រាជធានីភ្នំពេញ ៖ កម្ពុជាមានតំបន់សក្ដានុពលទេសចរណ៍សម្បូរបែប ទាំងតំបន់ទេសចរណ៍វប្បធម៌ និងធម្មជាតិ ដែលកំពុងទាក់ទាញភ្ញៀវទេសចរបរទេសមកទស្សនា មាន កំណើនពីមួយឆ្នាំទៅមួយឆ្នាំ ។ ដោយមើលឃើញកំណើនភ្ញៀវទេសចរបែបនេះ ក្រុមហ៊ុនវិនិយោគបរទេសក៏កំពុងសម្លឹងរកឱកាសមកវិនិយោគលើវិស័យនេះនៅកម្ពុជាផងដែរ ។ បើតាមមន្ត្រីជាន់ខ្ពស់ក្រសួងទេសចរណ៍បញ្ជាក់ថា មានក្រុមហ៊ុនធំៗចំនួន៥ មកពីប្រទេសចិន មកស្វែងរកឱកាសវិនិយោគ លើវិស័យទេសចរណ៍នៅកម្ពុជា ហើយគោលដៅធំរបស់ពួកគេ គឺចង់វិនិយោគនៅតំបន់ឆ្នេរសមុទ្រ ពិសេសខេត្តព្រះសីហនុ និងខេត្តកំពត ។
ការបញ្ជាក់នេះ ត្រូវបានធ្វើឡើងក្រោយបញ្ចប់ជំនួបរវាងលោករដ្ឋមន្ត្រី ថោង ខុន ជាមួយតំណាងក្រុមហ៊ុនទាំង៥ខាងលើ ដែលដឹកនាំដោយលោក Yuan Hao នាយកប្រតិបត្តិនៃក្រុមហ៊ុន China CYTS Tours Holding Co, Ltd ជាក្រុមហ៊ុនធំមួយក្នុងចំណោមក្រុមហ៊ុនធំៗទាំង៥នេះ ហើយមានក្រុមហ៊ុនជាបុត្រសម្ព័ន្ធជាច្រើនទៀត នាទីស្ដីការក្រសួងទេសចរណ៍ ។
លោក ទិត ចន្ថា រដ្ឋលេខាធិការក្រសួងទេសចរណ៍ បានឲ្យដឹងកាលពីល្ងាចថ្ងៃទី១២ មករា កន្លងមកថា ៖ « ក្រុមហ៊ុនទាំង៥នេះ មកពីប្រទេសចិន សុទ្ធតែជាក្រុមអ្នកវិនិយោគធំៗដែលចូលមកស្វែងរកឱកាសវិនិយោគ និងព័ត៌មានពាក់ព័ន្ធនានាសម្រាប់ការវិនិយោគលើវិស័យទេសចរណ៍នៅកម្ពុជា ហើយការចូលមករបស់ក្រុមហ៊ុនទាំងនេះ គេបានសិក្សាអំពីសក្ដានុពលវិស័យទេសចរណ៍ខ្លះៗហើយ » ។
លោកបន្តថា លោករដ្ឋមន្ត្រី ថោង ខុន ក៏បានជម្រាបព័ត៌មានសំខាន់ជូនតំណាងក្រុមហ៊ុនទាំងនោះជាច្រើនហើយដែរ ក្នុងនោះរួមមាន ការអភិវឌ្ឍវិស័យទេសចរណ៍ ដែលជាគោលនយោបាយចម្បងរបស់រាជរដ្ឋាភិបាលកម្ពុជា ហ៊ុមព័ទ្ធដោយភាពសុខដុមរមនា សុខសន្តិភាព ស្ថិរភាពនយោបាយពេញលេញ ដែលកម្ពុជាកំពុងមានក្នុងពេលបច្ចុប្បន្ន បន្តថែរក្សាទៅថ្ងៃអនាគត និងមានសក្ដានុពលទេសចរណ៍ពីធម្មជាតិជាច្រើន ដែលសុទ្ធសឹងជាឱកាសវិនិយោគដ៏សម្បូរបែប ។
លោកក៏បានជម្រាបប្រាប់ក្រុមវិនិយោគិនចិនបន្តថា តាំងពីប្រវត្តិសាស្ត្ររហូតដល់ពេលបច្ចុប្បន្ន រាជរដ្ឋាភិបាលកម្ពុជាមានកិច្ចសហប្រតិបត្តិការល្អ និងមិត្តភាពយ៉ាងជិតស្និទ្ធជាមួយរដ្ឋាភិបាលចិន ជាពិសេស ក្រោយដំណើរទស្សនកិច្ចក្នុងប្រទេសកម្ពុជា របស់លោកប្រធានាធិបតីចិន ស៊ី ជិនពីង កាលពីពេលកន្លងទៅថ្មីៗនេះ ក៏កាន់តែជំរុញកំណើនភ្ញៀវទេសចរចិន និងវិនិយោគិនចិនចូលមកទស្សនាកម្សាន្ត និងវិនិយោគនៅកម្ពុជាច្រើនឡើងថែមទៀត ។
ជាមួយគ្នានោះ ភ្ញៀវទេសចរអន្តរជាតិចូលមកទស្សនាកម្ពុជា បាននិងកំពុងមានសន្ទុះកើនឡើងជារៀងរាល់ឆ្នាំ ហើយការផ្សព្វផ្សាយទៅកាន់ទីផ្សារទេសចរណ៍ពិភពលោក ក៏កាន់តែទូលំទូលាយផងដែរ ។ លោកបន្តថា ៖ «ជាក់ស្ដែង ក្នុងឆ្នាំ២០១៦នេះ កម្ពុជាទទួលបានភ្ញៀវទេសចរអន្តរជាតិប្រមាណជាង៥លាននាក់ ក្នុងអត្រាកំណើនប្រមាណ៥% បន្ថែមទៀត » ។
លោករដ្ឋមន្ត្រី ថោង ខុន ក៏បានអំពាវនាវដល់ក្រុមវិនិយោគិនចិនទាំងនោះ ធ្វើយ៉ាងណាសម្រេចឲ្យបាននូវគោលដៅសិក្សាស្រាវជ្រាវរបស់ខ្លួន និងធ្វើការវិនិយោគទុនឲ្យបានច្រើន ដោយរាជរដ្ឋាភិបាលកម្ពុជារីករាយស្វាគមន៍ជានិច្ច ។ ឆ្លើយតបនឹងសំណើនេះ ខាងភាគីចិនបានសន្យា នឹងខិតខំកៀងគរវិនិយោគិន និងក្រុមហ៊ុនបុត្រសម្ព័ន្ធរបស់ខ្លួនស្វែងរកឱកាសវិនិយោគនៅកម្ពុជាកាន់តែច្រើនផងដែរ ។
គួរបញ្ជាក់ថា ក្នុងឆ្នាំ២០១៦ ភ្ញៀវទេសចរចិនដែលចូលមកទស្សនាកម្ពុជា មានសន្ទុះកើនឡើងគួរឲ្យកត់សម្គាល់ប្រមាណជិត២០%បន្ថែមទៀត ខណៈឆ្នាំ២០១៥ ភ្ញៀវចិនមកទស្សនាកម្ពុជា កើនជាង២៤% ៕
ចែករំលែកព័តមាននេះ