ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានប្រកាស​នៅយប់ថ្ងៃទី១២ ខែសីហា ឆ្នាំ២០២២ ដោយលើកឡើងនូវសកម្មភាពល្មើសច្បាប់​​របស់​លោកស្រី យ៉ាង សុភ័ណ្ឌ ប្រធានសហជីពកម្មករ ចំនួន ៣ចំណុច ដែលបានប្រព្រឹត្ត​ ពាក់ព័ន្ធករណីវិវាទ​នៅក្រុមហ៊ុន ណាហ្គា វើលដ៍។

សកម្មភាពល្មើសច្បាប់ របស់លោកស្រី យ៉ាង សុភ័ណ្ឌ ទាំង ៣ចំណុចនោះ ត្រូវបានក្រសួង​ការងារ ប្រកាសថា៖ ១-ដឹកនាំ និងធ្វើសកម្មភាព​ក្រៅដែនអនុវត្តតាមវិជ្ជាជីវៈ ឬវិស័យ​ ដែលបាន​កំណត់​ក្នុងប្រការ ៦ នៃលក្ខន្តិកៈសហព័ន្ធសហជីព​របស់ខ្លួន ( មាត្រា ៨១ នៃច្បាប់ស្តីពីសហជីព ) ២-ដឹកនាំ និងបង្ខិតបង្ខំ​កម្មករនិយោជិតឱ្យចូលរួម​ធ្វើកូដកម្មតវ៉ា ( មាត្រា ៨៩​ នៃច្បាប់ស្តីពី សហជីព ) និង៣-ដឹកនាំធ្វើកូដកម្ម ឬបាតុកម្ម ដែលផ្ទុយ​នឹងនីតិវិធីច្បាប់ ( មាត្រា ៦៥ នៃច្បាប់ស្តីពីសហជីព )។