យោងតាមព័ត៌មានដែលចេញផ្សាយតាមគេហទំព័រកាសែតឌឹណេស្សិនរបស់ថៃជាភាសាអង់គ្លេសនៅថ្ងៃទី៩ មីនា បានឱ្យដឹងថាគណៈរដ្ឋមន្ដ្រីថៃកាលពីថ្ងៃទី៩ មីនា បានសំរេចអនុម័តយល់ព្រមឱ្យប្រើប្រាស់ច្បាប់សន្ដិសុខផ្ទៃក្នុង ដើម្បីទប់ទល់ជាមួយក្រុមអាវក្រហមនៅថ្ងៃនៃការធ្វើមហាបាតុកម្មប្រឆាំងរដ្ឋាភិបាលលោកអាប់ភីស៊ីតនាចុងសបា្ដហ៍នេះ ។ គណៈរដ្ឋមន្ដ្រីថៃបានសំរេចឱ្យប្រើប្រាស់ច្បាប់សន្ដិសុខផ្ទៃក្នុងដើម្បីទប់ទល់ជាមួយក្រុមអាវក្រហមនៅក្នុងកិច្ចប្រជុំគណៈរដ្ឋមន្ដ្រីដើម្បីសំរេចអនុម័តលើសេចក្ដីសំរេចចិត្ដរបស់គណៈកម្មាធិការត្រួតពិនិត្យសន្ដិសុខ ។តាមព័ត៌មានដដែលបានឱ្យដឹងទៀតថាច្បាប់សន្ដិសុខផ្ទៃក្នុងនឹងត្រូវដាក់ប្រើប្រាស់ចាប់ពីថ្ងៃទី១១រហូតដល់ថ្ងៃទី២៣ មីនា ។ ច្បាប់នេះនឹងត្រូវដាក់ឱ្យប្រើប្រាស់ជាពិសេសនៅក្នុងទីក្រុងបាងកកដែលជាកន្លែងប្រមូលផ្ដុំដ៏សំខាន់របស់ក្រុមអាវក្រហម និងខេត្ដចំនួន៧ទៀតដែលស្ថិតនៅតាមច្រកចូលទីក្រុងបាងកក ។ ទោះបីជាបែបណាក៏ដោយ មេដឹកនាំក្រុមអាវក្រហមបានប្រកាសម្ដងហើយម្ដងទៀតថា ការធ្វើបាតុកម្មរបស់ពួកគេលើកនេះជាបាតុកម្មចុងក្រោយ គឺត្រូវតែផ្ដួលរំលំរដ្ឋាភិបាលរបស់លោកអាប់ភីស៊ីតឱ្យខាងតែបានហើយថាបាតុកម្មរបស់ក្រុមអាវក្រហមនឹងធ្វើដោយសន្ដិវិធីមិនបង្កឱ្យមានអំពើហិង្សាឡើយ ។ជាមួយគ្នានេះដែរយោងតាមប្រភពមិនច្បាស់ការណ៍មួយបានឱ្យដឹងថា នៅក្នុងកិច្ចខិតខំប្រឹងប្រែងនាទីចុងក្រោយនេះ ចលនារបស់ក្រុមអាវក្រហមនឹងធ្វើឱ្យកក្រើកក្រុង បាងកកហើយត្រូវតែផ្ដួលរំលំរដ្ឋាភិបាលលោកអាប់ភីស៊ីតឱ្យខាងតែបាន ។ នៅក្នុងការប្រមូលផ្ដុំប្រឆាំងរដ្ឋាភិបាលលោកអាប់ភីស៊ីតលើកចុងក្រោយនេះ ក្រុមបាតុករទាំងអស់នឹងធ្វើដំណើរទៅកាន់ទីក្រុងបាងកកតាម រថយន្ដក្រុង និងរថយន្ដកាមីញ៉ុងជាច្រើនគ្រឿង ។ ដំណាក់កាលដំបូងក្រុមអាវក្រហមគ្រោងប្រមូលផ្ដុំនៅកន្លែងចំនួន៦ក្នុងទីក្រុងបាងកកនិងនៅតាមជាយក្រុង ។មេដឹកនាំក្រុមបាតុករអាវក្រហមមួយរូបដែលសុំមិនអាចបញ្ចេញឈ្មោះបាននិយាយថា “ពួកគេមិនអាចរារាំងពួកយើងមិនឱ្យចូលទីក្រុងបានឡើយទោះបីជាដាក់ឱ្យប្រើប្រាស់ច្បាប់សន្ដិសុខផ្ទៃក្នុងក៏ដោយពីព្រោះយើងមានសន្ដិសុខជាង៥.