បុរសម្នាក់បានបាញ់ប្រហារនៅម៉ិចស៊ិកកាលពីថ្ងៃទី១៦ មករា ក្នុងក្លិបរាត្រីមួយនៃទីក្រុងជាប់មាត់សមុទ្រ PLAYA DEL CARMEN ក្នុងឧបទ្វីប YUCATAN បណ្តាលឱ្យមនុស្សស្លាប់យ៉ាងតិច៥នាក់ ក្នុងនោះមានជនបរទេស៤នាក់ ហើយមនុស្ស១៥នាក់ទៀតរងរបួស ។
រដ្ឋអាជ្ញារដ្ឋ QUINTANA ROO បញ្ជាក់ក្នុងសន្និសីទសារព័ត៌មានមួយថា ជនជាតិកាណាដាម្នាក់ អីុតាលីម្នាក់ និងកូឡុំប៊ីម្នាក់ បានត្រូវស្លាប់ រួចស្ថានទូតអាមេរិកប្រចាំក្រុងម៉ិចស៊ីកូ ប្រកាសពីការស្លាប់ជនជាតិអាមេរិកម្នាក់ ។ សញ្ជាតិរបស់ជនរងគ្រោះទី៥ នៅពុំទាន់កំណត់ដឹងនៅឡើយ ។
រដ្ឋអាជ្ញាមុននេះរៀបរាប់ថា នារីម្នាក់ស្លាប់ ដោយគេរត់ជាន់ក្រោយការបាញ់ប្រហារ ។ ខ្មាន់កាំភ្លើងនៅគេចខ្លួនរកពុំទាន់ឃើញ ។
នៅម៉ិចស៊ិកដែលយោងតាមអាជ្ញាធរថា សាកសពមនុស្ស៦នាក់ដាច់ក្បាល ត្រូវបានរកឃើញនាថ្ងៃទី១៦ មករា ក្នុងរថយន្តដែលគេបោះបង់ចោលមួយនៅក្រុង CHILPANCINGO រដ្ឋ GURRERO ភាគខាងត្បូងម៉ិចស៊ិក ។
ក្នុងសេចក្តីប្រកាសមួយ លោក ROBERTO ALVAREZ អ្នកនាំពាក្យរបស់ប៉ូលិសរដ្ឋនោះគូសបញ្ជាក់ថា ក្បាលរបស់ជនរងគ្រោះទាំងនេះគេដាក់ក្នុងថង់ប្លាស្ទិកមួយក្នុងរថយន្ត។ រថយន្តដែលប៉ូលិសប្រទះឃើញគេចតចោលតាមមហាវិថីមួយនៃទីក្រុងមានប្រជាជន១៨៧.០០០នាក់នេះ ។
សាកសពមនុស្ស៤នាក់ទៀត ក៏រកឃើញនាថ្ងៃដដែលនេះដែរ នៅកន្លែង២ផ្សេងគ្នានៃទីក្រុង CHILAPA ស្ថិតនៅចម្ងាយប្រមាណ៦០គីឡូម៉ែត្រ ពីទីក្រុង CHILPANCINGO ៕
ចែករំលែកព័តមាននេះ