ចាប់បានម្នាក់ ម្នាក់ទៀតប្រើល្បិចរត់គេចពីសមត្ថកិច្ច តែរត់មិនរួច ក្រោយឆក់ស្ត្រីម្នាក់
- ភ្នំពេញ
ជនសង្ស័យពីរនាក់បានធ្វើសកម្មភាពឆក់ទូរស័ព្ទដៃបានសម្រេច ហើយព្យាយាមបន្ថែមល្បឿនម៉ូតូបើករត់គេចខ្លួន តែត្រូវ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យពីរនាក់បានធ្វើសកម្មភាពឆក់ទូរស័ព្ទដៃបានសម្រេច ហើយព្យាយាមបន្ថែមល្បឿនម៉ូតូបើករត់គេចខ្លួន តែត្រូវសន្តិសុខ និងប្រជាពលរដ្ឋប្រដេញឃាត់បានភ្លាមៗ រួចប្រគល់អោយសមត្ថកិច្ច បង្កឱ្យមានការភ្ញាក់ផ្អើលកាលពីវេលាម៉ោង៥និង៥០នាទីល្ងាច ថ្ងៃទី១៨ ខែសីហា ឆ្នាំ២០២២ នៅចំណុចស្តុបព្រះសក្យមុនីចេតិយ ផ្លូវR6 កែងមហាវិថីព្រះមុនីវង្ស ស្ថិតក្នុងសង្កាត់ស្រះចក ខណ្ឌដូនពេញ ។
សេចក្តីរាយការណ៍បន្តថា ជនសង្ស័យទាំងពីរនាក់ដែលធ្វើសកម្មភាពឆក់ទូរស័ព្ទត្រូវប្រជាពលរដ្ឋក្របួចជាប់ខាងលើ រួមមាន ១- ឈ្មោះ ហៃ ចំរើន អាយុ២៦ឆ្នាំ មុខរបរ និងស្នាក់នៅ មិនពិតប្រាកដ ជាអ្នកធ្វើសកម្មភាពឆក់ទូរស័ព្ទ និង២- ឈ្មោះ វណ្ណ អាយុ២៤ឆ្នាំ មុខរបរ និងស្នាក់នៅ មិនពិតប្រាកដ ជាអ្នកបើកម៉ូតូធ្វើសកម្មភាព និងជាម្ចាស់ម៉ូតូ។ ទាំងពីរនាក់នេះ ជិះម៉ូតូម៉ាកហុងដាឌ្រីម ស៊េរីឆ្នាំ២០២២ អត់មានស្លាកលេខ ។
ចំណែកនារីរងគ្រោះសុំលាក់អត្តសញ្ញាណ បានប្រាប់ឲ្យដឹងថា មុនពេលកើតហេតុ គឺនាងកំពុងឈប់ម៉ូតូម៉ាកហុងដាស្កុបពី ហើយនិយាយទូរស័ព្ទនៅចំណុចស្តុបព្រះសក្យមុនីចេតិយ ភ្លាមៗនោះក៏លេចមុខជនសង្ស័យទាំងពីរនាក់ បានធ្វើសកម្មភាពឆក់ទូរស័ព្ទ ម៉ាក i phone XS max ពណ៌មាស ពីនាងបានសម្រេច ហើយបន្ថែមល្បឿនជិះម៉ូតូរត់គេចខ្លួនចូលក្នុងបឹងកក់តាមបណ្តោយផ្លូវR6 ហើយក៏ត្រូវបានប្រជាពលរដ្ឋ រួមទាំងជនរងគ្រោះជិះប្រដេញតាមពីក្រោយ និងស្រែកថា «ចោរៗ» ផ្អើលដល់សន្តិសុខក្នុងបឹងកក់ ហើយនាំគ្នាឡោមព័ទ្ធប្រដេញឃាត់បានអ្នកបើកម៉ូតូធ្វើសកម្មភាពម្នាក់ភ្លាមៗ ។
ប្រភពដដែលបន្តថា ចំណែកជនសង្ស័យម្នាក់ទៀត ដែលជាអ្នកធ្វើសកម្មភាពឆក់នោះ បានផ្លោះរបងការដ្ឋាន និងដីឡូតិ៍ដែលព័ទ្ធរបងទុកចោល រត់គេចខ្លួនបាត់ ព្រមទាំងយកទូរស័ព្ទរបស់ជនរងគ្រោះទៅលាក់ទុកក្នុងព្រៃត្រែង រួចរត់ចូលកន្លែងស្នាក់នៅរបស់កម្មករ បន្ទាប់មកលួចយកកន្សែងពោះគោមកស្លៀក ហើយស្រាតខោអាវចោល និងបន្តរត់គេច ដើម្បីគេចពីកម្លាំងសន្តិសុខ និងសមត្ថកិច្ច ដែលកំពុងឡោមព័ទ្ធជនសង្ស័យ។
បន្ទាប់ពីរត់គេច និងសម្ងំលាក់ខ្លួនអស់រយៈពេលជាងកន្លះម៉ោង ជនសង្ស័យរូបនោះក៏ផ្លោះចេញមកធ្វើដូចជាគ្មានរឿងអ្វី ប៉ុន្តែក៏ត្រូវសមត្ថកិច្ចឃាត់ខ្លួនបាន ហើយនាំទៅកាន់ប៉ុស្តិ៍នគរបាលស្រះចកតែម្តង។ បន្ទាប់ពីសួរនាំ ជនសង្ស័យក៏បានសារភាពថា «ខ្លួនពិតជាបានធ្វើសកម្មភាពឆក់ពិតប្រាកដមែន និងបាននាំផ្លូវសមត្ថកិច្ចត្រឡប់ទៅយកទូរស័ព្ទដែលខ្លួនលាក់ទុកនោះ នាំមកប្រគល់ឲ្យជនរងគ្រោះវិញ ។
បច្ចុប្បន្ន ជនសង្ស័យ ត្រូវបានសមត្ថកិច្ចកសាងសំណាងបញ្ជូនទៅកាន់អធិការដ្ឋានខណ្ឌដូនពេញ ដើម្បីចាត់ការតាមនីតិវិធី ៕
ចែករំលែកព័តមាននេះ