០០០នាក់ ត្រូវបានបណ្ដុះ បណ្ដាលដើម្បីធានាឱ្យប្រាកដថាអ្វីៗគ្រប់យ៉ាងដំណើការយ៉ាងរលូន ។ មេដឹកនាំក្រុមអាវក្រហមដដែលនេះបាននិយាយថាមិនទាន់ដឹងថា មហាបាតុកម្មរបស់ក្រុមអាវក្រហមនឹងធ្វើរយៈពេលប៉ុន្មានថ្ងៃនៅឡើយទេគឺត្រូវធ្វើរហូតដល់លោកអាប់ភីស៊ីតចុះ ចេញពីតំណែងប្រកាសរំលាយសភានិងបោះ ឆ្នោតជ្រើសរើសនាយករដ្ឋមន្ដ្រីសាជាថ្មី។ ចំណែកលោក Nattawut Saikua ដែលជាមេដឹកនាំក្រុមអាវក្រហមដែរបានឱ្យដឹងថា មន្ដ្រីយោធាមួយចំនួននឹងជួយក្រុមបាតុករអាវ ក្រហមដើម្បីផ្ដួលរំលំរដ្ឋាភិបាលផ្ដាច់ការរបស់លោកអាប់ភីស៊ីត ។ លោកបានថ្លែងបន្ដថា ក្រុមបាតុករអាវក្រហមសង្ឃឹមថា នឹងផ្ដួលរំលំរដ្ឋាភិបាលលោកអាប់ភីស៊ីតត្រឹមថ្ងៃ ទី១៤ មីនា ។
- ឧបនាយករដ្ឋមន្ដ្រីថៃប្រកាសមិន រំលាយសភា និងលាលែងពីតំណែងខណៈដែលមានជនល្មើសម្នាក់គប់អាចម៌ គោចូលផ្ទះលោកអាប់ភីស៊ីត
លោកប៉ានីថាន វ៉ាត់ថាណាយ៉ាកន អ្នកនាំពាក្យឧទ្ទកាល័យនាយករដ្ឋមន្ដ្រីថៃឱ្យដឹងថា ការរក្សាសន្ដិសុខក្នុងគ្រាអាសន្ន (ច្បាប់អាជ្ញា សឹក) ក្នុងទីក្រុងបាងកក និងនៅតាមបណ្ដា ខេត្ដទាំង៧ ក្នុងប្រទេសថៃ ក្នុងរវាងពីថ្ងៃទី ១១ដល់២៣ មីនា ខាងមុខ ស្ថិតនៅក្រោម ការដឹកនាំរបស់លោកស៊ូថេប ធឿកស៊ូបាន់ ឧបនាយករដ្ឋមន្ដ្រី ។កាសែតក្នុងស្រុកមួយរបស់ថៃផ្សាយ កាលពីថ្ងៃទី៩ មីនា កន្លងមក បានឱ្យដឹងថាទាក់ទងនឹងស្ថានភាពតានតឹងក្នុងប្រទេសថៃ នាពេលបច្ចុប្បន្ន និងជាពិសេសនៅក្នុងថ្ងៃទី ១៤ មីនា ខាងមុខ ដែលក្រុមបាតុករអាវក្រហមមានគំរោងធ្វើមហាបាតុកម្ម ដើម្បីបណ្ដេញនាយករដ្ឋមន្ដ្រីចេញពីតំណែងនោះលោកស៊ូថេប ធឿកស៊ូបាន់ ឧបនាយករដ្ឋមន្ដ្រីថៃ បានប្រកាសថា ទោះបីជាស្ថានភាព បច្ចុប្បន្នមានភាពតានតឹង