទេស និងក្រុមហ៊ុន តៃភីងយ៉ាងហ្វាងឌីចាន់វូចាន់ វូយីគ័នលី ឯ.ក ស្ថិតក្នុងអគារ Pacific Real Fstate (Property) Managment Co,Ltd ក្នុងភូមិជ្រៃធំ ឃុំសំពៅពូន ស្រុកកោះធំ ខេត្ដកណ្ដាល។
ក្នុងឱកាសចុះពិនិត្យនេះដែរ ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានជម្រុញ និងលើកទឹកចិត្ត ឱ្យក្រុមហ៊ុន គោរព អនុវត្តច្បាប់ការងារនៃព្រះរាជាណាចក្រកម្ពុជា និងគោរពតាមអាជ្ញាប័ណ្ណអាជីវកម្មឱ្យត្រឹមត្រូវ ចំពោះបុគ្គលិក កម្មករក្រុមហ៊ុន ត្រូវបម្រើការងារឱ្យត្រឹមត្រូវ និងមិនអោយមានការប្រើប្រាស់គ្រឿងញៀន និងការបង្ខិតបង្ខំមនុស្ស ឬឃាត់ទុកមនុ ស្សប្រើខុសច្បាប់ដាច់ខាត ហើយសមត្ថកិច្ចជំនាញគ្រប់ផ្នែកត្រូវបន្តស្រាវជ្រាវ សហប្រតិបត្តិការចំពោះបុគ្គលិកជនជាតិវៀតណាម ដែលបានរត់ចេញពីកន្លែ ងការងារឆ្លងព្រែកជ្រៃធំ ខេត្តកណ្តាល-ព្រែកបិនយី ខេត្តអានយ៉ាង ចូលទៅក្នុងប្រទេសវៀតណាម តាមនីតិវិធីច្បាប់ ដេីម្បីទាក់ទាញអ្នកវិនិយោគទុនក្នុង និងក្រៅប្រទេស មកអភិវឌ្ឍប្រទេស ជាតិប្រកបដោយតម្លាភាព គុណភាព ចីរភាព និងបរិយាប័ន្ន៕
ចែករំលែកព័តមាននេះ