បងប្អូនដែលធ្វើដំណើរទៅមករវាងរាជធានីភ្នំពេញ និងក្រុងតាខ្មៅ ប្រាកដណាស់ពិតជាបានស្គាល់ យាយម៉ាប់លក់ខ្យងជាក់ជាមិនខានឡើយ ព្រោះស្ត្រីរូបនេះ បានប្រកបរបរលក់ខ្យងអស់រយៈពេលជាង
ខេត្តកណ្តាល ៖ បងប្អូនដែលធ្វើដំណើរទៅមករវាងរាជធានីភ្នំពេញ និងក្រុងតាខ្មៅ ប្រាកដណាស់ពិតជាបានស្គាល់ យាយម៉ាប់លក់ខ្យងជាក់ជាមិនខានឡើយ ព្រោះស្ត្រីរូបនេះ បានប្រកបរបរលក់ខ្យងអស់រយៈពេលជាង១០ឆ្នាំមកហើយ ដើម្បីរកប្រាក់សម្រួលជីវភាពគ្រួសារ។
មានសម្បុររាងស្រអែមស្រស់ និងស្ថិតក្នុងវ័យ៥០ឆ្នាំ យាយម៉ាប់ លក់ខ្យងនៅសង្កាត់រការខ្ពស់ ក្រុងតាខ្មៅ បានថ្លែងប្រាប់អ្នកសារព័ត៌មានបណ្តើរ ដៃចូកខ្យងច្រកក្នុងថង់បណ្តើរ ដើម្បីថ្លឹងឱ្យភ្ញៀវ បានឱ្យដឹងថា គាត់លក់ខ្យងនេះជាងមួយទស្សវត្សមកហើយ ដោយសារតែស្រលាញ់មុខរបរមួយនេះ។ ហើយសំខាន់ គឺគាត់មានម៉ូយៗជាច្រើនដែលតែងតែមកជួយទិញខ្យងរបស់គាត់។
យាយ ម៉ាប់ អ្នកលក់ខ្យងចាស់វស្សារូបនេះ បានបន្តថា ភ្ញៀវតែងតែទិញខ្យងរបស់គាត់ ដោយគ្រប់គ្នាតែងតែសរសើរពីរសជាតិថា ខ្យងស្រស់ល្អពេលយកទៅធ្វើម្ហូបផ្សេងៗ ជាពិសេសគឺមានតម្លៃសមរម្យ។ តម្រូវការទីផ្សារខ្យងរយៈពេលប៉ុន្មានឆ្នាំចុងក្រោយនេះ គឺមានការកើនឡើងខ្ពស់ ដោយសារតែខ្យងអាចយកទៅច្នៃបានជាមុខម្ហូបជាច្រើន ពិសេសគឺគេនិយមយកធ្វើស៊ុបខ្យង ឬខ្យងចំហុយគ្រឿងជាដើម។
យាយ ម៉ាប់ លក់ខ្យងនៅសង្កាត់រការខ្ពស់ បានបន្តថា គាត់លក់ខ្យងធម្មជាតិ ១០០ភាគរយ មិនមែនជាខ្យងចិញ្ចឹមដែលគេឲ្យស៊ីចំណីនោះទេ។ អ្វីដែលកាន់តែពិសេស ខ្យងរបស់គាត់ស្រស់ៗ ហើយវានៅរស់ ហើយគាត់លក់វាអស់ជារៀងរាល់ថ្ងៃ។ ដូចច្នេះ អតិថិជនពុំមានការព្រួយបារម្ភថា នេះជាខ្យងនៅសល់ មិនស្រស់ ឬក៏ជាខ្យងងា.ប់នោះឡើយ។
ស្ត្រីវ័យ៥០ឆ្នាំរូបនេះ បាននិយាយទៀតថា គាត់ប្រកបមុខនេះអស់រយៈពេលជាង១ទស្សវត្សហើយ ទោះបីជាជីវភាពធូរធា ខណៈកូននិងប្តីរបស់គាត់ពុំចង់ឱ្យគាត់លក់ដូរបន្តក្តី ប៉ុន្តែគាត់នៅតែលក់វា ព្រោះតែស្រលាញ់មុខរបរមួយនេះ។ គាត់បានបន្តថា គាត់លក់ខ្យងតាំងពីព្រឹកព្រលឹងស្រាងៗ រហូតដល់ពេលយប់។ ជាទូទៅ សម្រាប់ថ្ងៃធម្មតា គាត់លក់បានចន្លោះពី២០គីឡូក្រាម ទៅ៣០គីឡូក្រោម និងថ្ងៃចុងសប្តាហ៍គាត់ក៏លក់បានពី៥០គីឡូក្រាម ទៅ៦០គីឡូក្រោម។
យាយ ម៉ាប បានបន្តថា «ជាធម្មតា ខ្យងដែលអាចបរិភោគបានមាន២ប្រភេទ គឺ ខ្យងបឹង ឬខ្យងគូថស្រួច និងខ្យងគូថទោល។ ក្រៅពីខ្យង២ប្រភេទនេះ នៅមានខ្យងថៃ ដែលគេអាចបរិភោគបានដែរ ប៉ុន្តែពុំមានលក់នៅលើទីផ្សារទេ ដោយសារខ្យងប្រភេទនេះងាយស្រួលរក ហើយគេបរិភោគតែក្បាលវាតែប៉ុណ្ណោះ តែបើយើងបរិភោគខ្លួនវា នោះវាអាចនឹងពុល ឬរាក់រួសជាដើម»។ ជាទូទៅ គាត់បានបែងចែងខ្យងទៅតាមទំហំទាំង៣ប្រភទ មានទំហំតូច កណ្តាល និងធំ។ ទំហំទាំង៣នេះ គាត់លក់ក្នុងតម្លៃដូចៗគ្នា ដោយក្នុងមួយគីឡូក្រោមត្រឹមតែ១០០០០រៀលប៉ុណ្ណោះ។
ស្រី្តកូនពីររូបនេះ បានបន្ថែមថា អតិថិជនរបស់គាត់ទិញខ្យងយកទៅធ្វើម្ហូបដូចជា ស្ងោរ ឬអាំង ខ្លះយកទៅធ្វើស៊ុបខ្យង ធ្វើអាម៉ុក ឬឆាក្តៅជាដើម។ ជាការពិតណាស់ ខ្យងជាពពួកសត្វនៅក្នុងទឹកដែលយើងអាចយកមកធ្វើម្ហូបបានច្រើន ទៅតាមតម្រូវការរបស់ខ្លួន។
យាយម៉ាប់បានបន្តថា អំឡុងពេលកូវីដ គាត់លក់ខ្យងដាច់ខ្លាំងណាស់ អ្នកដំណើរជិតឆ្ងាយ តែងតែទិញខ្យល់របស់គាត់គ្រប់ៗគ្នា។ ដោយគាត់ខុសពីអាជីវករដទៃទៀត ក្នុងពេលកូវីដគេពិបាកសឹងតែគ្រប់គ្នា ប៉ុន្តែគាត់បែរលក់ដាច់ជាងគេទៅវិញ ដូច្នេះការលក់ខ្យងនាពេលបច្ចុប្បន្ននេះ ហាក់បីដូចជាមានតម្រូវការទីផ្សារខ្ពស់ និងការពេញនិយមក្នុងការបរិភោគទៀតផង ។
ចែករំលែកព័តមាននេះ