និងកំពុងទទួលគំនាបពីក្រុមបាតុករអាវក្រហមដែលគាំទ្រ លោកថាក់ស៊ីន ស៊ីណាវ៉ាត្រា អតីតនាយករដ្ឋមន្ដ្រីក៏ដោយលោកបានប្រកាសថា រដ្ឋាភិបាលនឹងមិនលាលែងពីតំណែង និងមិន ប្រកាសរំលាយសភាទេ ។ នេះជាការប្រកាសដ៏ម៉ឺងមាត់ប្រឆាំងទៅនឹងការទាមទាររបស់ ក្រុមបាតុកម្មអាវក្រហម ។ដោយឡែកកាលពីព្រឹកថ្ងៃ៩ មីនា ក៏កើត មានហេតុការណ៍មនុស្សម្នាក់ជិះម៉ូតូគប់ លាមកចូលទៅផ្ទះរបស់លោកអាប់ភីស៊ីត វ៉េចាជីវ៉ា នាយករដ្ឋមន្ដ្រីថៃ ប៉ុន្ដែមិនបានចូល ដល់ក្នុងផ្ទះទេ គឺទើជាប់នឹងរបង ។ តាមព័ត៌ មានថា សមត្ថកិច្ចប៉ូលិសដែលល្បាតនៅបរិ វេណនោះ បានទប់ស្កាត់ និងចាប់ខ្លួនជនល្មើស បាន ទើបដឹងថា លាមកដែលយកមកគប់ គឺ ជាអាចម៌គោច្រកស្បោង ។ ជនដែលសមត្ថ កិច្ចប៉ូលិសចាប់ខ្លួនបាន គឺលោកខាំផង សាម៉ាត ជាអ្នកស្រុករស់នៅក្នុងខេត្ដណាក់ ខនផានុម បានសារភាពថា ការធ្វើបែបនេះ គឺត្រូវការទាមទាររកយុត្ដិធម៌ដល់ប៉ូលិស ដែលបានទទួលភាពអយុត្ដិធម៌ក្នុងការផ្លាស់ទីតាំង ។ ហេតុការណ៍ដែលកើតឡើង ព្រោះ មានអារម្មណ៍តានតឹងក៏ចង់រំសាយកំហឹង ដោយយកអាចម៌គោមកច្រកស្បោងគប់ចូល ទៅផ្ទះនាយករដ្ឋមន្ដ្រីមិនទាក់ទងចលនាអាវ ក្រហមទេ ។ទាក់ទិននឹងកំហុសខាងលើសមត្ថកិច្ច ប៉ូលិសដែលចាប់ខ្លួនបានធ្វើការចោទប្រកាន់ លើកំហុសចំនួន២ចំណុច ១-គឺការយកវត្ថុ កខ្វក់ទៅវាយប្រហារលើអ្នកដទៃ និង២- អាចពិន័យជាប្រាក់ ឬជាប់ពន្ធនាគាររយៈ ពេល១ខែ ។
- ត្រៀមកំលាំង៥ម៉ឺននាក់ សំរាប់គ្រប់ គ្រងក្រុមអាវក្រហម
ប្រភពពីកាសែតថៃដដែលបានផ្សាយថា នៅឯអគាររដ្ឋាភិបាលលោកថាវីល ប្លៀនស្រ៉ី លេខាធិការផ្នែកសន្ដិសុខជាតិបានបង្ហើបឱ្យ ដឹងពីការប្រកាសប្រើច្បាប់គ្រាអាសន្ន ឬ ច្បាប់ការពារសន្ដិសុខបណ្ដោះអាសន្ននៅក្រុង បាងកក និងនៅតាមបណ្ដាខេត្ដចំនួន៧ ថាព្រោះតែស្ថានការណ៍ដែលមានការធ្វើបាតុកម្មដោយមានមនុស្សច្រើន និងមកពីតំបន់ ជាច្រើននៅទូទាំងប្រទេស។ ហេតុការណ៍នេះ ហាក់បីដូចជាអូសបន្លាយពេលវេលា ទើប