ក្រសួងមហាផ្ទៃចុះហត្ថលេខាជាមួយគណៈអក្សរសម្ងាត់រដ្ឋាភិបាលវៀតណាម
រាជធានីភ្នំពេញ ៖ កម្ពុជាបានរៀបចំពិធីចុះហត្ថលេខាមួយ ស្ដីពី ផែនការសហប្រតិបត្តិការឆ្នាំ២០១៧ លើវិស័យអក្សរសម្ងាត់ រវាងក្រសួងមហាផ្ទៃនៃព្រះរាជាណាចក្រកម្ពុជា
រាជធានីភ្នំពេញ ៖ កម្ពុជាបានរៀបចំពិធីចុះហត្ថលេខាមួយ ស្ដីពី ផែនការសហប្រតិបត្តិការឆ្នាំ២០១៧ លើវិស័យអក្សរសម្ងាត់ រវាងក្រសួងមហាផ្ទៃនៃព្រះរាជាណាចក្រកម្ពុជា ជាមួយគណៈអក្សរសម្ងាត់រដ្ឋាភិបាលនៃសាធារណរដ្ឋសង្គមនិយមវៀតណាម ។ ពិធីនេះបានធ្វើឡើងកាលពីវេលាម៉ោង៦និង៤០នាទីយប់ថ្ងៃទី១៣ មករា កន្លងមក នៅសណ្ឋាគារសាន់វេ ក្រោមអធិតីភាពលោកនាយឧត្តមសេនីយ៍ ឯម សំអាន រដ្ឋលេខាធិការក្រសួងមហាផ្ទៃ និងលោក ដាំង វូសឺន ប្រធានគណៈអក្សរសម្ងាត់រដ្ឋាភិបាលនៃសាធារណរដ្ឋសង្គមនិយមវៀតណាម ។
គួរបញ្ជាក់ផងដែរ មុននឹងឈានដល់កិច្ចព្រមព្រៀងចុះហត្ថលេខានេះ នៅព្រឹកថ្ងៃទី១៣ មករា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានអនុញ្ញាតឲ្យលោក ដាំង វូសឺន ប្រធានគណៈអក្សរសម្ងាត់រដ្ឋាភិបាលនៃសាធារណរដ្ឋសង្គមនិយមវៀតណាម បានចូលជួបសម្តែងការគួរសម និងពិភាក្សាការងារនៅទីស្តីការក្រសួងមហាផ្ទៃ ។
នៅក្នុងជំនួបនោះ ភាគីវៀតណាមបានឯកភាពនឹងផ្តល់ថវិកាជាង៧ម៉ឺនដុល្លារ សម្រាប់ផ្គត់ផ្គង់បច្ចេកទេស និង៥៥ម៉ឺនដុល្លារទៀតសម្រាប់សាងសង់អគារសាលាបឋមសិក្សា និងមធ្យមសិក្សាបច្ចេកទេសអក្សរសម្ងាត់នៅសាលានគរបាលត្រែងត្រយឹង ស្ថិតនៅខេត្តកំពង់ស្ពឺ ។ សម្ដេចក្រឡាហោម ស ខេង ក៏បានលើកឡើងពីកិច្ចសហប្រតិបត្តិការល្អរវាងក្រសួងមហាផ្ទៃ និងគណៈអក្សរសម្ងាត់រដ្ឋាភិបាលនៃសាធារណរដ្ឋសង្គមនិយមវៀតណាមនាពេលកន្លងមកផងដែរ ។ ជាមួយគ្នានោះ សម្តេចក្រឡាហោម បានស្នើសុំឲ្យខាងភាគីវៀតណាមជួយកសាងធនធានមនុស្ស តាមរយៈការបណ្តុះបណ្តាលថ្នាក់មហាវិទ្យាល័យ មធ្យមសិក្សាបច្ចេកទេស និងការបំប៉នធម្មតាលើជំនាញអក្សរសម្ងាត់ ។
ជាការឆ្លើយតប លោក ដាំង វូសឺន បានមានប្រសាសន៍ថា សម្រាប់ឆ្នាំ២០១៧នេះភាគីវៀតណាមនឹងទទួលមន្ត្រីកម្ពុជាទៅបណ្តុះបណ្តាលនៅវៀតណាមចំនួន៣០នាក់ ក្នុងនោះថ្នាក់មហាវិទ្យាល័យចំនួន១០នាក់ និងថ្នាក់មធ្យមសិក្សាបច្ចេកទេស ចំនួន២០នាក់។ ក្រៅពីនោះ នឹងផ្តល់ជំនួយបច្ចេកទេសរួមមាន ម៉ាស៊ីនបកប្រែចំនួន៣៤គ្រឿង ម៉ាស៊ីនផ្ទុកទិន្នន័យចំនួន២គ្រឿង និងសម្ភារផ្សេងៗទៀតសរុបទឹកប្រាក់ជាង៧ម៉ឺនដុល្លារ ថែមទាំងជួយសាងសង់សាលាបឋមសិក្សា មធ្យមសិក្សាបច្ចេកទេសអក្សរសម្ងាត់នៅសាលានគរបាលត្រែងត្រយឹង ខេត្តកំពង់ស្ពឺ ដែលគ្រោងចំណាយថវិកាប្រមាណជា៥៥ម៉ឺនដុល្លារផងដែរ ៕
ចែករំលែកព័តមាននេះ