ខេត្តបន្ទាយមានជ័យ ៖ ទាហានឈុតខ្មៅថៃ ចាប់ម៉ូតូស៊េរីថ្មីចំនួន១៩គ្រឿង នៅក្បែរព្រំដែនកម្ពុជា ខណៈគេបម្រុងលួចនាំចូលកម្ពុជាដោយខុសច្បាប់ ។ ការទប់ស្កាត់ម៉ូតូទំនើបគេចពន្ធនេះបានធ្វើឡើងនៅថ្ងៃទី១៧ ខែសីហា ឆ្នាំ២០២២ ស្ថិតក្នុងភូមិប៉ារ៉ៃម៉ៃ ឃុំប៉ារ៉ៃ ស្រុកអារញ្ញប្រាថេត ខេត្តស្រះកែវជាប់ព្រំដែនជាមួយកម្ពុជា ។
មន្ត្រីទំនាក់ទំនងកម្ពុជា-ថៃបានប្រាប់ថា៖កម្លាំងឈុតខ្មៅ-ថៃក្នុងកងវរៈសេនាធំថ្មើរជើងលេខ១១១(ច.ប.រ.១១១) នៃអង្គភាពបញ្ជាការដ្ឋានកងពលធំលេខ១២(ច.ទ.ព.១២)បានចេញល្បាតតាមបន្ទាត់ព្រំដែនប្រទះឃើញមនុស្ស១ក្រុម បានអូសនិងរុញម៉ូតូតាមក្នុងចម្ការអំពៅក្បែរព្រំដែនក្នុងទឹកដីថៃ ក៏បានធ្វើការបង្ក្រាបហើយក្រុមអ្នកអូសរុញម៉ូតូខ្លះបានរត់គេចខ្លួនអស់ ឃាត់បានតែម៉ូតូចំនួន១៩គ្រឿង ។
មន្ត្រីទំនាក់ទំនងកម្ពុជា-ថៃបានបញ្ជាក់ថា ម៉ូតូដែលត្រូវទាហានឈុតខ្មៅថៃបង្ក្រាបបានចំនួន១៩គ្រឿងនេះជាប្រភេទម៉ូតូហុងដាស្គូពី និងហុងដាឃ្លិក និងយ៉ាម៉ាហាដែលជាម៉ូតូស៊េរីថ្មីនិងទំនើប ដែលបម្រុងនាំចូលមកកម្ពុជា តាមច្រករបៀងព្រំដែនដោយខុសច្បាប់ ។ ក្រោយបង្ក្រាបត្រូវបានទាហ៊ានឈុតខ្មៅដឹកទៅរក្សាទុកនៅទីបញ្ជាការដើម្បីអនុវត្តតាមច្បាប់បន្ត ។
មន្ត្រីដដែលបានបញ្ជាក់ថា រយៈពេលកន្លងមកទាហ៊ានឈុតខ្មៅថៃបានបង្ក្រាបឃាត់បានម៉ូតូតាមបន្ទាត់ព្រំដែនថៃ-កម្ពុជាដែលបម្រុងលួចនាំចូលមកកម្ពុជាដោយខុសច្បាប់ ។ តែការចាប់នេះមិនដែលបានឃាត់ខ្លួនក្រុមឈ្មួញ ឬអ្នកស៊ីឈ្នួលអូសរុញម៉ូតូបម្រុងឆ្លងដែនចូលកម្ពុជា ម្តងណាឡើយ ព្រោះពួកគេផ្តួលម៉ូតូចោលហើយរត់យករួចខ្លួនគ្រប់ពេល ៕
ចែករំលែកព័តមាននេះ