សំរេចប្រកាសប្រើច្បាប់គ្រាអាសន្នខាងលើ ព្រោះការធ្វើបាតុកម្មអាចមានភាពចលាចល។ស្របពេលជាមួយគ្នានេះ សមត្ថកិច្ចដែល យាមកាមការពារសន្ដិសុខពីការធ្វើបាតុកម្ម ខាងលើ អាចប្រើកំលាំងទ័ព និងប៉ូលិសសរុប ប្រហែល៣ម៉ឺននាក់ បើបូករួមនឹងកងសេនាជនផងនោះ អាចមានកំលាំងសរុបដល់ទៅ៥ ម៉ឺននាក់ ក្នុងការទប់ទល់នឹងក្រុមបាតុករ ។
- អ្នកវិភាគថាថ្ងៃទី១៤ មីនា នឹងមាន និន្នាការកាន់តែធ្ងន់ធ្ងរ
ក្រោយពីចេញសាលដីការឹបអូសទ្រព្យ លោកថាក់ស៊ីន ស៊ីណាវ៉ាត្រា អតីតនាយករដ្ឋ មន្ដ្រីថៃចំនួនជាង៤,៦ម៉ឺនលានបាត ឃើញថា ស្ថានការណ៍នយោបាយក៏ចាប់ផ្ដើមក្ដៅគគុក ម្ដងទៀត ជាពិសេសគឺស្ថានការណ៍ក្នុងរវាង ពីថ្ងៃទី១២ដល់១៤ មីនា ខាងមុខ ព្រោះក្រុម មេដឹកនាំអាវក្រហម នឹងគ្រោងប្រមូល កំលាំងបាតុករប្រហែល១លាននាក់ ដោយ ដឹកជញ្ជូនបាតុករក្នុងមួយភូមិ មួយរថយន្ដ និងបានបញ្ជាក់ថា ធ្វើឱ្យមានការបែកបាក់ ក្នុងរដ្ឋាភិបាលឱ្យបាន ។លោកណារុង ភិចប្រាស៊ីត សាស្ដ្រាចារ្យ ផ្នែកនយោបាយនៃមហាវិទ្យាល័យជូឡាលុង កន បានបង្ហើបឱ្យដឹងពីស្ថានភាពការធ្វើបាតុ កម្មរបស់ក្រុមអាវក្រហមក្នុងរវាងពីថ្ងៃទី ១២ដល់១៤ មីនា ថា មាននិន្នាការទាំងភាព ហិង្សា និងអហិង្សាប្រហែល៥០:៥០ ដោយ ផ្អែកទៅលើហេតុផល៣ប្រការ គឺ១-តើ ប្រមូលផ្ដុំមនុស្ស (បាតុករ) បានច្រើន ឬតិច ប៉ុនណា? ២-បើសិនមានអ្នកកាន់អំណាចមក ធ្វើការប្រឆាំងច្រើន ត្រង់ចំណុចនេះនឹងធ្វើឱ្យ កើតមានអំពើហិង្សា និងអាចអូសបន្លាយ ពេលយូរអង្វែង និង៣-មនុស្សដែលមកធ្វើ បាតុកម្មមានតិចតួច ក្រុមទាំងនោះអាចមិន ត្រូវការភាពធ្ងន់ធ្ងរ (ហិង្សា) ប៉ុន្ដែអាចមាន ក្រុមជ្រៀតជ្រែក ដើម្បីបង្កើតស្ថានការណ៍ វឹកវរ ត្រង់ចំណុចនេះ ជាប្រការគួរឱ្យភ័យ ខ្លាចបំផុត ។
- ដោះលែងឧត្ដមសេនីយ៍ខាទីយ៉ា ដោយបង់ប្រាក់ធានា
