ថ្ងៃសុក្រ ទី២០ មករា ជាទិវាសំខាន់មួយនៅទីក្រុងវ៉ាស៊ីនតោន ហើយក៏ជាថ្ងៃមានការព្រួយបារម្ភនានាផងដែរ ។ នាថ្ងៃនោះ លោកដូណាល់ ត្រាំ នឹងធ្វើសច្ចាប្រណិធានឡើងធ្វើប្រធានាធិបតីទី៤៥ របស់សហរដ្ឋអាមេរិក
ថ្ងៃសុក្រ ទី២០ មករា ជាទិវាសំខាន់មួយនៅទីក្រុងវ៉ាស៊ីនតោន ហើយក៏ជាថ្ងៃមានការព្រួយបារម្ភនានាផងដែរ ។ នាថ្ងៃនោះ លោកដូណាល់ ត្រាំ នឹងធ្វើសច្ចាប្រណិធានឡើងធ្វើប្រធានាធិបតីទី៤៥ របស់សហរដ្ឋអាមេរិកនៅវិមានកាពីតូលមុខមហាជនជាអ្នកគាំទ្រលោកដល់ទៅ៨០០.០០០នាក់ ។
ទន្ទឹមនឹងនេះបើតាមការជំរឿនរបស់អាជ្ញាធរថា មានពួកបាតុករប្រឆាំងនឹងលោកត្រាំ ដល់ទៅ៩៩ក្រុមលើកគ្នាមករារាំងដល់ពិធីឡើងកាន់អំណាចនេះដែរ ។ ទោះបីក្រុមទាំងនេះមានសិទ្ធិប្រើតែប៉ង់កាតតូចៗ តែក្រុមផ្សេងៗ ដែលមួយចំនួនមានចរិតប្រឆាំងផ្កាប់មុខនឹងត្រូវឱ្យស្ថិតក្នុងតំបន់ដាច់ឆ្ងាយពីគ្នារវាងមួយទៅមួយ ដើម្បីចៀសវាងរាល់គ្រោះថ្នាក់នៃការប៉ះទង្គិចគ្នា ហើយក្រុមទាំងនេះត្រូវបានត្រួតពិនិត្យរួចហើយ តាមបណ្តាញសង្គម ។
ទោះបីយ៉ាងណា ក្រុមបាតុករមួយចំនួនក្នុងចំណោមក្រុមបាតុករទាំងនេះអាចបង្កការអុកឡុកខ្លាំង ពិសេសក្រុមមួយមានឈ្មោះថា DISRUPTJ 20 (ចូររារាំងថ្ងៃ២០ មករា) ។ ក្រុមនេះកកើតឡើងតាមបណ្តាញសង្គមជាចលនាដែលធ្វើរាល់ការផ្តួចផ្តើមគំនិតប្រឆាំងលោកត្រាំ មានប្រភពមកពីបណ្តាសហជីព ចលនាបរិស្ថាន និងសមាគមនារីផ្សេងៗ។ ថ្ងៃឡើងកាន់តំណែងនេះពួកបាតុករប្រឆាំងប៉ុនប៉ងតវ៉ា រាំងខ្ទប់ច្រកចូលមួយចំនួនរហូតដល់រារាំង ពិធីដោយប្រើប្រាស់អំពើហិង្សា ។
ទិវាសកម្មភាពមួយគេអាចឃើញតាមបណ្តាញសង្គម និងតាមរយៈវីដេអូផ្សាយជាពិសេសតាម YOU TUBE ចាប់តាំងពីច្រើនសប្តាហ៍មកហើយ ។
ក្រៅពីនេះក៏មានការអំពាវនាវឱ្យធ្វើនូវកូដកម្មទូទៅដោយការអំពាវនាវនោះធ្វើដោយក្រុម DISRUPTJ20 តាមអុីនធើរណេត ។ សេចក្តីអំពាវនាវសរសេរថា យើងអំពាវនាវដល់គ្រប់មនុស្សដែលមានមនសិការល្អចូលរួមក្នុងការរារាំងពិធីនានា ។ ប្រសិនបើលោកត្រាំ ត្រូវចូលកាន់តំណែង ទុកឱ្យលោកធ្វើខ្លួនឯងជាសម្ងាត់ទៅ ដែលជាការបង្ហាញទិដ្ឋភាពពិតនៃស្ថានភាពសន្តិសុខដែលលោកត្រាំនឹងដឹកនាំ ។ ត្រូវតែបង្ហាញឱ្យពិភពលោកទាំងមូលឃើញច្បាស់ថា មនុស្សភាគច្រើននៅសហរដ្ឋអាមេរិកពុំគាំទ្រប្រធានាធិបតីខ្លួន ឬពុំយល់ស្របតាមវិធីសាស្ត្រទាំងឡាយរបស់លោកឡើយ ។
ចំពោះបណ្តាអ្នកដែលនឹងមិនមកកាន់ក្រុងវ៉ាស៊ីនតោននាថ្ងៃទី២០ មករា DISRUPTJ20 អំពាវនាវឱ្យលើកគ្នាតវ៉ានៅតាមដងវិថី និងលើកទឹកចិត្តឱ្យមានកូដកម្មទូទៅក្នុងប្រទេសនាថ្ងៃនោះ ។ ចូរលោកអ្នករៀបចំកូដកម្មក្នុងសាលាលោកអ្នកនាពេលនេះ ។ ចំពោះពលករអំពាវនាវសូមឱ្យពួកគេសុំច្បាប់ថា ឈឺ ហើយសុំសម្រាកមួយថ្ងៃ ។ គ្មានការងារ គ្មានការបើកទ្វារសាលា គ្មាន SHOPPING គ្មានការងារដាំស្ល ។
បណ្តាពិធីចូលកាន់តំណែងរបស់លោកត្រាំ ត្រូវចាប់ផ្តើមបណ្តើរៗចាប់ពីថ្ងៃទី១៩ មករា ទៅតាមរយៈការដាក់បាច់ផ្កានៅកន្លែងបញ្ចុះសពយោធា ARLINGTON ហើយបន្តនាថ្ងៃទី២០ មករា ជាមួយការធ្វើសច្ចាប្រណិធាននៅមុខវិមានកាពីតូល បន្ទាប់មកមានការដង្ហែមួយរហូតដល់សេតវិមាន ។ រួចនាព្រឹកថ្ងៃទី២១ មករា មានពិធីបែបសាសនានៅឯកាតេដ្រាល ។
ភ្នាក់ងារសម្ងាត់ការពារសន្តិសុខប្រធានាធិបតី និងបណ្តាឥស្សរជន សមាជិកកងឆ្មាំជាតិ ប៉ូលិសសហព័ន្ធ FBI និងប៉ូលិសមូលដ្ឋានប្រមាណជា២៨.០០០នាក់ ត្រូវដាក់ពង្រាយនៅរដ្ឋធានីអាមេរិក ៕
ចែករំលែកព័តមាននេះ