យោងតាមគេហទំព័រ MCOT នាថ្ងៃទី៩ មីនា បានឱ្យដឹងថា លោកឧត្ដមសេនីយ៍ខាទី យ៉ា សាវ៉ាសឌីពុល ដែលជាអ្នកគាំទ្រដ៏ស្មោះ ត្រង់របស់លោកថាក់ស៊ីន ស៊ីណាវ៉ាត្រា អតីត នាយករដ្ឋមន្ដ្រីថៃ ត្រូវបានតុលាការឧក្រិដ្ឋ កម្មសំរេចដោះលែងដោយការបង់ប្រាក់ធានាកាលពីល្ងាចថ្ងៃទី៨ មីនា កន្លងមក ។ លោក ឧត្ដមសេនីយ៍រួមទាំងមនុស្ស៦នាក់ទៀតត្រូវបានដោះលែង ក្រោយពីមេធាវីរបស់លោក ឧត្ដមសេនីយ៍ខាទីយ៉ា បានស្នើសុំដល់តុលា ការឧក្រិដ្ឋមួយឱ្យដោះលែងរូបលោក ដោយ ការបង់ប្រាក់ធានាចំនួន១,៦លានបាត ។លោកឧត្ដមសេនីយ៍ខាទីយ៉ា រួមទាំងមិត្ដ ភក្ដិរបស់លោក២នាក់ទៀតត្រូវបានឃុំខ្លួន កាលពីចុងសបា្ដហ៍កន្លងមក ដោយជាប់ចោទ ពីបទបង្ហាញអាវុធនៅកន្លែងសាធារណៈ ។ បើទោះបីជាអ្នកស៊ើបអង្កេតរបស់ប៉ូលិសបានស្នើដល់តុលាការឱ្យបន្ដឃុំខ្លួនអ្នកទាំង៨នាក់ ក៏ដោយ ក៏ត្រូវតុលាការនៅតែសំរេចដោះ លែងជាបណ្ដោះអាសន្នសិន ប៉ុន្ដែដោះលែង តែ៧នាក់ប៉ុណ្ណោះ ដោយសារម្នាក់ទៀតគឺ លោក Pornwat Thongthanaboon ហៅ K-Thong ត្រូវបានចាត់ទុកថា ទង្វើរបស់គាត់ បានប្រព្រឹត្ដជាភេរវកម្ម ។លោកឧត្ដមសេនីយ៍ខាទីយ៉ា សាវ៉ាសឌី ពុល ត្រូវបានផ្អាកពីការងារក្នុងរយៈពេល មិនកំណត់ ដោយសារត្រូវបានចោទប្រកាន់ ពីបទមានអាវុធខុសច្បាប់ និងប្រើប្រាស់ស្លាក លេខរថយន្ដក្លែងក្លាយ ជាពិសេសជាប់ សង្ស័យពីបទពាក់ព័ន្ធទៅនឹងការវាយប្រហារ ដោយគ្រាប់បែកនៅស្នាក់ការយោធាថៃ កាលពីថ្ងៃទី១៥ មករា កន្លងមក ។ ចំណែក លោក Pornwat ត្រូវបានចោទប្រកាន់ពីបទ មានអាវុធខុសច្បាប់ និងពីបទប្រើប្រាស់*ប្រព័ន្ធផ្សព្វផ្សាយព័ត៌មានអេឡិចត្រូនិក ញុះញង់ឱ្យមានភាពចលាចល និងគំរាម កំហែងសណ្ដាប់ធ្នាប់សាធារណៈ និងបង្កើត វីដេអូឃ្លីបនៅតាមគេហទំព័រ You Tube ដែលបង្ហាញពីសញានៃការដាក់បំផ្ទុះគ្រាប់ បែកនៅក្នុងទីក្រុងបាងកក ។ ទង្វើទាំងនេះ ត្រូវបានចាត់ទុកជាទង្វើបង្កភេរវកម្ម ដូច្នេះ ហើយទើបលោកមិនត្រូវបានដោះលែង ។ ទោះបីជាបែបណា លោក Pornwat បានបដិ សេធការចោទប្រកាន់ទាំងនេះ ហើយលោក បានថ្លែងថា វីដេអូឃ្លីបនោះជារឿងប្រឌិត ប៉ុណ្ណោះ ។
ចែករំលែកព័តមាននេះ